മിനി കൂപ്പർ ഓടിച്ചത് 150 കിലോമീറ്റർ വേഗതയിൽ; 19-കാരന് മദ്യം നൽകിയ 3 ബാറുകൾക്കെതിരെ കേസ്, കൂടെയുണ്ടായിരുന്ന സുഹൃത്തുക്കളും അറസ്റ്റിൽ

കൊച്ചി: (KasargodVartha) നെടുമ്പാശ്ശേരിയിൽ മിനി കൂപ്പറിടിച്ച് മൂന്ന് പേർ മരിച്ച വാഹനാപകടത്തിൽ, പ്രതിയായ 19-കാരന് നിയമവിരുദ്ധമായി മദ്യം നൽകിയ മൂന്ന് ബാറുകൾക്കെതിരെ നടപടിയുമായി എക്സൈസ്. അപകടമുണ്ടാക്കിയ സുഹൈൽ സജീവ് (19) മദ്യപിച്ച ബാറുകൾക്കെതിരെയാണ് കേസ്.

നെടുമ്പാശ്ശേരിയിലെ കോർട്ട് യാർഡ് ബൈ മാരിയറ്റ് ബാർ ഹോട്ടലിനെതിരെയാണ് ആദ്യം കേസെടുത്തത്. ഇതിനുപിന്നാലെ വൈറ്റില എസ്.എ. റോഡിലെ ദയ ബാർ, പാലാരിവട്ടത്തെ മൺസൂൺ എംപ്രസ് എന്നിവർക്കെതിരെയും എക്സൈസ് കേസെടുത്തിട്ടുണ്ട്. ഈ മൂന്ന് ബാറുകളിലും പ്രതി എത്തുന്നതും മദ്യപിച്ചതും സിസിടിവി ദൃശ്യങ്ങളിൽ വ്യക്തമാണെന്ന് എക്സൈസ് സ്ഥിരീകരിച്ചു. ഈ ബാറുകളുടെ ലൈസൻസ് പൂർണമായും റദ്ദാക്കുന്ന കാര്യവും പരിഗണനയിലാണ്.

സുഹൃത്തുക്കളും അറസ്റ്റിൽ

അതേസമയം, അപകട സമയത്ത് പ്രതി സുഹൈലിനൊപ്പം കാറിലുണ്ടായിരുന്ന സുഹൃത്തുക്കളെയും നെടുമ്പാശ്ശേരി പൊലീസ് അറസ്റ്റ് ചെയ്തിട്ടുണ്ട്. അമീർ, ജോയൽ എന്നിവരെ പൊലീസ് പിന്നീട് കസ്റ്റഡിയിലെടുത്തു. മറ്റൊരു സുഹൃത്തായ നിനവിനെ കഴിഞ്ഞദിവസം തന്നെ അറസ്റ്റ് ചെയ്തിരുന്നു. ഇതോടെ കാറിലുണ്ടായിരുന്ന നാലുപേരും പിടിയിലായി. പ്രതി മദ്യപിക്കുന്നതിൻ്റെ വീഡിയോ സുഹൃത്തുക്കൾ മൊബൈലിൽ ചിത്രീകരിച്ചിരുന്നു. ഇവരെ തിങ്കളാഴ്ച കോടതിയിൽ ഹാജരാക്കും.

കാർ ഓടിച്ചത് 150 കിലോമീറ്റർ വേഗതയിൽ

അപകടത്തിനിടയാക്കിയ കാർ ഓടിച്ചത് 120 മുതൽ 150 കിലോമീറ്ററിലധികം വേഗതയിലാണെന്ന് റിമാൻഡിലുള്ള പ്രതി സുഹൈൽ പൊലീസിന് മൊഴി നൽകി. അപകട സമയത്തെ കൃത്യമായ വേഗതയറിയാൻ മിനി കൂപ്പർ സർവീസ് സെൻ്ററിലെ വിദഗ്ധർ വാഹനത്തിൽ പരിശോധന നടത്തും. പ്രതിയായ സുഹൈലിൻ്റെ ഡ്രൈവിങ് ലൈസൻസ് സസ്പെൻഡ് ചെയ്യാനുള്ള നടപടികൾ മോട്ടോർ വാഹന വകുപ്പ് ആരംഭിച്ചിട്ടുണ്ട്. പൊലീസിൻ്റെ റിപ്പോർട്ട് ലഭിച്ചാലുടൻ ഈ നടപടികളിലേക്ക് കടക്കും.

