Public Concern | പുലിയും കാട്ടാനയും; മുളിയാറിൽ ജനജീവിതം ആശങ്കയിലെന്ന് മുസ്ലിം ലീഗ്

മുളിയാർ: (KasargodVartha) വനാതിർത്തിയിലെ പുലിശല്യം രൂക്ഷമായിരിക്കുന്ന സാഹചര്യത്തിൽ, പുലിയെ പിടിക്കാനും, പൊതു ജനങ്ങളുടെ ആശങ്ക അകറ്റാനും സർക്കാർ അടിയന്തര നടപടികൾ സ്വീകരിക്കണമെന്ന് മുസ്ലിം ലീഗ് മുളിയാർ പഞ്ചായത്ത് പ്രവർത്തക സമിതി ആവശ്യപ്പെട്ടു. 

വനംവകുപ്പ് നാല് പുലികൾ ഈ പ്രദേശത്ത് ഉണ്ടെന്ന് സ്ഥിരീകരിച്ചിട്ടുണ്ടെങ്കിലും, നിലവിൽ ഒരു പുലിപ്പെട്ടി സ്ഥാപിച്ചതല്ലാതെ ശാസ്ത്രീയമായ പരിഹാര മാർഗ്ഗങ്ങളൊന്നും സർക്കാർ സ്വീകരിച്ചിട്ടില്ല.

നായ്ക്കളെയും വളർത്തുമൃഗങ്ങളെയും പുലികൾ ആക്രമിക്കുന്ന സംഭവങ്ങൾ പതിവായി റിപ്പോർട്ട് ചെയ്യപ്പെടുന്നു. ഇപ്പോൾ ജനവാസ കേന്ദ്രങ്ങളിൽ പോലും പുലിയെ കണ്ടതായി പറയുന്ന സ്ഥിതിയാണ്. സർക്കാരും വനം വകുപ്പും ഈ ഗുരുതരമായ പ്രശ്നത്തെ നിസ്സംഗതയോടെ കാണുന്നത് ജനങ്ങളെ അസ്വസ്ഥരാക്കുന്നു.

മറുവശത്ത്, കാട്ടാനകളും കൃഷി നശിപ്പിച്ച് ജനജീവിതം ദുസ്സഹമാക്കുന്നു. കാട്ടാനകൾ ഇപ്പോൾ ടൗൺ പ്രദേശങ്ങളിലേക്ക് വരെ എത്തുന്നത് സാധാരണമായിരിക്കുന്നു. കഴിഞ്ഞ ദിവസം മൂലടുക്കം പ്രദേശത്ത് സ്കൂൾ വിദ്യാർത്ഥിക്ക് തെരുവ് നായയുടെ കടിയേൽക്കേണ്ടിവന്നു. 

ഗ്രാമ പഞ്ചായത്തും ബ്ലോക്ക് പഞ്ചായത്തും ഈ പ്രശ്നത്തിൽ നിഷ്ക്രിയമാണ്. ജനങ്ങളുടെ ജീവനും സ്വത്തിനും ഭീഷണിയായ ഈ സാഹചര്യത്തിൽ അധികൃതർ ഉടൻ ഇടപെടണമെന്ന് യോഗം ആവശ്യപ്പെട്ടു. 

പ്രസിഡണ്ട് ബിഎം അബൂബക്കർ ഹാജി അദ്ധ്യക്ഷതവഹിച്ച യോഗത്തിൽ ജനറൽ സെകട്ടറി മൻസൂർ മല്ലത്ത് സ്വാഗതം പറഞ്ഞു. കെ.ബി. മുഹമ്മദ് കുഞ്ഞി, മാർക്ക് മുഹമ്മദ്, സിദ്ധീഖ് ബോവിക്കാനം, ബി.എം. അഷ്റഫ്, ബി.കെ.ഹംസ, അബ്ദുല്ല ഡെൽമ, ഖാദർ ആലൂർ, അനീസ മൻസൂർ മല്ലത്ത്, രമേശൻ മുതലപ്പാറ, റൈസ റാഷിദ്, അബ്ബാസ് കൊളച്ചപ്, അഡ്വ. ജുനൈദ്, ലെത്തീഫ് ഇടനീർ, ഇഖ്ബാൽ തൈവളപ്പ്, അബ്ദുൽ റഹിമാൻ ചൊട്ട, ബി.എ. മുഹമ്മദ് കുഞ്ഞി, മുഹമ്മദ് കുഞ്ഞി പോക്കർ മല്ലം, ബി.എ. മുഹമ്മദ് കുഞ്ഞി, ഷെരീഫ് പന്നടുക്കം, ബി.എം.ശംസീർ, അബ്ദുൾ റഹിമാൻ ബെള്ളിപ്പാടി, കെ അബ്ദുൾ ഖാദർ കുന്നിൽ, ബസ് സ്റ്റാന്റ് അബ്ദുൾ റഹിമാൻ, സി.സുലൈമാൻ, മുസ്തഫ ബിസ്മില്ല, സിഎംആർ. റാഷിദ്, ഷെഫീഖ് മൈക്കുഴി, അബൂബക്കർ ചാപ്പ, അബ്ദുല്ല കുഞ്ഞി മുണ്ടപ്പള്ളം എന്നിവർ യോഗത്തിൽ സംബന്ധിച്ചു.

#LeopardThreat, #ElephantMenace, #Muliyar, #WildlifeAttacks, #KeralaNews, #PublicSafety