N A Nellikkunnu | 'ശസ്ത്രക്രിയക്ക് വിധേയനായത് അടുത്തിടെ, ആശുപത്രിയിലേക്ക് കൊണ്ടുപോയത് കൈവിലങ്ങണിയിച്ച്'; ഗോൾഡൻ റഹ്‌മാനോട് പൊലീസ് കാട്ടിയത് വലിയ ക്രൂരതയെന്ന് എൻ എ നെല്ലിക്കുന്ന് എംഎൽഎ; ജയിലിലടച്ച സംഭവം പ്രതിഷേധാർഹമെന്ന് കെഎംസിസി

ചില സംഘടനകളോടും ആ സംഘടനകളിലെ ചില നേതാക്കളോടും ചില പൊലീസുകാരുടെ ഉള്ളിലെ വികാരം എന്താണെന്ന് ഈ സംഭവം വ്യക്തമാക്കുന്നു. ഇത് ജനമൈത്രി പൊലീസിന് പറ്റിയ പണിയാണോ എന്ന് ഇതിനെല്ലാം കൂട്ടുനിൽക്കുന്ന പൊലീസ് സേനയിലെ കറുത്ത ചെമ്മരിയാടുകൾ ചിന്തിച്ചാൽ മതി. എല്ലാവർക്കും ക്ഷമയുണ്ട്, എല്ലാവർക്കും വികാരവുമുണ്ട്. അത് പരസ്പരം പരീക്ഷിക്കാതിരിക്കലാണ് നല്ലതെന്നും നാട്ടിൽ ക്രമസമാധാനം ഉറപ്പുവരുത്താനും ഭീകരാന്തരീക്ഷം ഇല്ലാതാക്കാനും പൊലീസിനേക്കാൾ ഉത്തരവാദിത്തം ജനപ്രതിനിധികൾക്കുണ്ടെന്നും ആ ഉത്തരവാദിത്തമാണ് ജില്ലാ പഞ്ചായത് അംഗം നിർവഹിച്ചതെന്നും എംഎൽഎ പറഞ്ഞു.

മഞ്ചേശ്വരം സർകിൾ ഇൻസ്പെക്ടർ പറഞ്ഞത് ഗോൾഡൻ റഹ്‌മാനെ പൊലീസുകാർക്ക് നന്നായി അറിയാമെന്നും, ചൊവ്വാഴ്ച തന്നെ 100% ജാമ്യം കിട്ടുമെന്നുമായിരുന്നു. ചൊവ്വാഴ്ച ജാമ്യം കിട്ടിയില്ലായെന്ന് മാത്രമല്ല ഫോണിൽ ബന്ധപ്പെടാൻ ശ്രമിച്ചപ്പോഴെല്ലാം സിഐ ഫോൺ എടുത്തതുമില്ല. ഔദ്യോഗിക കൃത്യനിർവഹണം തടസപ്പെടുത്തി എന്ന കുറ്റം ചുമത്തി ഒരാളെ കോടതിയിൽ ഹാജരാക്കിയാൽ അന്നുതന്നെ ജാമ്യം കിട്ടുമോ എന്ന് പരീക്ഷിക്കാനായിരുന്നു പൊലീസിന്റെ ഈ നാടകം. സാമൂഹിക പ്രതിബദ്ധതയോടെ പ്രവർത്തിക്കുന്ന ഒരു യുവനേതാവിനെ പൊലീസ് ഒരിക്കലും ഒരു പരീക്ഷണ വസ്തുവാക്കാൻ പാടില്ലായിരുന്നുവെന്നും എൻ എ നെല്ലിക്കുന്ന് കൂട്ടിച്ചേർത്തു.