വിമാനത്താവളത്തിൽ എത്തുന്ന സുഹൃത്തിനെ കൂട്ടിക്കൊണ്ടുപോകാനായാണ് ശനിയാഴ്ച (2026 ഒക്ടോബർ 10) ഉച്ചയ്ക്ക് ശേഷം പ്രതികൾ യാത്ര തിരിച്ചത്. വിമാനം എത്തുന്ന സമയം 2.40 ആയതിനാൽ ഉച്ചയ്ക്ക് വൈറ്റിലയിലെ ദയാ ബാറിൽ നിന്നും, വൈകിട്ട് പാലാരിവട്ടത്തെ മൺസൂൺ എംപ്രസിൽ നിന്നും, രാത്രി നെടുമ്പാശ്ശേരിയിലെ കോർട്ട് യാർഡ് ബൈ മാരിയറ്റിൽ നിന്നും ഇവർ തുടർച്ചയായി മദ്യപിക്കുകയായിരുന്നു.

മരിച്ചത് 3 പേർ

ഞായറാഴ്ച) (2026 ഒക്ടോബർ 11) പുലർച്ചെ രണ്ട് മണിയോടെ അത്താണി എയർപോർട്ട് സിഗ്നൽ കവലയ്ക്ക് സമീപമായിരുന്നു അപകടം. മദ്യലഹരിയിൽ സുഹൈൽ സജീവ് അമിതവേഗതയിൽ ഓടിച്ച മിനി കൂപ്പർ കാർ മൂന്നുപേർ സഞ്ചരിച്ചിരുന്ന സ്കൂട്ടറിൽ ഇടിക്കുകയായിരുന്നു.

തൃക്കാക്കരയിലെ ഒരു കരകൗശല വിൽപ്പനശാലയിൽ പാർട്ട് ടൈം ജോലി ചെയ്യുന്നവരായിരുന്നു സ്കൂട്ടറിലുണ്ടായിരുന്ന മൂന്ന് പേരും. സഹപ്രവർത്തകർക്കൊപ്പം രാത്രിയിൽ ചായ കുടിച്ച് മടങ്ങിവരവെയാണ് അപകടം സംഭവിച്ചത്. 

അപകടത്തിൽ മരിച്ചവർ:

● കെ.വി. ദേവിക (21) - വയനാട് കൽപ്പറ്റ മടക്കിമല സന്തോഷ് ഭവൻ

● എം.പി. ഗോപിക (22) - പാലക്കാട് മണ്ണാർക്കാട് കരിമ്പ ഇടക്കുറിശ്ശി നീലാറ്റ മുള്ളൻകുഴിയിൽ

● മുഹമ്മദ് ഇയാസ് (22) - കർണാടക സുള്ള്യ കനകമജലു സുണ്ണമൂല പെൽത്തടുക്ക

പ്രതി സുഹൈലിനെതിരെ മനഃപൂർവമല്ലാത്ത നരഹത്യക്കാണ് പൊലീസ് നിലവിൽ കേസെടുത്തിട്ടുള്ളത്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: The Excise Department registered cases against three Kochi bars (Courtyard by Marriott, Daya, Monsoon Empress) for serving alcohol to 19-year-old Suhail Sajeev, who caused a fatal Mini Cooper crash in Nedumbassery. Three of his friends were also arrested, and steps are underway to suspend his driving license.

#KasargodVartha #KochiNews #NedumbasseryAccident #KeralaPolice #ExciseDepartment #DrunkDriving #MVD #ErnakulamNews #MalayalamNews #AparnaNews