Death | കാലം കവർന്ന ഇതിഹാസം; എം ടി വാസുദേവൻ നായർക്ക് വൈകീട്ട് കേരളം വിട നൽകും

കോഴിക്കോട്: (KasargodVartha) മലയാള സാഹിത്യത്തിലെ ഇതിഹാസവും, സർഗാത്മകതയുടെ പര്യായവുമായ എം ടി വാസുദേവൻ നായരുടെ (91) വിയോഗത്തോടെ തിരശ്ശീല വീണത് മലയാള സാഹിത്യത്തിലെ സുവർണ അധ്യായത്തിന്. വാർധക്യ സഹജമായ അസുഖങ്ങളെ തുടർന്ന് കോഴിക്കോട്ടെ ആശുപത്രിയിൽ ചികിത്സയിലിരിക്കെ ബുധനാഴ്ച രാത്രി പത്തുമണിയോടെയായിരുന്നു അന്ത്യം. എംടിയുടെ വിയോഗം കേരളത്തിന് മാത്രമല്ല, ഇൻഡ്യൻ സാഹിത്യത്തിന് തന്നെ തീരാനഷ്ടമാണ്. 

സമൂഹത്തിന്റെ നാനാതുറകളിൽപ്പെട്ട അനവധി ആളുകൾ അന്ത്യാഞ്ജലി അർപ്പിക്കാനായി അദ്ദേഹത്തിന്റെ വസതിയായ സിതാരയിലേക്ക് ഒഴുകിയെത്തുകയാണ്. മുഖ്യമന്ത്രിയും മറ്റ് മന്ത്രിമാരും, രാഷ്ട്രീയ നേതാക്കളും, സാംസ്കാരിക പ്രവർത്തകരും, സിനിമാ താരങ്ങളും, സാധാരണക്കാരുമെല്ലാം ആദരാഞ്ജലികൾ അർപ്പിക്കാനായി എത്തിച്ചേരുന്നുണ്ട്. എംടിയുടെ അന്ത്യാഭിലാഷം മാനിച്ച് പൊതുദർശനം ലളിതവും, ഗതാഗത തടസ്സങ്ങൾ ഒഴിവാക്കിയും ക്രമീകരിച്ചിരുന്നു. വ്യാഴാഴ്ച വൈകീട്ട് അഞ്ച്  മണിക്ക് മാവൂർ റോഡിലെ 'സ്മൃതിപഥം' ശ്മശാനത്തിൽ ഔദ്യോഗിക ബഹുമതികളോടെ സംസ്കാരം നടക്കും.

1933 ജൂലൈ 15ന് പൊന്നാനി താലൂകിലെ കൂടല്ലൂരിൽ ജനിച്ച എം ടി, തന്റെ ലളിതമായ ഭാഷയിലൂടെയും, ഗ്രാമീണ പശ്ചാത്തലത്തിലൂടെയും, ശക്തമായ കഥാപാത്രങ്ങളിലൂടെയും മലയാളികളുടെ ഹൃദയത്തിൽ ചിരപ്രതിഷ്ഠ നേടി. മലമക്കാവ് എലിമെന്ററി സ്കൂൾ, കുമരനെല്ലൂർ ഹൈസ്‌കൂൾ എന്നിവിടങ്ങളിലെ പ്രാഥമിക വിദ്യാഭ്യാസത്തിനുശേഷം പാലക്കാട് വിക്ടോറിയ കോളജിൽ നിന്ന് രസതന്ത്രത്തിൽ ബിരുദം നേടിയ അദ്ദേഹം, കുറച്ചുകാലം അധ്യാപകനായും പിന്നീട് മാതൃഭൂമിയിൽ പത്രാധിപരായും പ്രവർത്തിച്ചു.

'നാലുകെട്ട്', 'കാലം', 'അസുരവിത്ത്', 'രണ്ടാമൂഴം', 'മഞ്ഞ്' തുടങ്ങി നിരവധി നോവലുകളും, ചെറുകഥകളും, തിരക്കഥകളും അദ്ദേഹത്തിന്റെ തൂലികയിൽ വിരിഞ്ഞ അനശ്വര സൃഷ്ടികളാണ്. 'രണ്ടാമൂഴം' എന്ന നോവൽ ഭീമന്റെ കാഴ്ചപ്പാടിലൂടെ മഹാഭാരതത്തെ പുനരാഖ്യാനം ചെയ്ത കൃതിയാണ്. ഇത് എംടിയുടെ മാസ്റ്റർപീസായി കണക്കാക്കപ്പെടുന്നു. സാഹിത്യ രംഗത്ത് മാത്രമല്ല, സിനിമയിലും എം ടി തന്റെ കയ്യൊപ്പ് പതിപ്പിച്ചു. 'മുറപ്പെണ്ണ്' എന്ന സിനിമയ്ക്ക് തിരക്കഥ എഴുതിയാണ് അദ്ദേഹം സിനിമയിലേക്ക് കടന്നുവരുന്നത്. തുടർന്ന് നിരവധി സിനിമകൾക്ക് തിരക്കഥ എഴുതുകയും, ചില സിനിമകൾ സംവിധാനം ചെയ്യുകയും ചെയ്തു. 'നിർമാല്യം' എന്ന അദ്ദേഹം ആദ്യമായി സംവിധാനം ചെയ്ത ചിത്രം ദേശീയ പുരസ്കാരം നേടി.

എംടിയുടെ സാഹിത്യ സംഭാവനകൾക്ക് രാജ്യം പത്മഭൂഷൺ നൽകി ആദരിച്ചു. 1995-ൽ ജ്ഞാനപീഠ പുരസ്കാരവും അദ്ദേഹത്തിന് ലഭിച്ചു. കൂടാതെ കേന്ദ്ര സാഹിത്യ അകാഡമി അവാർഡ്, കേരള സാഹിത്യ അകാഡമി അവാർഡ്, വയലാർ അവാർഡ് തുടങ്ങി നിരവധി പുരസ്കാരങ്ങൾ അദ്ദേഹത്തെ തേടിയെത്തി. കോഴിക്കോട്, മഹാത്മാഗാന്ധി സർവകലാശാലകൾ ഡി.ലിറ്റ് നൽകി ആദരിച്ചു.

എംടിയുടെ വിയോഗത്തിൽ സംസ്ഥാന സർകാർ രണ്ട് ദിവസത്തെ ദുഃഖാചരണം പ്രഖ്യാപിച്ചിട്ടുണ്ട്. അദ്ദേഹത്തിന്റെ അന്ത്യം ഒരു യുഗത്തിന്റെ അവസാനമാണ്. മലയാള സാഹിത്യത്തിനും സംസ്കാരത്തിനും അദ്ദേഹം നൽകിയ സംഭാവനകൾ എന്നും സ്മരിക്കപ്പെടും. കാലം എത്ര കഴിഞ്ഞാലും എം ടി എന്ന രണ്ടക്ഷരം മലയാളികളുടെ മനസ്സിൽ മായാതെ നിലനിൽക്കും.

 #MTVasudevanNair, #MalayalamLiterature, #IndianAuthors, #JnanpithAward, #MTLegacy, #RIPMTVasudevan