മികച്ച സേവനം: ക്രൈംബ്രാഞ്ച് എസ്പി പി ബാലകൃഷ്ണൻ നായർക്ക് രാഷ്ട്രപതിയുടെ പോലീസ് മെഡൽ

കാസർകോട്: (KasargodVartha) കണ്ണൂർ-കാസർകോട് ക്രൈംബ്രാഞ്ച് എസ്.പി. പി. ബാലകൃഷ്ണൻ നായർക്ക് രാഷ്ട്രപതിയുടെ വിശിഷ്ട സേവനത്തിനുള്ള പോലീസ് മെഡൽ ലഭിച്ചു. 2003-ൽ സബ് ഇൻസ്‌പെക്ടറായി പോലീസ് സേനയിൽ ചേർന്ന ബാലകൃഷ്ണൻ നായർക്ക് സേവനകാലയളവിലെ മികച്ച പ്രവർത്തനങ്ങൾ പരിഗണിച്ചാണ് ഈ ബഹുമതി.

പരിശീലനത്തിന് ശേഷം എറണാകുളം, കൊല്ലം, കണ്ണൂർ ജില്ലകളിൽ എസ്.ഐ. ആയി സേവനമനുഷ്ഠിച്ചു. തുടർന്ന് 2008-ൽ സർക്കിൾ ഇൻസ്പെക്ടറായി സ്ഥാനക്കയറ്റം ലഭിച്ച് വെള്ളരിക്കുണ്ട്, കണ്ണൂർ ടൗൺ, കണ്ണൂർ സിറ്റി, വളപട്ടണം, കാസർകോട് എന്നീ സർക്കിളുകളിലും വിജിലൻസിലും ജോലി ചെയ്തു. 

2017-ൽ ഡിവൈ.എസ്.പി. ആയി സ്റ്റേറ്റ് സ്‌പെഷ്യൽ ബ്രാഞ്ച്, കാസർകോട്, കാഞ്ഞങ്ങാട്, തളിപ്പറമ്പ്, കണ്ണൂർ ടൗൺ എന്നീ സബ് ഡിവിഷനുകളിലും സേവനമനുഷ്ഠിച്ചു. 2024 ജൂലൈ മുതൽ കാസർകോട് അഡിഷണൽ എസ്.പി. ആയി ജോലി ചെയ്തു വരവേ, 2025 ജൂണിൽ എസ്.പി.യായി സ്ഥാനക്കയറ്റം ലഭിച്ച് കണ്ണൂർ- കാസർകോട് ക്രൈംബ്രാഞ്ച് എസ്.പി.യായി ചുമതലയേറ്റു.

സർവീസിൽ ഇതുവരെ 3 ബാഡ്ജ് ഓഫ് ഓണറുകളും നൂറിലധികം ഗുഡ് സർവീസ് എൻട്രികളും 22 പ്രശംസാപത്രങ്ങളും ലഭിച്ചിട്ടുണ്ട്. 2018-ൽ വിശിഷ്ട സേവനത്തിനുള്ള മുഖ്യമന്ത്രിയുടെ പോലീസ് മെഡലും നേടി. വിജിലൻസിലെ മികച്ച സേവനത്തിന് 2016-ൽ ബാഡ്ജ് ഓഫ് ഓണർ ലഭിച്ചു. ഇന്റലിജൻസ് രംഗത്തെ മികച്ച പ്രവർത്തനങ്ങൾക്ക് 2017-ലും 2018-ലും തുടർച്ചയായി ബാഡ്ജ് ഓഫ് ഓണർ ലഭിച്ചു.

സേവന കാലയളവിൽ നിരവധി പ്രമാദമായ കേസുകൾക്ക് തുമ്പുണ്ടാക്കി. വെള്ളരിക്കുണ്ട് സർക്കിൾ ഇൻസ്‌പെക്ടറായിരിക്കെ ചിറ്റാരിക്കൽ, രാജപുരം, വെള്ളരിക്കുണ്ട് സ്റ്റേഷനുകളിൽ റിപ്പോർട്ട് ചെയ്ത 3 കൊലപാതകക്കേസുകളിൽ പ്രതികൾക്ക് ജീവപര്യന്തം തടവ് ശിക്ഷ വാങ്ങിക്കൊടുത്തു. കാസർകോട് ജില്ലയിൽ കഴിഞ്ഞ 30 വർഷത്തിനിടയിൽ റിപ്പോർട്ട് ചെയ്ത 11 വർഗീയ കൊലപാതകക്കേസുകളിൽ ആദ്യമായി പ്രതികളെ ശിക്ഷിച്ചത് ബാലകൃഷ്ണൻ നായർ അന്വേഷിച്ച കേസിലാണ്.

നിരവധി മോഷണക്കേസുകൾ തെളിയിച്ച അന്വേഷണ സംഘത്തിലും ഇദ്ദേഹം അംഗമായിരുന്നു. 2010-ൽ ബേക്കൽ പോലീസ് സ്റ്റേഷൻ പരിധിയിലെ മാരുതി ഫിനാൻസിൽ നിന്നും 111 പവൻ സ്വർണം കവർന്ന കേസിൽ കുപ്രസിദ്ധരായ കാലിയ റഫീഖ്, ടി.എച്ച്. റിയാസ്, ഗുജ്‌രി അമ്മി, അട്ടഗോളി ആസിഫ് എന്നിവരടങ്ങുന്ന സംഘത്തെ പിടികൂടിയത് ഇദ്ദേഹത്തിന്റെ നേതൃത്വത്തിലായിരുന്നു.

