അഴിമതി സംശയം: ബസ് ഷെൽട്ടർ പദ്ധതിയിൽ ദുരൂഹത?; സെക്രട്ടറിയുടെ ക്യാബിനിൽ അതിക്രമം; 'സമ്മർദ്ദങ്ങൾക്ക് വഴങ്ങില്ല' ​​​​​​​

കുമളി: (KasargodVartha) ബസ് ഷെൽട്ടർ നിർമാണ പദ്ധതിയുടെ ബിൽ വേഗത്തിൽ പാസ്സാക്കണം എന്നാവശ്യപ്പെട്ട് റഫീഖ് എന്ന വ്യക്തിയും സുഹൃത്തും പഞ്ചായത്ത് സെക്രട്ടറിയുടെ ക്യാബിനിൽ കയറി ബഹളമുണ്ടാക്കി. ചൊവ്വാഴ്ച വൈകുന്നേരം 4:30-നും 5 മണിക്കും ഇടയിലാണ് സംഭവം. സംഭവത്തിന്റെ ദൃശ്യങ്ങൾ താൻ പകർത്തിയിട്ടുണ്ടെന്ന് സെക്രട്ടറി അറിയിച്ചു.
 

പത്ത് ദിവസം മുൻപും ഇതേ വ്യക്തി ഓഫീസിൽ വന്ന് 'ടേക്ക് എ ബ്രേക്ക്', ബസ് ഷെൽട്ടർ എന്നീ പദ്ധതികളുടെ പേരിൽ ബഹളമുണ്ടാക്കിയിരുന്നതായി സെക്രട്ടറി പറയുന്നു. അന്ന് പരാതി നൽകാൻ തീരുമാനിച്ചപ്പോൾ പ്രസിഡന്റും മറ്റ് അംഗങ്ങളും ഇടപെട്ട് സംസാരിക്കുകയും, ദേഷ്യം അദ്ദേഹത്തിന്റെ സ്വഭാവത്തിൽ ഇടക്കാലത്തുണ്ടായ മാറ്റമാണെന്നും ഇനി ആവർത്തിക്കില്ലെന്നും ഉറപ്പുനൽകിയതിനെ തുടർന്ന് പരാതിയിൽ നിന്ന് പിന്മാറുകയായിരുന്നു. എന്നാൽ, ഇപ്പോൾ ഓഫീസിൽ തുടർച്ചയായി വന്ന് സമ്മർദം ചെലുത്തുന്നത് ബോധപൂർവമായ പ്രവൃത്തിയാണെന്ന് വ്യക്തമാവുകയാണെന്ന് സെക്രട്ടറി ചൂണ്ടിക്കാട്ടി.

ഓരോ ഫയലും നടപടിക്രമങ്ങൾ പാലിച്ചാണോ, മാനദണ്ഡങ്ങൾ പ്രകാരമാണോ നിർവഹിക്കപ്പെട്ടതെന്നെല്ലാം പരിശോധിച്ച ശേഷമേ ഉദ്യോഗസ്ഥർക്ക് പണമടയ്ക്കാൻ സാധിക്കൂ. ബസ് ഷെൽട്ടർ നിർമാണവുമായി ബന്ധപ്പെട്ട ഫയൽ കഴിഞ്ഞ ദിവസമാണ് ക്ലറിക്കൽ സീറ്റിൽ നിന്ന് പ്രോസസ്സ് ചെയ്തത്.

ക്ലാർക്കും സൂപ്പർവൈസറി ഉദ്യോഗസ്ഥരും പരിശോധിച്ച ശേഷമാണ് ഫയൽ സെക്രട്ടറിയുടെ അടുത്തെത്തുന്നത്. ഫയൽ ലഭിച്ചതിന് ശേഷം മാത്രമേ ഏതൊരു വിഷയത്തിലും അഭിപ്രായം പറയാൻ സെക്രട്ടറിക്ക് സാധിക്കൂ. ഫയൽ ലഭിക്കാതെ വേഗത്തിൽ പണം നൽകണമെന്ന് ഭീഷണിപ്പെടുത്തിയും സമ്മർദം ചെലുത്തിയും ആവശ്യപ്പെടുന്നത് ഗുണ്ടായിസമാണെന്ന് സെക്രട്ടറി പറഞ്ഞു.

