കൊച്ചി തീരത്ത് സന്തോഷം: അപകടത്തിൽപ്പെട്ട കപ്പലിലെ മുഴുവൻ ജീവനക്കാരും രക്ഷപ്പെട്ടു; പ്രതികൂല കാലാവസ്ഥയിലും ജീവൻ രക്ഷിച്ചു: സംയുക്ത ദൗത്യത്തിന് അഭിനന്ദന പ്രവാഹം

കൊച്ചി: (KasargodVartha) അറബിക്കടലിൽ അപകടത്തിൽപ്പെട്ട ലൈബീരിയൻ ചരക്കുകപ്പലായ എംഎസ്‌സി എൽസ 3ലെ മുഴുവൻ ജീവനക്കാരെയും സംയുക്ത രക്ഷാപ്രവർത്തനത്തിലൂടെ സുരക്ഷിതമായി കരയിലെത്തിച്ചു. നാവികസേനയുടെ ഐഎൻഎസ് സുജാത കപ്പലിൽ ആദ്യമെത്തിച്ച 21 ജീവനക്കാരെ കൊച്ചി തീരത്ത് ഇറക്കി. പിന്നീട്, കപ്പൽ ക്യാപ്റ്റൻ ഇവാനോവ് അലക്സാണ്ടർ ഉൾപ്പെടെ അവശേഷിച്ച മൂന്നുപേരെ നാവികസേന കൊച്ചി നാവിക താവളത്തിൽ എത്തിച്ചു.

കൊച്ചി തീരത്ത് മാധ്യമങ്ങളോട് സംസാരിക്കവെ, പ്രതികൂല കാലാവസ്ഥയാണ് അപകടത്തിന് കാരണമെന്ന് ക്യാപ്റ്റൻ ഇവാനോവ് അലക്സാണ്ടർ പറഞ്ഞു. കപ്പലിലുണ്ടായിരുന്നവരെല്ലാം സുരക്ഷിതരാണ്. കോസ്റ്റ് ഗാർഡിന്റെയും നാവികസേനയുടെയും രക്ഷാപ്രവർത്തനം മികച്ചതായിരുന്നുവെന്നും അദ്ദേഹം കൂട്ടിച്ചേർത്തു.

കപ്പലിൽ നിന്ന് കണ്ടെയ്നറുകൾ ഒഴുകി നടക്കുകയാണെന്ന് ഐഎൻഎസ് സുജാതയിലെ കമാൻഡിംഗ് ഓഫീസർ മാൻഡർ അർജുൻ ശേഖർ അറിയിച്ചു. കപ്പലിൽ ഓയിൽ ചോർച്ചയുണ്ടായിട്ടുണ്ട്. ഈ സാഹചര്യത്തിൽ മറ്റ് കപ്പലുകൾക്ക് അപകട മുന്നറിയിപ്പ് നൽകിയിട്ടുണ്ട്. 

പ്രതികൂല കാലാവസ്ഥയിലും ജീവനക്കാരുടെ ജീവൻ രക്ഷിക്കുക എന്നതായിരുന്നു പ്രധാന ലക്ഷ്യം. രക്ഷാപ്രവർത്തനം വിജയകരമായി പൂർത്തിയാക്കാൻ സാധിച്ചതിൽ സന്തോഷമുണ്ടെന്നും അദ്ദേഹം പറഞ്ഞു.

മുങ്ങിയ കപ്പലിൽ 643 കണ്ടെയ്നറുകളാണ് ഉണ്ടായിരുന്നത്. ഇതിൽ 13 കണ്ടെയ്നറുകളിൽ അപകടകരമായ രാസവസ്തുക്കളാണ് ഉണ്ടായിരുന്നത്. 12 കണ്ടെയ്നറുകളിൽ കാൽസ്യം കാർബൈഡ് ആയിരുന്നു. കൂടാതെ 84.44 മെട്രിക് ടൺ ഡീസലും 367.1 മെട്രിക് ടൺ ഫർണസ് ഓയിലും കപ്പലിൽ ഉണ്ടായിരുന്നു. 

കൊച്ചിയിൽ നിന്ന് 38 നോട്ടിക്കൽ മൈൽ അകലെയും തോട്ടപ്പള്ളി ഹാർബറിൽ നിന്ന് 14.6 നോട്ടിക്കൽ മൈൽ അകലെയുമാണ് കപ്പൽ മുങ്ങിയത്. ശനിയാഴ്ചയാണ് എംഎസ്‌സി എൽസ 3 ചെരിഞ്ഞത്. ശനിയാഴ്ച രാത്രിയോടെ 24 ജീവനക്കാരിൽ 21 പേരെ നാവികസേന രക്ഷിച്ചിരുന്നു. കൂടുതൽ നിരീക്ഷണത്തിനായി ക്യാപ്റ്റൻ ഉൾപ്പെടെ മൂന്നുപേർ കപ്പലിൽത്തന്നെ തുടരുകയായിരുന്നു.

കൊച്ചി തീരത്തെ കപ്പൽ ദുരന്തത്തെക്കുറിച്ചും രക്ഷാപ്രവർത്തനത്തെക്കുറിച്ചുമുള്ള നിങ്ങളുടെ അഭിപ്രായങ്ങൾ പങ്കുവെക്കുക. 

Summary: All crew members from the MSC Elsa III cargo ship, which met with an accident in the Arabian Sea off Kochi, have been successfully rescued by a joint operation of the Indian Navy and Coast Guard.

#Kochi #ShipRescue #IndianNavy #CoastGuard #MaritimeSafety #KeralaNews