കെ റെയിൽ: അലൈന്റ്മെന്റിൽ മാലിക് ദീനാർ മസ്‌ജിദും ഖബർസ്ഥാനും മറ്റുസ്ഥാപനങ്ങളും; ഒഴിവാക്കണമെന്ന ആവശ്യം ശക്തം; പ്രക്ഷോഭങ്ങൾ ചർച ചെയ്യാൻ തിങ്കളാഴ്ച യോഗം; നെല്ലിക്കുന്നിൽ യുഡിഎഫ് ജനകീയ സദസ് നടത്തി

തളങ്കര: (www.kasargodvartha.com 03.04.2022) സംസ്ഥാന സർകാരിന്റെ സ്വപ്‍ന പദ്ധതിയായ കെ റെയിലിന്റെ അലൈന്റ്മെന്റിൽ ചരിത്ര പ്രസിദ്ധമായ മാലിക് ദീനാർ മസ്‌ജിദും ഖബർസ്ഥാനും മറ്റുസ്ഥാപനങ്ങളും ഉൾപെട്ടതിൽ ആശങ്ക. മാലിക് ദീനാർ മസ്‌ജിദ്‌ കോംപൗൻഡ് പദ്ധതിക്ക് വേണ്ടി ഏറ്റെടുക്കേണ്ടി വരുമെന്നാണ് അലൈൻമെൻ്റ് നൽകുന്ന സൂചനയെന്ന് ബന്ധപ്പെട്ടവർ പറയുന്നു. തളങ്കരയിലെ ജനവാസ കേന്ദ്രങ്ങളിലൂടെയാണ് പദ്ധതി നടപ്പിൽ വരുന്നതെന്ന ആശങ്കയും പ്രദേശ വാസികൾ പ്രകടിപ്പിക്കുന്നു.
                
17 വിലേജുകളില്‍ നിന്നായി 161.26 ഹെക്ടർ ഭൂമിയാണ് കാസർകോട് ജില്ലയിൽ നിന്ന് പദ്ധതിക്കായി ഏറ്റെടുക്കേണ്ടത്. ഇതിൽ അലൈൻമെൻ്റ് പ്രകാരം കാസർകോട് നഗരസഭയിലെ നെല്ലിക്കുന്ന്, തളങ്കര പടിഞ്ഞാർ, ദീനാർ നഗർ, നെച്ചിപടുപ്പ്, പുഴക്കര കുണ്ടിൽ, തായലങ്ങാടി, പള്ളം, ചേരങ്കൈ കടപ്പുറം ഭാഗങ്ങളിൽ സ്ഥലം ഏറ്റെടുക്കേണ്ടി വരികയും നിരവധി വീടുകളും വ്യാപാര സ്ഥാപനങ്ങളും ഒഴിപ്പിക്കേണ്ടി വരുന്ന അവസ്ഥയുമുണ്ടാവും.

മാലിക് ദീനാർ മസ്‌ജിദും യതീംഖാനയും ഖബർസ്ഥാനും മഹല്ലും മഹല്ലുകളിലെ വീടും മറ്റു ആരാധനാലയങ്ങളും അലൈന്മെന്റിൽ നിന്ന് ഒഴിവാക്കണമെന്നാണ് മസ്‌ജിദ്‌ കമിറ്റിയുടെ ആവശ്യം. ഇതിനായി പ്രക്ഷോഭങ്ങൾ ആരംഭിക്കുന്നത് സംബന്ധിച്ച് ചർച ചെയ്യുന്നതിന് മാലിക് ദീനാർ പള്ളി കൗൺസിൽ അംഗങ്ങളുടെയും ദഖീറത് ഉഖ്റാ സംഘത്തിൻ്റെയും സംയുക്ത യോഗം തിങ്കളാഴ്ച രാവിലെ 10.30 ന് മസ്‌ജിദ്‌ കമിറ്റി ഹോളിൽ ചേരുന്നുണ്ട്. ഇതിൽ നിർണായക തീരുമാനങ്ങൾ ഉണ്ടാകുമെന്നാണ് അറിയുന്നത്.

നെല്ലിക്കുന്നിൽ യുഡിഎഫ് ജനകീയ സദസ് നടത്തി

കാസർകോട്: കെ റെയിൽ പദ്ധതി ഒരിക്കലും പ്രാവർത്തികമാകാൻ അനുവദിക്കില്ലെന്നും നിരവധി പേരെ വഴിയാധാരമാക്കി കല്ലിടലുമായി മുന്നോട്ട് പോയാൽ ജനങ്ങളെ അണിനിരത്തി പ്രതിരോധം തീർക്കുമെന്നും യുഡിഎഫ് കാസർകോട് മണ്ഡലം കമിറ്റി മുന്നറിയിപ്പ് നൽകി. നെല്ലിക്കുന്ന് കടപ്പുറം പാലത്തിന് സമീപം നടത്തിയ ജനകീയ സദസ് യുഡിഎഫ് ജില്ലാ ചെയർമാൻ സി ടി അഹ്‌മദ്‌ അലി ഉദ്ഘാടനം ചെയ്തു. മണ്ഡലം ചെയർമാൻ എ എം കടവത്ത് അധ്യക്ഷത വഹിച്ചു.