കോട്ടയം മെഡിക്കൽ കോളജിൽ കെട്ടിടം തകർന്നു; യുവതിക്ക് ദാരുണാന്ത്യം, പ്രതിഷേധവുമായി എംഎൽഎ

കോട്ടയം: (KasargodVartha) ഗവൺമെന്റ് മെഡിക്കൽ കോളജ് ആശുപത്രിയിൽ കെട്ടിടം തകർന്നുണ്ടായ അപകടത്തിൽ തലയോലപ്പറമ്പ് സ്വദേശിനി ബിന്ദു (45) മരിച്ചു. 

വ്യാഴാഴ്ച രാവിലെ 11 മണിയോടെ പതിനാലാം വാർഡിനോട് ചേർന്നുള്ള ശുചിമുറി ഭാഗമാണ് ഇടിഞ്ഞുവീണത്. അപകടസമയത്ത് ബിന്ദു ശുചിമുറിയിൽ കുളിക്കാനെത്തിയതായിരുന്നുവെന്ന് ഭർത്താവ് വിശ്രുതൻ പറഞ്ഞു. മകളുടെ ചികിത്സയുമായി ബന്ധപ്പെട്ട് ആശുപത്രിയിൽ എത്തിയതായിരുന്നു ബിന്ദുവും കുടുംബവും.

അവശിഷ്ടങ്ങൾക്കിടയിൽ കുടുങ്ങിയ ബിന്ദുവിനെ രണ്ടര മണിക്കൂറോളം നീണ്ട രക്ഷാപ്രവർത്തനങ്ങൾക്കൊടുവിലാണ് പുറത്തെടുത്തത്. എന്നാൽ അപ്പോഴേക്കും മരണം സംഭവിച്ചിരുന്നു. 

രക്ഷാപ്രവർത്തനം വൈകിയെന്ന് ആരോപിച്ച് ചാണ്ടി ഉമ്മൻ എംഎൽഎയുടെ നേതൃത്വത്തിൽ ആശുപത്രിയിൽ പ്രതിഷേധം നടന്നു. ‘അപകടത്തിൽപ്പെട്ടത് ആളൊഴിഞ്ഞ കെട്ടിടമായിരുന്നില്ലെന്നും, തെറ്റായ വാർത്തകൾ പ്രചരിപ്പിക്കാൻ ശ്രമിച്ചതാണ് രക്ഷാപ്രവർത്തനം വൈകാൻ കാരണമെന്നും’ ചാണ്ടി ഉമ്മൻ ആരോപിച്ചു. 

വേണ്ടരീതിയിൽ രക്ഷാപ്രവർത്തനങ്ങൾ ഏകോപിപ്പിക്കാൻ അധികൃതർക്ക് സാധിച്ചില്ലെന്നും അദ്ദേഹം കൂട്ടിച്ചേർത്തു. അപകടം നടക്കുമ്പോൾ മുഖ്യമന്ത്രിയുടെ അവലോകന യോഗം കോട്ടയത്ത് നടക്കുകയായിരുന്നു. ദുരന്തവിവരമറിഞ്ഞ് ആരോഗ്യ വകുപ്പ് മന്ത്രി വീണാ ജോർജും സഹകരണ-രജിസ്ട്രേഷൻ വകുപ്പ് മന്ത്രി വി.എൻ. വാസവനും ഉടൻതന്നെ മെഡിക്കൽ കോളജിലെത്തി സ്ഥിതിഗതികൾ വിലയിരുത്തി. 

തകർന്നുവീണ കെട്ടിടഭാഗം നിലവിൽ ഉപയോഗിക്കുന്നില്ലായിരുന്നെന്നാണ് മന്ത്രിമാർ മാധ്യമങ്ങളോട് പറഞ്ഞത്. ആരോഗ്യ വകുപ്പ് അഡീഷണൽ ചീഫ് സെക്രട്ടറി രാജൻ ഖൊബ്രഗഡെയും സ്ഥലത്തെത്തി രക്ഷാപ്രവർത്തനങ്ങൾക്ക് മേൽനോട്ടം വഹിച്ചു. അഗ്നിരക്ഷാ സേനയും പോലീസും സംയുക്തമായിട്ടാണ് രക്ഷാപ്രവർത്തനങ്ങൾക്ക് നേതൃത്വം നൽകിയത്.

ഈ ദുരന്തത്തിൽ വയനാട് മീനങ്ങാടി സ്വദേശിനി അലീന വിൻസന്റിന് (11) നിസാര പരിക്കേറ്റിട്ടുണ്ട്. പത്താം വാർഡിൽ ശസ്ത്രക്രിയ കഴിഞ്ഞ് ചികിത്സയിൽ കഴിയുന്ന മുത്തശ്ശി ത്രേസ്യാമ്മയുടെ കൂടെ കൂട്ടിരിപ്പുകാരിയായി നിൽക്കുകയായിരുന്നു അലീന. 

അത്യാഹിത വിഭാഗത്തിലെ ജീവനക്കാരനായ അമൽ പ്രദീപിനും രോഗികളെ ഒഴിപ്പിക്കുന്നതിനിടെ ട്രോളി വന്നിടിച്ച് നിസാര പരിക്കേറ്റു. അപകടഭീതിയെ തുടർന്ന് 10, 11, 14 വാർഡുകളിലെ രോഗികളെയും കൂട്ടിരിപ്പുകാരെയും സുരക്ഷിത സ്ഥാനങ്ങളിലേക്ക് മാറ്റി.

കോട്ടയം മെഡിക്കൽ കോളജിലെ ദാരുണ അപകടത്തെക്കുറിച്ച് നിങ്ങളുടെ അഭിപ്രായം പങ്കുവെക്കുക.

Article Summary: Building collapse at Kottayam Medical College kills one, injures two.

#KottayamMedicalCollege #BuildingCollapse #KeralaNews #Tragedy #ChandyOommen #MedicalCollegeSafety