ട്രെയിനുകളിൽ ഇനി 'വിത്തൗട്ട്' ചായയും കാപ്പിയും; നിർണായക ഉത്തരവിറക്കി പാലക്കാട് റെയിൽവേ ഡിവിഷൻ

കാസർകോട്: (KasargodVartha) റെയിൽവേ സ്റ്റേഷനുകളിലും ട്രെയിനുകളിലും ഇനി പഞ്ചസാരയില്ലാത്ത ചായയും കാപ്പിയും ('വിത്തൗട്ട്') നിർബന്ധമാക്കുന്നു. ഇതുസംബന്ധിച്ച് പാലക്കാട് റെയിൽവേ ഡിവിഷണൽ മാനേജർ കർശന നിർദേശം നൽകി. പഞ്ചസാരയില്ലാത്ത പാനീയങ്ങൾ ലഭ്യമാകുന്നില്ലെന്ന യാത്രക്കാരുടെ നിരന്തര പരാതിയുടെ അടിസ്ഥാനത്തിലാണ് പുതിയ നടപടി.

പരാതി ഫലം കണ്ടു

റെയിൽവേ സ്റ്റേഷനുകളിലെ ഭക്ഷണശാലകളിലും ട്രെയിനുകളിലെ കാറ്ററിങ് യൂണിറ്റുകളിലും പഞ്ചസാരയില്ലാത്ത ചായയും കാപ്പിയും നിർബന്ധമായും ലഭ്യമാക്കണമെന്നാവശ്യപ്പെട്ട് മനുഷ്യാവകാശ പ്രവർത്തകനായ നൗഷാദ് റെയിൽവേ അധികൃതർക്ക് നൽകിയ പരാതിയിലാണ് ഈ നിർണായക ഇടപെടൽ.

നിലവിൽ കേരളത്തിലെ പ്രധാന റെയിൽവേ സ്റ്റേഷനുകളിലും ട്രെയിനുകളിലും മുൻകൂട്ടി പഞ്ചസാര ചേർത്ത് തയ്യാറാക്കിവെക്കുന്ന ചായയും കാപ്പിയുമാണ് ഭൂരിഭാഗവും വിതരണം ചെയ്യുന്നത്.

ഇത് പ്രമേഹ രോഗികൾക്കും, ആരോഗ്യപരമായ കാരണങ്ങളാൽ പഞ്ചസാര ഒഴിവാക്കാൻ ആഗ്രഹിക്കുന്ന യാത്രക്കാർക്കും വലിയ ബുദ്ധിമുട്ടുണ്ടാക്കുന്നതായി പരാതിയിൽ ചൂണ്ടിക്കാട്ടിയിരുന്നു.

‘പ്രമേഹ ബാധിതരുടെ എണ്ണം വർദ്ധിച്ചുവരുന്ന സാഹചര്യത്തിൽ യാത്രക്കാർക്ക് അനുയോജ്യമായ പാനീയങ്ങൾ തെരഞ്ഞെടുക്കാനുള്ള സൗകര്യം ഉറപ്പാക്കേണ്ടതുണ്ട്.’ - എന്ന് റെയിൽവേയ്ക്ക് നൽകിയ പരാതിയിൽ വ്യക്തമാക്കിയിരുന്നു.

പഞ്ചസാര ഇനി പ്രത്യേക പാക്കറ്റിൽ

പാലക്കാട് റെയിൽവേ ഡിവിഷണൽ മാനേജറുടെ പുതിയ നിർദേശപ്രകാരം കാറ്ററിംഗ് യൂണിറ്റുകളിൽ ഇനി പഞ്ചസാരയില്ലാത്ത ചായയും കാപ്പിയും നിർബന്ധമായും ലഭ്യമാകും.

ഇതിനായി പഞ്ചസാര പ്രത്യേക പാക്കറ്റുകളിലായി യാത്രക്കാർക്ക് ആവശ്യാനുസരണം നൽകുന്ന രീതി ഉപയോഗപ്പെടുത്താനാണ് റെയിൽവേയുടെ തീരുമാനം.

കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താൻ മറക്കരുത്.

Article Summary: Palakkad Railway Division mandates sugar-free tea and coffee.

#IndianRailways #PalakkadDivision #SugarFreeTea #KeralaNews #MalayalamNews #RailwayUpdates #Kasaragod #AnjuNews