കൂടാതെ, വിവരാവകാശ നിയമപ്രകാരം വിവിധ പരാതികൾ വന്ന പദ്ധതിയുടെ കാര്യത്തിൽ അസാധാരണമാംവിധം സമ്മർദം ചെലുത്താൻ ശ്രമിക്കുമ്പോൾ ഏത് ഉദ്യോഗസ്ഥനും കൂടുതൽ ജാഗ്രതയോടെ മാത്രമേ ആ ഫയലിനെ സമീപിക്കൂ എന്നും അദ്ദേഹം കൂട്ടിച്ചേർത്തു.

റഫീഖിനോട് പലപ്പോഴായി ഈ കാര്യങ്ങൾ പറഞ്ഞിട്ടുണ്ടെങ്കിലും, അദ്ദേഹത്തെപ്പോലുള്ള വ്യക്തികൾക്ക് ഇതൊന്നും അറിയാത്തതല്ലെന്നും, തുടർച്ചയായി ഓഫീസിൽ വന്ന് ബഹളമുണ്ടാക്കിയാൽ ഉദ്യോഗസ്ഥർ സമ്മർദത്തിലാവുമെന്നും അങ്ങനെ തങ്ങൾ ഉദ്ദേശിച്ച രീതിയിൽ കാര്യങ്ങൾ നടന്നു കിട്ടുമെന്നും കരുതി ബോധപൂർവം സൃഷ്ടിക്കുന്ന സമ്മർദതന്ത്രങ്ങളാണ് ഇതെന്നും മിനിമം വിവേകമുള്ള ആർക്കും തിരിച്ചറിയാൻ സാധിക്കുമെന്നും സെക്രട്ടറി വ്യക്തമാക്കി.

ഇത്തരം സമ്മർദതന്ത്രങ്ങളിൽ ഭയന്ന് നടപടിക്രമങ്ങൾ ഉറപ്പാക്കാതെ പണമടച്ചുപോരുന്ന നിരവധി സെക്രട്ടറിമാർ ഉണ്ടാവാം. എന്നാൽ, അകാരണമായുള്ള സമ്മർദശ്രമങ്ങൾ കാണുമ്പോൾ ഈ പദ്ധതി സംബന്ധിച്ച് എന്തോ ബോധപൂർവം ഒളിപ്പിക്കാനുള്ള ശ്രമം നടക്കുന്നതായി സംശയിക്കുന്നതായി സെക്രട്ടറി പറയുന്നു.

ഫയൽ കൃത്യമായി പരിശോധിച്ചാൽ മാത്രമേ ഇക്കാര്യത്തിൽ വ്യക്തത വരൂ. പഞ്ചായത്ത് അംഗീകരിച്ച എസ്റ്റിമേറ്റ് പ്രകാരമാണോ പ്രവൃത്തി നടന്നത്, ഈ പ്രവൃത്തി പൂർത്തിയായിട്ടുണ്ടോ, പഞ്ചായത്തിന് നഷ്ടം വന്നിട്ടുണ്ടോ എന്നെല്ലാം പരിശോധിക്കാൻ സമയം നൽകാതെ ഉദ്യോഗസ്ഥരെ ഭീഷണിപ്പെടുത്തി കാര്യങ്ങൾ നേടാമെന്ന് കരുതുന്നത് ജനാധിപത്യ സമൂഹത്തിന് യോജിച്ചതല്ലെന്നും അദ്ദേഹം അഭിപ്രായപ്പെട്ടു.

വളരെ സത്യസന്ധമായും ധാർമികമായുമാണ് താൻ ജീവിക്കുന്നതെന്നും ഔദ്യോഗിക ജീവിതവും അങ്ങനെതന്നെയാണെന്നും സെക്രട്ടറി വ്യക്തമാക്കി. അതിനാൽ, ഒന്നും പ്രതികരിക്കാതെ സമ്മർദതന്ത്രങ്ങളുമായി ഓഫീസിൽ വരുന്നവരുടെയും ഭീഷണിക്ക് വഴങ്ങി പ്രവർത്തിക്കാൻ താൻ ആരുടെയും പ്രൈവറ്റ് സെക്രട്ടറിയല്ലെന്നും ഗ്രാമപഞ്ചായത്തിന്റെ സെക്രട്ടറിയായി പ്രവർത്തിക്കുക എന്നതാണ് തന്റെ കർത്തവ്യമെന്നും അദ്ദേഹം പറഞ്ഞു.

