Criticism | മതവിദ്വേഷ പ്രസ്താവന കേസ്: ശിക്ഷയിൽ ഒരു ദിവസം പോലും ജയിലിൽ കഴിഞ്ഞില്ല; പിസി ജോർജിന്‌ ജാമ്യം

കോട്ടയം: (KasargodVartha) മതവിദ്വേഷ പ്രസ്താവന കേസിൽ റിമാൻഡിലായിരുന്ന പിസി ജോർജിന് ഈരാറ്റുപേട്ട മജിസ്‌ട്രേറ്റ് കോടതി ജാമ്യം അനുവദിച്ചു. നേരത്തെ സമർപ്പിച്ച ജാമ്യാപേക്ഷ തള്ളിയതിനെ തുടർന്ന് 14 ദിവസത്തേക്ക് റിമാൻഡ് ചെയ്ത കോടതി ഉത്തരവിനെ തുടർന്നാണ് പിസി ജോർജ് റിമാൻഡിലായത്. എന്നാൽ തനിക്ക് അസുഖമുണ്ടെന്ന് കാണിച്ചതോടെ പിസി ജോർജിനെ ജയിലിൽ അയക്കാതെ നേരെ ആശുപത്രിയിലേക്ക് മാറ്റി. കോട്ടയം മെഡിക്കൽ കോളേജ് ആശുപത്രിയിൽ കാർഡിയോളജി ഐസിയുവിൽ പോലീസ് കാവലിൽ ഡോക്ടർമാരുടെ നിരീക്ഷണത്തിൽ കഴിയുകയായിരുന്നു അദ്ദേഹം. ജാമ്യം ലഭിച്ചതോടെ ഉടൻ ആശുപത്രിയിൽ നിന്നും ഡിസ്ചാർജ് ചെയ്ത് വീട്ടിലേക്ക് മടങ്ങും.

നിലവിൽ പിസി ജോർജിന്റെ ആരോഗ്യനില തൃപ്തികരമാണെന്ന് ഡോക്ടർമാർ നേരത്തെ തന്നെ അറിയിച്ചിരുന്നു.

ജനുവരി അഞ്ചിനാണ് വിവാദമായ മതവിദ്വേഷ പരാമർശം പിസി ജോർജിൽ നിന്നുണ്ടായത്. പോലീസ് സ്വമേധയാ കേസെടുക്കാത്തതിനാൽ മുസ്‌ലിം യൂത്ത് ലീഗ് നൽകിയ പരാതിയിലായിരുന്നു കേസ്. കോട്ടയം സെഷൻസ് കോടതിയും പിന്നീട് ഹൈക്കോടതിയും പിസി ജോർജിന്റെ മുൻകൂർ ജാമ്യാപേക്ഷ തള്ളിയിരുന്നു. രാജ്യത്ത് മതവിദ്വേഷം കൂടിവരുന്നതിനാൽ നിയമത്തിൽ മാറ്റം വേണമെന്നും, മതവിദ്വേഷ പ്രസംഗം നടത്തുന്നവർക്ക് ജയിൽ ശിക്ഷ ഉറപ്പുവരുത്തണമെന്നും കേസിൽ ഹൈക്കോടതി നിരീക്ഷിച്ചിരുന്നു. എന്നാൽ ജയിൽ ശിക്ഷ ലഭിക്കാതെയാണ് പിസി ജോർജ് വീട്ടിലേക്ക് മടങ്ങുന്നത്.

ജാമ്യാപേക്ഷ തള്ളിയതിനെ തുടർന്ന് കഴിഞ്ഞ തിങ്കളാഴ്ച പോലീസ് സ്റ്റേഷനിൽ ഹാജരാകേണ്ടിയിരുന്ന പിസി ജോർജ് നേരെ കോടതിയിൽ ഹാജരാവുകയായിരുന്നു. കോടതി പിസി ജോർജിനെ 14 ദിവസത്തേക്ക് റിമാൻഡ് ചെയ്തെങ്കിലും ജയിലിൽ പോകേണ്ടിവന്നില്ല. രണ്ട് ദിവസം ആശുപത്രിയിലും പിന്നീട് ജാമ്യം ലഭിച്ചതോടെ നേരെ വീട്ടിലേക്കും തിരിക്കും.

ഈ വാർത്ത എല്ലാവരുമായി പങ്കുവെക്കൂ, നിങ്ങളുടെ അഭിപ്രായങ്ങൾ രേഖപ്പെടുത്തൂ!

PC George was granted bail in a hate speech case. He was hospitalized due to health issues and did not spend any time in jail. His health is now stable, and he will return home.

#PCGeorge, #Bail, #HateSpeech, #KeralaNews, #Court, #Legal