ഇലക്ട്രിക് കേബിളിൽ കുടുങ്ങി പ്രാവ്; 2 ദിവസത്തെ ദുരിതത്തിനൊടുവിൽ രക്ഷകരായി അഗ്നിരക്ഷാ സേന
● കരിവെള്ളൂർ സ്വദേശി മുരളി ആണൂർ വിവരം ഫയർഫോഴ്സിനെയും കെഎസ്ഇബിയെയും അറിയിച്ചു
● ഫയർ ആൻഡ് റെസ്ക്യൂ ഓഫീസർ കെ വിപിൻ്റെ നേതൃത്വത്തിലാണ് രക്ഷാപ്രവർത്തനം നടന്നത്
● ഫയർ ഓഫീസർ പി പി രാഹുൽ സ്റ്റെപ്പ് ലാഡറിന്റെ സഹായത്തോടെ കേബിളിനടുത്തേക്ക് കയറി ചരട് മുറിച്ചുമാറ്റി
● പ്രാവിനെ യാതൊരു പരിക്കുകളുമില്ലാതെ സുരക്ഷിതമായി താഴെയിറക്കി
പയ്യന്നൂർ: (KasargodVartha) ഇലക്ട്രിക് കേബിൾ ലൈനിൽ കുടുങ്ങി രണ്ട് ദിവസമായി പറന്നുപോകാനാകാതെ ദുരിതത്തിലായിരുന്ന പ്രാവിനെ സാഹസികമായി രക്ഷപ്പെടുത്തി പയ്യന്നൂർ അഗ്നിരക്ഷാ സേന. പുതിയ ബസ് സ്റ്റാൻഡിന് സമീപം റോയൽ റസിഡൻസിക്ക് മുന്നിലെ മെയിൻ റോഡിന് കുറുകെയുള്ള ഇലക്ട്രിക് കേബിൾ ലൈനിലാണ് പ്രാവ് കുടുങ്ങിയത്.
പ്രാവിൻ്റെ കാലിൽ കെട്ടിയിരുന്ന ചരട് ഇലക്ട്രിക് കേബിളിൽ കുരുങ്ങിയതോടെയാണ് അപകടത്തിൽപ്പെട്ടത്. ചരട് മുറിച്ചുമാറ്റാൻ കഴിയാതെ വന്നതോടെ പ്രാവിന് പറന്നുപോകാനാകാതെ കമ്പിയിൽ തന്നെ കഴിയേണ്ടിവന്നു. രണ്ട് ദിവസം മഴയും വെയിലും സഹിച്ച് ചിറകടിച്ച് കമ്പിയിൽ കുടുങ്ങിക്കിടന്ന പ്രാവിൻ്റെ ദയനീയാവസ്ഥ ശ്രദ്ധയിൽപ്പെട്ടതോടെയാണ് നാട്ടുകാർ രക്ഷാപ്രവർത്തനത്തിന് ശ്രമം നടത്തിയത്.
രക്ഷാപ്രവർത്തനവുമായി ഫയർഫോഴ്സ്
കരിവെള്ളൂർ സ്വദേശി മുരളി ആണൂർ പ്രാവിൻ്റെ ദുരവസ്ഥ ശ്രദ്ധയിൽപ്പെട്ടതിനെ തുടർന്ന് പയ്യന്നൂർ അഗ്നിരക്ഷാ സേനയെയും കെഎസ്ഇബി അധികൃതരെയും വിവരമറിയിക്കുകയായിരുന്നു. തുടർന്ന് ഉദ്യോഗസ്ഥർ സ്ഥലത്തെത്തി രക്ഷാപ്രവർത്തനം ആരംഭിച്ചു.
ഫയർ ആൻഡ് റെസ്ക്യൂ ഓഫീസർ കെ വിപിൻ്റെ നേതൃത്വത്തിൽ ഫയർ ഓഫീസർ പി പി രാഹുൽ സ്റ്റെപ്പ് ലാഡറിൻ്റെ സഹായത്തോടെ കേബിളിനടുത്തേക്ക് കയറുകയായിരുന്നു. ഏറെ പണിപ്പെട്ടാണ് പ്രാവിൻ്റെ കാലിൽ കുടുങ്ങിയിരുന്ന ചരട് മുറിച്ചുമാറ്റിയത്. തുടർന്ന് പ്രാവിനെ യാതൊരു പരിക്കുകളുമില്ലാതെ സുരക്ഷിതമായി താഴെയിറക്കി.
നാട്ടുകാരുടെ അഭിനന്ദനം
അഗ്നിരക്ഷാ സേനാംഗങ്ങളായ അഭിലാഷ്, അർജുൻ, പത്മനാഭൻ എന്നിവരും ഈ രക്ഷാപ്രവർത്തനത്തിൽ നിർണായക പങ്കുവഹിച്ചു. കെഎസ്ഇബി ജീവനക്കാരും സ്ഥലത്തെത്തി ആവശ്യമായ സഹായങ്ങൾ നൽകിയിരുന്നു രണ്ട് ദിവസമായി ജീവനുവേണ്ടി പൊരുതിക്കിടന്ന പ്രാവിനെ ഫയർഫോഴ്സ് സുരക്ഷിതമായി രക്ഷപ്പെടുത്തിയതോടെ സ്ഥലത്ത് കണ്ടുനിന്നവരും നാട്ടുകാരും വലിയ ആശ്വാസത്തിലായി. മനുഷ്യജീവൻ മാത്രമല്ല, ദുരിതത്തിലായ ഒരു പക്ഷിയുടെ ജീവൻ രക്ഷിക്കാനും ആത്മാർഥതയോടെ രംഗത്തിറങ്ങിയ അഗ്നിരക്ഷാ സേനാംഗങ്ങളെ നാട്ടുകാർ ഹാർദവമായി അഭിനന്ദിച്ചു.
ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം
Article Summary: The Payyanur Fire Force successfully rescued a pigeon that was stuck on an electric cable for two days with its leg tangled in a thread.
#PayyanurNews #FireForceKerala #AnimalRescue #KannurNews #KeralaNews #BirdRescue #GoodDeeds #KSEB #AparnaNews