ഗ്രാമപഞ്ചായത്തിന്റെ വികസന, സേവന പ്രവർത്തനങ്ങൾ ഫയൽ നടപടിക്രമങ്ങൾ പാലിച്ച് നിയമപരമായി നടപ്പിലാക്കുക എന്നതാണ് തന്റെ ഉത്തരവാദിത്വം. ഫയൽ നടപടിക്രമങ്ങളിൽ വീഴ്ച വന്നാൽ ഓഡിറ്റ് സമയത്ത് സെക്രട്ടറി തന്നെയാണ് ഉത്തരവാദിത്വം ഏറ്റെടുക്കേണ്ടി വരികയെന്നും, ഭീഷണിപ്പെടുത്തുന്നവരും നിർബന്ധിക്കുന്നവരുമൊന്നും അപ്പോൾ ചിത്രത്തിൽ ഉണ്ടാകില്ലെന്നും അദ്ദേഹം ഓർമിപ്പിച്ചു.

ഓഫീസിനെ ആശ്രയിക്കുന്ന സാധാരണക്കാരായ വ്യക്തികളോടുള്ള ഫയലുകൾ ഏറ്റവും അനുകമ്പയോടെയാണ് സെക്രട്ടറി എന്ന നിലയിൽ താൻ പ്രോസസ്സ് ചെയ്യാറുള്ളത് എന്നതാണ് സത്യം. വലിയ തുക വരുന്ന പദ്ധതികൾ പ്രോസസ്സ് ചെയ്യുമ്പോൾ കൂടുതൽ ശ്രദ്ധ വേണ്ടിവരുന്നത് സ്വാഭാവികമാണെന്നും അദ്ദേഹം കൂട്ടിച്ചേർത്തു.

ഏതെങ്കിലും വിഷയത്തിൽ ആർക്കെങ്കിലും പരാതിയുണ്ടെങ്കിൽ അത് പ്രസിഡന്റിനോ ജില്ലാ ഓഫീസർക്കോ കെ-സ്മാർട്ട് വഴി പരാതി നൽകുകയാണ് വേണ്ടതെന്നും, അല്ലാതെ സ്ഥിരമായി ഓഫീസിൽ വന്ന് ഉദ്യോഗസ്ഥരെ ഭീഷണിപ്പെടുത്തുന്നത് ജനാധിപത്യ സമൂഹത്തിന് അഭികാമ്യമല്ലെന്നും സെക്രട്ടറി വ്യക്തമാക്കി.

ഇതിലും കൗതുകകരമായ കാര്യം, ബസ് ഷെൽട്ടർ നിർമാണ പ്രവൃത്തിയുമായി ബന്ധപ്പെട്ട് ഗ്രാമപഞ്ചായത്തുമായി എഗ്രിമെന്റ് വച്ചത് ഹാബിറ്റാറ്റ് കമ്പനിയാണ്. അങ്ങനെയെന്നിരിക്കെ റഫീഖ് എന്ന വ്യക്തിയും അദ്ദേഹത്തിന്റെ സുഹൃത്തും ഈ വിഷയത്തിൽ ഓഫീസിൽ കയറി ബഹളമുണ്ടാക്കുന്നത് എന്തിനാണെന്ന് ചിന്തിക്കണം.

തങ്ങൾക്ക് നിയമപരമായി യാതൊരു അധികാരവുമില്ലാത്ത വിഷയത്തിൽ ഇങ്ങനെ സ്ഥിരമായി ഓഫീസിൽ കയറി ബഹളമുണ്ടാക്കാൻ റഫീഖിന് പ്രേരണ നൽകുന്നതാരാണ് എന്നും സെക്രട്ടറി ചോദിക്കുന്നു.

ഓഫീസിൽ വന്നാൽ പെട്ടെന്ന് സംസാരം അവസാനിപ്പിച്ച് പോകാൻ റഫീഖ് ഒരിക്കലും തയ്യാറാകാറില്ല. അനാവശ്യ തർക്കങ്ങളുണ്ടാക്കി സംസാരം വലിച്ചുനീട്ടി ഉദ്യോഗസ്ഥരെ സമ്മർദത്തിലാക്കുന്നതാണ് റഫീഖിന്റെ രീതി. റഫീഖ് ഉദ്ദേശിച്ച രീതിയിലും പറയുന്ന സമയത്തും കാര്യങ്ങൾ നടന്നില്ലെങ്കിൽ ‘പുറത്തുനിന്ന് കണ്ടോളാം’ എന്നാണ് ഭീഷണി.