കണ്ണൂർ എ.സി.പി. ആയി ജോലി ചെയ്യുമ്പോൾ കണ്ണപുരം സ്റ്റേഷൻ പരിധിയിൽ ഒരു ദിവസം മൂന്ന് എ.ടി.എം. മെഷീനുകൾ കുത്തിത്തുറന്ന് ലക്ഷക്കണക്കിന് രൂപ കവർന്ന് ഹരിയാനയിലേക്ക് രക്ഷപ്പെട്ട സംഘത്തെ പിടികൂടിയ പ്രത്യേക അന്വേഷണ സംഘത്തിന്റെ തലവനായിരുന്നു ഇദ്ദേഹം. 

കേരളം, കർണാടക, തമിഴ്‌നാട് എന്നിവിടങ്ങളിൽ 75-ൽ അധികം മോഷണക്കേസുകളിൽ പ്രതിയായി 20 വർഷത്തോളം ഒളിവിൽ കഴിഞ്ഞ മടിക്കേരി ഇബ്രാഹിമിനെ പിടികൂടിയതും ബാലകൃഷ്ണൻ നായരുടെ നേതൃത്വത്തിലുള്ള സംഘമാണ്.

വിജിലൻസിൽ ജോലി ചെയ്യുമ്പോൾ ഉദ്യോഗസ്ഥ തലത്തിലെ അഴിമതികൾ കണ്ടെത്താൻ മുൻകൈയെടുത്തു. റോഡ് വർക്കുകളുമായി ബന്ധപ്പെട്ട് ഉദ്യോഗസ്ഥരും കരാറുകാരും തമ്മിലുള്ള അവിശുദ്ധ കൂട്ടുകെട്ട് ഇല്ലാതാക്കാൻ വിജിലൻസ് കേസ് രജിസ്റ്റർ ചെയ്ത് ശക്തമായ നടപടികൾ സ്വീകരിച്ചു. വിജിലൻസിലായിരിക്കെ അന്വേഷിച്ച ഒരു ട്രാപ്പ് കേസിൽ പ്രതികൾക്ക് ശിക്ഷ വാങ്ങി നൽകി.

കാസർകോട്, കാഞ്ഞങ്ങാട് ഡിവൈ.എസ്.പി.യായിരിക്കെ നിരവധി മയക്കുമരുന്ന് കേസുകൾ പിടികൂടുകയും പ്രതികളെ അറസ്റ്റ് ചെയ്യുകയും ചെയ്തു. കാഞ്ഞങ്ങാട് സബ് ഡിവിഷനിൽ ഏറ്റവും കൂടുതൽ ഹവാല പണം പിടികൂടിയതും ഇദ്ദേഹത്തിന്റെ കാലത്താണ്.

പോലീസും ജനങ്ങളും ഒന്നിച്ചുള്ള നിരവധി ജനമൈത്രി പ്രവർത്തനങ്ങൾക്കും ബാലകൃഷ്ണൻ നായർ നേതൃത്വം നൽകി. കാഞ്ഞങ്ങാട് ഡിവൈ.എസ്.പി.യായിരിക്കെ ഒരു ഗ്രാമത്തെ മുഴുവൻ ലഹരിമുക്തമാക്കാൻ ലക്ഷ്യമിട്ട് ‘ലഹരി മുക്ത കൊളവയൽ’ പദ്ധതിക്ക് തുടക്കമിട്ടു. ഈ പദ്ധതിക്ക് എക്സൈസ് വകുപ്പ് മന്ത്രിയുടെ പ്രത്യേക അഭിനന്ദനം ലഭിച്ചിട്ടുണ്ട്. 

കാസർകോട് അഡിഷണൽ എസ്.പി.യായിരിക്കെ സ്റ്റുഡന്റ് പോലീസ് കേഡറ്റ്, ഹോപ്പ് എന്നീ പദ്ധതികളിൽ കാസർകോട് ജില്ലയെ ഒന്നാം സ്ഥാനത്തെത്തിക്കുന്നതിൽ പ്രധാന പങ്ക് വഹിച്ചു. ഈ കാലയളവിലാണ് വയോജനങ്ങളുടെ പ്രശ്നങ്ങൾ പരിഹരിക്കാനുള്ള ‘വന്ദ്യജന സഭ’, യു.പി. സ്കൂളുകളിലെ കുട്ടികളെ വഴിതെറ്റുന്നത് തടയാനുള്ള ‘തണൽ’ എന്നീ സോഷ്യൽ പോലീസിങ് പദ്ധതികൾക്ക് തുടക്കമിട്ടത്.

ഉദുമ പാലക്കുന്ന് സ്വദേശിയായ ബാലകൃഷ്ണൻ നായർ, പരേതരായ മുങ്ങത്ത് നാരായൺ നായരുടെയും പേറയിൽ ലീലയുടെയും മകനാണ്. ഭാര്യ: നിഷ. മക്കൾ: ശിവദ, കാർത്തിക്.
 

പി ബാലകൃഷ്ണൻ നായർക്ക് ലഭിച്ച ബഹുമതിയെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: P Balakrishnan Nair, Kannur Crime Branch SP, receives the President's Police Medal for distinguished service.

#KeralaPolice #PoliceMedal #PBalakrishnanNair #CrimeBranch #DistinguishedService #Kannur