Government Aid | ഉരുൾപൊട്ടലിനും വാഹനാപകടത്തിനും ഇടയിൽ നഷ്ടപ്പെട്ട പ്രണയം; സർക്കാരിന്റെ സമാശ്വാസം

കല്‍പ്പറ്റ: (KasargodVartha) ഉരുള്‍പൊട്ടലില്‍ കുടുംബത്തെയും ഓറ്റുവിൽ പ്രതിശ്രുത വരനെയും നഷ്ടപ്പെട്ട വയനാട് ചൂരല്‍മല സ്വദേശിനി ശ്രുതിയുടെ ജീവിതം മറ്റൊരു അധ്യായത്തിലേക്ക് കടന്നുപോയിരിക്കുന്നു. മുണ്ടക്കൈ ഉരുള്‍പൊട്ടലില്‍ മാതാപിതാക്കളടക്കമുള്ള ഉറ്റവരെ നഷ്ടപ്പെട്ട ശ്രുതിയുടെ പ്രതിശ്രുത വരനായ ജെൻസൻ, കല്‍പറ്റയിലുണ്ടായ വാഹനാപകടത്തില്‍ പരിക്കേറ്റ് മരിച്ചതോടെയാണ് ദുരന്തം പൂര്‍ണമായി ശ്രുതിയെ പിടികൂടിയത്.

ചൊവ്വാഴ്ച കല്‍പറ്റക്കടുത്തുണ്ടായ വാഹനാപകടത്തിലാണ് ജെൻസന് ഗുരുതരമായ പരിക്കേറ്റത്. ആശുപത്രിയില്‍ വെന്റിലേറ്ററിന്റെ സഹായത്തോടെയാണ് ജീവൻ നിലനിർത്തിയിരുന്നത്. എന്നാല്‍ പ്രാർഥനകളെല്ലാം വിഫലമാക്കിക്കൊണ്ട് ബുധനാഴ്ച രാത്രിയോടെ ജെൻസന്‍റെ മരണം സ്ഥിരീകരിക്കുകയായിരുന്നു.

ജെൻസൻ്റെ മരണ വാർത്ത വയനാട് മുഴുവൻ ഞെട്ടിച്ചു. ഈ ദുരന്തത്തിൽ നിന്ന് ശ്രുതിയെ ഒറ്റപ്പെടുത്താതെ എല്ലാ സഹായങ്ങളും നൽകുമെന്ന് മന്ത്രി കെ. രാജൻ ഉറപ്പ് നൽകി.

'ജെൻസന്റെ ആഗ്രഹം ശ്രുതിക്ക് മെച്ചപ്പെട്ട ഒരു ജോലി ലഭിക്കണമെന്നായിരുന്നു’. ജെൻസൻ ആഗ്രഹിച്ചതുപോലെ നല്ല ജോലി സമ്മാനിക്കുമെന്നും, ശ്രുതി ഒറ്റപ്പെടില്ലെന്നും, സർക്കാർ എല്ലാ സഹായങ്ങളും നൽകുമെന്നും, മന്ത്രി കെ. രാജൻ പറഞ്ഞു.

ചൂരല്‍മലയിലെ സ്കൂള്‍ റോഡിലായിരുന്നു ശ്രുതിയുടെ വീട്. കോഴിക്കോട് സ്വകാര്യ ആശുപത്രിയിലെ അക്കൗണ്ടന്റായിരുന്ന ശ്രുതിയ്ക്ക് ഉരുള്‍പൊട്ടലില്‍ തന്റെ അമ്മ സബിത, അച്ഛൻ ശിവണ്ണ, അനുജത്തി ശ്രേയ, അമ്മമ്മ എന്നിവരെ നഷ്ടപ്പെട്ടിരുന്നു. പിതാവിന്‍റെ രണ്ട് സഹോദരങ്ങള്‍ ഉള്‍പ്പെടെ കുടുംബത്തിലെ ഒൻപത് പേരെയാണ് ദുരന്തത്തില്‍ നഷ്ടമായത്. കല്യാണത്തിന് കരുതിയിരുന്ന 15 പവൻ സ്വർണവും നാലു ലക്ഷം രൂപയും വീടടക്കം ഉരുള്‍ കൊണ്ടുപോയിരുന്നു.

സ്കൂള്‍ കാലം മുതലുള്ള സുഹൃത്തുക്കളായ രണ്ട് മതവിഭാഗങ്ങളില്‍ നിന്നുള്ള  ശ്രുതിയും ജെൻസനും ഈ ഡിസംബറില്‍ വിവാഹം കഴിക്കാനിരുന്നതായിരുന്നു. ഉരുള്‍പൊട്ടലിനെ തുടര്‍ന്ന് കല്യാണം നേരത്തെയാക്കാന്‍ തീരുമാനിച്ചിരുന്നു. കല്യാണം രജിസ്റ്റർ ചെയ്യാനായിരുന്നു ഇരുവർക്കും ആഗ്രഹം. ഇതിനിടെയാണ് വാഹനാപകടം ശ്രുതിയുടെ ജീവിതത്തില്‍ വീണ്ടും ഇരുള്‍ പടർത്തിയത്.