ദേശീയപാതയിലെ 101 പ്രശ്നങ്ങൾക്ക് പരിഹാരം കാണാൻ കളക്ടറുടെ അടിയന്തര ഇടപെടൽ

കാസർകോട്: (KasargodVartha) കാലവർഷത്തെ മുന്നിൽ കണ്ട് ദേശീയപാതയിലെ വെള്ളക്കെട്ടും അനുബന്ധ ബുദ്ധിമുട്ടുകളും ഒഴിവാക്കാൻ ജില്ലാ ഭരണകൂടം ഊർജിത നടപടികൾ സ്വീകരിക്കുന്നു. ജില്ലാ കളക്ടർ കെ. ഇമ്പശേഖരന്റെ നേതൃത്വത്തിൽ വിവിധ വകുപ്പ് ഉദ്യോഗസ്ഥർ സംയുക്ത പരിശോധന നടത്തി.

പ്രശ്നങ്ങൾ വിലയിരുത്തി പരിഹാരങ്ങൾ നിർദ്ദേശിക്കുന്നതിനായി ജില്ലാതല കണ്ടിജൻസി പ്ലാൻ തയ്യാറാക്കിയിട്ടുണ്ട്. ജനപ്രതിനിധികൾ ഉന്നയിച്ച വിഷയങ്ങൾ കൂടി പരിഗണിച്ച് ഉദ്യോഗസ്ഥർ വീണ്ടും സ്ഥലപരിശോധന നടത്തി. നിലവിൽ ദേശീയപാതയിൽ 101 പ്രശ്നങ്ങൾ കണ്ടെത്തി. ഈ പ്രശ്നങ്ങൾ ഗൂഗിൾ ഷീറ്റിൽ രേഖപ്പെടുത്തി ബന്ധപ്പെട്ട ഉദ്യോഗസ്ഥർക്ക് നിർദ്ദേശങ്ങൾ നൽകി.

ഓരോ പ്രശ്നത്തിന്റെയും ഇപ്പോഴത്തെ സ്ഥിതി പൂർണ്ണമായി പരിഹരിച്ചത്, ഭാഗികമായി പരിഹരിച്ചത്, പരിഹരിക്കാൻ ബാക്കിയുള്ളത് എന്നിങ്ങനെ മൂന്ന് വിഭാഗങ്ങളായി രേഖപ്പെടുത്തുന്നു. ഡെപ്യൂട്ടി കളക്ടർ (എൽ.എ) എം. റമീസ് രാജ, ഡെപ്യൂട്ടി കളക്ടർ (എൽ.എ എൻ.എച്ച്) എസ്. ബിജു എന്നിവർ വിദഗ്ധ സമിതിക്ക് നേതൃത്വം നൽകുന്നു.

ഹോസ്ദുർഗ്, കാസർകോട്, മഞ്ചേശ്വരം തഹസിൽദാർമാർക്കാണ് ഫീൽഡിന്റെ ചുമതല. തഹസിൽദാർമാർ ആവശ്യമായ സഹായികളെ ഉൾപ്പെടുത്തി സ്ക്വാഡുകൾ രൂപീകരിച്ചു. വിദഗ്ധരടങ്ങുന്ന ഈ സ്ക്വാഡ് എല്ലാ സ്ഥലങ്ങളിലും പരിശോധന നടത്തുകയും പ്രശ്നങ്ങൾക്ക് വേഗത്തിൽ പരിഹാരം കാണാനുള്ള നടപടികൾ എടുക്കുകയും ചെയ്യുന്നു.

ഇതുവരെ 10 പ്രശ്നങ്ങൾ പൂർണ്ണമായും പരിഹരിച്ചു. 13 പ്രശ്നങ്ങൾ ഭാഗികമായി പരിഹരിച്ചിട്ടുണ്ട്. രണ്ടു ദിവസത്തിനകം എല്ലാ പ്രശ്നങ്ങൾക്കും കൃത്യമായ പരിഹാരം കാണണമെന്ന് കളക്ടർ നിർദ്ദേശം നൽകി.