എന്തായാലും റഫീഖിന്റെയും സുഹൃത്തിന്റെയും ഭീഷണിക്ക് എത്രത്തോളം നിലവാരമുണ്ടെന്നറിയാനാണ് ഇന്നലെ നാട്ടിൽ പോകേണ്ട ആവശ്യമുണ്ടായിട്ടും താൻ കുമ്പളയിൽ തന്നെ നിന്നതെന്ന് സെക്രട്ടറി അറിയിച്ചു. ‘ധർമോ രക്ഷിത രക്ഷിത:’ എന്നതാണ് പ്രമാണം. ധർമ്മത്തെ സംരക്ഷിക്കുന്നവരെ ധർമ്മം സംരക്ഷിച്ചോളുമെന്ന ഉത്തമ വിശ്വാസത്തിലാണ് ഇത്രയും കാലം ജീവിച്ചത് എന്നതിനാൽ ഇത്തരം സമ്മർദതന്ത്രങ്ങളിലൊന്നും വഴങ്ങാൻ തത്കാലം ഉദ്ദേശ്യമില്ല. ഇനി ഇവിടെ കുമ്പളയിൽ നിന്ന് ജീവൻ പോകാനാണ് യോഗമെങ്കിൽ അത് അങ്ങനെയേ സംഭവിക്കൂ. "യദഭാവി ന തദ്ഭാവി ഭാവി ചേത് തദന്യഥാ."

കാര്യങ്ങൾ ഇങ്ങനെയൊക്കെയാണെങ്കിലും, ദീർഘദൂരം യാത്ര ചെയ്ത് ഇവിടെ കുമ്പളയിൽ വന്ന് പുതിയ ശത്രുക്കളെ ഉണ്ടാക്കാനും അവരോട് യുദ്ധം ചെയ്ത് തോൽപ്പിക്കാനും അവരുടെ തന്ത്രങ്ങൾ തുറന്നുകാട്ടാനും തനിക്കിഷ്ടമില്ലെന്ന് സെക്രട്ടറി പറയുന്നു. അനിവാര്യമെങ്കിൽ നിലനിൽപ്പിനായി ആരോടും യുദ്ധം ചെയ്യുന്നതിൽ മടിയില്ലെന്നും, ഒന്നും കാണാതെ കേൾക്കാതെ പ്രതികരിക്കാതെ ഓഫീസിൽ സെക്രട്ടറി ജോലിയിൽ തുടരുന്നതിനും താൽപ്പര്യമില്ലെന്നും അദ്ദേഹം വ്യക്തമാക്കി.

പ്രസിഡന്റും ഭരണസമിതിയംഗങ്ങളും സമ്മതം തരുകയാണെങ്കിൽ ഇന്ന് തന്നെ ലീവപേക്ഷ നൽകി അസിസ്റ്റന്റ് സെക്രട്ടറിക്ക് ചുമതല നൽകി പോകാനും താൻ തയ്യാറാണെന്ന് സെക്രട്ടറി അറിയിച്ചു.

സെക്രട്ടറിയായി തുടരുമ്പോൾ ഫയൽ നടപടിക്രമങ്ങൾ ഉറപ്പുവരുത്തി മാത്രമേ തനിക്ക് പ്രവർത്തിക്കാനാകൂ എന്നും, അല്ലാത്തപക്ഷം സ്വന്തം നിലനിൽപ്പിന്റെ ഭാഗമായി പ്രതിരോധിക്കേണ്ടി വരുമ്പോൾ കാര്യങ്ങൾ കൂടുതൽ സങ്കീർണ്ണമാകുമെന്നുമുള്ള വസ്തുത ബഹുമാനപ്പെട്ട ജനപ്രതിനിധികളുടെ ശ്രദ്ധയിൽപ്പെടുത്തുന്നതായും സെക്രട്ടറി കൂട്ടിച്ചേർത്തു.

ഈ വാർത്ത നിങ്ങളുടെ സുഹൃത്തുക്കളുമായി പങ്കുവെച്ച് അഭിപ്രായം അറിയിക്കുക.

Article Summary: Panchayat secretary demands action after intimidation over bus shelter project bill.

#KeralaNews #PanchayatSecretary #Kozhikode #BusShelter #Intimidation #LocalNews