കാസ്രോട്ടാരുടെ ഉസാര്‍ക്കി മുന്തിരിയും കുസാല്‍കി ഓറഞ്ചും റണ ബിട്ട് അന്യജില്ലയിലേക്ക്

ഇന്‍സിമാം

ദുബൈ:  (www.kasargodvartha.com 05/07/2016) കാസര്‍കോട്ടെ യുവാക്കള്‍ പറഞ്ഞ് ഹിറ്റാക്കിയ ഉസാര്‍ക്കി മുന്തിരിയും, കുസാല്‍ക്കി ഓറഞ്ചും, റണ ബിട്ട കളിയും അന്യജില്ലയിലെ യുവാക്കളും ഏറ്റെടുക്കുന്നു. നേരത്തെ കാസര്‍കോട്ട് പുള്ളറെ കണ്ടിനാ... പാട്ട് ഹിറ്റായിരുന്നു. ഈ പാട്ട് അന്യജില്ലയും കടലും കടന്ന് സിനിമാ ഗാനമാക്കാന്‍ വരെ ആലോചനയുണ്ടായിരുന്നു.

കാസര്‍കോട്ടുകാരുടെ സ്വന്തമായ ഈ പാട്ട് അന്യജില്ലക്കാര്‍ പിന്നീട് ഏറ്റെടുത്തിരുന്നു. ഇതിനു പിന്നാലെ വന്ന 'ചൂടോടെ ചൂടോടെ' ഗാനങ്ങളും കാസര്‍കോട്ടും മറ്റു ജില്ലകളിലും വൈറലായി മാറിയിരുന്നു. ഏറ്റവും ഒടുവിലാണ് ഉസാര്‍കി മുന്തിരിയും കുസാല്‍ക്കി ഓറഞ്ചും റണ ബിട്ട കളിയുമായി കാസ്രോട്ടാര്‍ വീണ്ടും രംഗത്ത് വന്നത്.

സംഭവം ട്രോളര്‍മാരും ഏറ്റെടുത്തതോടെ ഇപ്പോള്‍ ഈ വാക്കുകള്‍ കടല്‍ കടന്നും പ്രചരിക്കുകയാണ്. ഒരു കാര്യത്തെ സൂപ്പറായിട്ടുണ്ട് എന്ന് പറയാനും അതിരുവിട്ട് കളി വേണ്ടെന്നും പറയാനാണ് ഇത്തരം വാക്കുകള്‍ കാസ്രോട്ടെ യുവാക്കള്‍ ഉപയോഗിക്കുന്നത്. ഇപ്പോള്‍ കാസര്‍കോട്ടെ ഏതാണ്ട് എല്ലാവരും പോ മോനെ ദിനേശാ എന്ന ലാലേട്ടന്റെ ഹിറ്റ് ഡയലോഗ് പോലെ ഉസാര്‍ക്കി മുന്തിരിയും കുസാല്‍ക്കി ഓറഞ്ചും ഡയലോഗാക്കിയിരിക്കുകയാണ്. വാട്‌സ്ആപ്പിലെ ഇമോജിയിലുള്ള മുന്തിരിയും ഓറഞ്ചും ഇതോടെ ജനപ്രിയമായിരിക്കുകയാണ്.