കാര്യങ്കോട് വേളുവയൽ പാലത്തിന്റെ രണ്ട് സ്പാനുകൾക്കിടയിലെ മണ്ണ് നീക്കം ചെയ്തു. ബാക്കിയുള്ള മണ്ണ് നീക്കം ചെയ്യുന്ന പ്രവൃത്തി പുരോഗമിക്കുന്നു. കൂടാതെ ഡ്രെയിനേജ് നിർമ്മാണവും ആരംഭിച്ചു. പ്രവൃത്തി ശനിയാഴ്ചയോടെ പൂർത്തിയാക്കുമെന്ന് കരാർ കമ്പനി അറിയിച്ചു.

ജില്ലയിൽ മണ്ണിടിച്ചിൽ സാധ്യതയുള്ള വീരമലക്കുന്ന്, മട്ടലായിക്കുന്ന്, ബേവിഞ്ച, ചട്ടഞ്ചാൽ പ്രദേശങ്ങളിലെ സ്ഥിതിഗതികൾ സൂക്ഷ്മമായി നിരീക്ഷിക്കുന്നു. ബേവിഞ്ചയിൽ ദേശീയപാതയ്ക്ക് സമീപം 150 കുടുംബങ്ങൾ താമസിക്കുന്നു. വീരമലക്കുന്നിന്റെ പരിസരത്ത് ഒരു ഹോട്ടലും പത്ത് വീടുകളും മട്ടലായിക്കുന്നിന്റെ പരിസരത്ത് 15 കുടുംബങ്ങളുമുണ്ട്.

ആവശ്യമെങ്കിൽ ഇവരെ മാറ്റിപ്പാർപ്പിക്കാനുള്ള സൗകര്യങ്ങൾ ഒരുക്കിയിട്ടുണ്ട്. ഗതാഗത നിയന്ത്രണ സംവിധാനവും മുൻകൂട്ടി നിശ്ചയിച്ചിട്ടുണ്ട്. മട്ടലായിക്കുന്നിലെ ഇലക്ട്രിക് ലൈൻ സംബന്ധിച്ച വിഷയം കെ.എസ്.ഇ.ബി പരിഗണിക്കുന്നു.

നാളെ (മെയ് 24ന്) ജില്ലാ കളക്ടറുടെ അധ്യക്ഷതയിൽ കാലവർഷവുമായി ബന്ധപ്പെട്ട മറ്റ് വിഷയങ്ങൾ ചർച്ച ചെയ്യാൻ ജില്ലയിലെ മുഴുവൻ തദ്ദേശ സ്ഥാപനങ്ങളിലെയും ജനപ്രതിധികളുടെയും സെക്രട്ടറിമാരുടെയും യോഗം ചേരും.

കാലിക്കടവ് മുതൽ മഞ്ചേശ്വരം വരെ ദേശീയപാത നിർമ്മാണ പ്രദേശങ്ങൾ സന്ദർശിച്ച് വിദഗ്ധ സമിതി തയ്യാറാക്കിയ റിപ്പോർട്ട് ജില്ലാ കളക്ടർക്ക് സമർപ്പിച്ചു. ഓവുചാലുകൾ ഇല്ലാത്തതും നിർമ്മിച്ച ഓവുചാലുകൾ തടസ്സപ്പെട്ടതും കുത്തനെയുള്ള മണ്ണെടുപ്പും പ്രശ്നങ്ങൾ സൃഷ്ടിക്കുന്നതായാണ് പ്രാഥമിക വിലയിരുത്തൽ.

ഈ വാർത്തയെക്കുറിച്ച് നിങ്ങളുടെ അഭിപ്രായങ്ങൾ കമന്റ് ചെയ്യുക. സുഹൃത്തുക്കളുമായി പങ്കുവെക്കുക.

Summary: Kasaragod district administration is taking urgent steps to address potential waterlogging on national highways ahead of the monsoon. 101 issues have been identified, with 10 fully and 13 partially resolved. A contingency plan and expert squads are in place.
 

#MonsoonPreparedness, #NationalHighway, #Kasaragod, #Waterlogging, #KeralaFloods, #DistrictAdministration