രംഗപ്പയെ കൊലപ്പെടുത്തിയ കേസിലെ പ്രതികളെ കണ്ടെത്താനായില്ല; പോലീസ് സര്‍ജന്റെ മൊഴി വീണ്ടും രേഖപ്പെടുത്തി

കാസര്‍കോട്: (www.kasargodvartha.com 29.09.2017) കര്‍ണാടക ബാഗല്‍കോട്ടെ വൈരപ്പയുടെ മകനും കാസര്‍കോട് നഗരസഭയിലെ സാമൂഹ്യസുരക്ഷാ പ്രവര്‍ത്തകനുമായ രംഗപ്പയെ (35) കൊലപ്പെടുത്തിയ കേസില്‍ പ്രതികളെ കണ്ടെത്താനായില്ല. രംഗപ്പയുടെ മരണം കൊലപാതകമാണെന്ന് പോസ്റ്റുമോര്‍ട്ടം റിപ്പോര്‍ട്ടില്‍ വ്യക്തമായിരുന്നു. ഇതിന്റെ അടിസ്ഥാനത്തില്‍ പോലീസ് അന്വേഷണം ഊര്‍ജിതമാക്കിയിരിക്കുകയാണ്. തിരുവനന്തപുരം സ്വദേശി അടക്കമുള്ള നാലംഗസംഘമാണ് കൊലപാതകത്തിന് പിന്നിലെന്ന് വ്യക്തമായിരുന്നു.


ഇവര്‍ ഒളിവില്‍ കഴിയുകയാണ്. ഈ മാസം ഒമ്പതിനാണ് ചെര്‍ക്കള ടൗണിന് സമീപം പറമ്പില്‍ രംഗപ്പയെ മരിച്ച നിലയില്‍ കണ്ടെത്തിയത്. അടിയേറ്റ് വാരിയെല്ല് തകര്‍ന്നാണ് രംഗപ്പ മരിച്ചതെന്നാണ് പോസ്റ്റുമോര്‍ട്ടം റിപ്പോര്‍ട്ടില്‍ വ്യക്തമാക്കിയിരുന്നത്. ഇതേ തുടര്‍ന്ന് രംഗപ്പയുടെ മൃതദേഹം പോസ്റ്റുമോര്‍ട്ടം ചെയ്ത പരിയാരം മെഡിക്കല്‍ കോളജിലെ പോലീസ് സര്‍ജന്റെ മൊഴി അന്വേഷണ ഉദ്യോഗസ്ഥര്‍ രേഖപ്പെടുത്തിയിരുന്നു. വ്യാഴാഴ്ച വീണ്ടും പോലീസ് സര്‍ജന്റെ മൊഴിയെടുത്തു.