മൈലാഞ്ചി സീസണ്‍ 2 മാപ്പിളപ്പാട്ടില്‍ ഉളിയത്തടുക്കയിലെ നവാസിന് വിജയകിരീടം

അബൂദാബി: ഏഷ്യാനെറ്റ് മൈലാഞ്ചി സീസണ്‍ 2 മാപ്പിളപ്പാട്ട് റിയാലിറ്റി ഷോ മത്സരത്തില്‍ ഉളിയത്തടുക്കയിലെ നവാസ് വിജയ കിരീടം ചൂടി. വെള്ളിയാഴ്ച അബൂദാബിയില്‍ നടന്ന ഫൈനല്‍ മത്സരത്തില്‍ അക്ബര്‍ തൃശൂര്‍, റിജിയ എറണാകുളം, അല്‍സാബിത്ത് തൃശൂര്‍, കീര്‍ത്തന സൗദി അറേബ്യ എന്നിവരെ പിന്തള്ളിക്കൊണ്ടാണ് നവാസ് വിജയകിരീടം ചൂടിയത്. ഉളിയത്തടുക്കയിലെ സലാം-ബീഫാത്വിമ ദമ്പതികളുടെ മകനായ നവാസ് ചെറുപ്പത്തിലേ സംഗീത പരിപാടികളിലും മാപ്പിളപ്പാട്ട് പ്രോഗ്രാമുകളിലും പങ്കെടുത്ത് കാസര്‍കോട്ട് ഏറെ പ്രശസ്തനാണ്.

മത്സരത്തിൽ തൃശൂരില്‍ നിന്നുള്ള അക്ബര്‍, അല്‍സാബിത്ത് എന്നിവര്‍ രണ്ടും, മൂന്നും സ്ഥാനവും സൗദി അറേബ്യയിലെ കീര്‍ത്തന നാലാം സ്ഥാനവും നേടി.

കാസര്‍കോട്ടുകാരായ നിരവധി പ്രവാസികളാണ് നവാസിന്റെ മത്സരം കാണാന്‍ അബൂദാബിയിലെത്തിയത്. നടന്‍ സിദ്ദീഖ്, മന്ത്രി എം.കെ. മുനീര്‍ തുടങ്ങിയവര്‍ പരിപാടി വീക്ഷിക്കാന്‍ അബൂദാബിയില്‍ എത്തിയിരുന്നു. നവാസിന്റെ ഫെയ്‌സ്ബുക്ക് അക്കൗണ്ടിലേക്ക് അഭിനന്ദനങ്ങളുടെ പ്രവാഹമാണ്. നാട്ടിലെത്തുന്ന നവാസിന് ഉജ്വല വരവേല്‍പ് നല്‍കാനുള്ള ഒരുക്കത്തിലാണ് സുഹൃത്തുക്കളും നാട്ടുകാരും.

ഫൈനല്‍ മത്സരത്തിന്റെ സംപ്രേഷണം കാണാന്‍ കാത്തിരിക്കുകയാണ് വീട്ടുകാരും സുഹൃത്തുക്കളും. മത്സരത്തിന്റെ സംപ്രേഷണം അടുത്തുതന്നെയുണ്ടാകും.

മൈലാഞ്ചി സീസണ്‍-2: ഫൈനലില്‍ മാറ്റുരയ്ക്കാന്‍ ഉളിയത്തടുക്കയിലെ നവാസും