'ഡോക്ടർമാർക്ക് സുരക്ഷയില്ല'; കെജിഎംഒഎ നവംബർ ഒന്നു മുതൽ ജീവൻ രക്ഷാ സമരം തുടങ്ങുന്നു

തിരുവനന്തപുരം: (KasargodVartha) കേരളത്തിലെ സർക്കാർ ആശുപത്രികളിലെ അരക്ഷിതാവസ്ഥയിലും തുടർച്ചയായ സുരക്ഷാ വീഴ്ചകളിലും പ്രതിഷേധിച്ച് കേരളാ ഗവൺമെന്റ് മെഡിക്കൽ ഓഫീസേഴ്സ് അസോസിയേഷൻ (കെജിഎംഒഎ) നവംബർ ഒന്നു മുതൽ 'ജീവൻ രക്ഷാ സമരം' ആരംഭിക്കുന്നു. താമരശ്ശേരി താലൂക്ക് ആശുപത്രിയിൽ ഡ്യൂട്ടിയിലുണ്ടായിരുന്ന ഡോക്ടറെ തലയ്ക്ക് വെട്ടി ഗുരുതരമായി പരിക്കേൽപ്പിച്ച സംഭവത്തിൻ്റെ പശ്ചാത്തലത്തിലാണ് ഈ പ്രക്ഷോഭം. ഇതിൻ്റെ ആദ്യഘട്ടം എന്ന നിലയിൽ നവംബർ ഒന്നു മുതൽ സംസ്ഥാനവ്യാപകമായി രോഗീപരിചരണം ഒഴികെയുള്ള മറ്റ് ഡ്യൂട്ടികളിൽ നിന്ന് വിട്ടുനിന്നുകൊണ്ട് ഡോക്ടർമാർ നിസ്സഹകരണ സമരം തുടങ്ങും.

സുരക്ഷ ഉറപ്പുകൾ പാഴായി

തുടർച്ചയായി നൽകിയ ഉറപ്പുകൾ അവഗണിച്ചുകൊണ്ട് ആരോഗ്യ പ്രവർത്തകർക്ക് സുരക്ഷിതമായ തൊഴിലിടങ്ങൾ ഉറപ്പാക്കുന്നതിൽ സർക്കാർ സംവിധാനങ്ങൾ പരാജയപ്പെടുന്നു എന്നത് തികച്ചും നിരാശാജനകമാണെന്ന് കെജിഎംഒഎ ഭാരവാഹികൾ അഭിപ്രായപ്പെട്ടു. നിരന്തരമായി ഉണ്ടാകുന്ന ആശുപത്രി ആക്രമണങ്ങളുടെ പശ്ചാത്തലത്തിൽ ആശുപത്രികളെ അതിസുരക്ഷാ മേഖലകളായി പ്രഖ്യാപിക്കണമെന്ന ദീർഘകാലമായുള്ള സംഘടനയുടെ ആവശ്യം ഇതേവരെ യാഥാർത്ഥ്യമായിട്ടില്ല.

പ്രതിഷേധങ്ങൾ ശക്തമായ സാഹചര്യത്തിൽ ഡോ വന്ദനാ ദാസിൻ്റെ ദാരുണമായ കൊലപാതകത്തെത്തുടർന്ന് മുഖ്യമന്ത്രിയുടെ അധ്യക്ഷതയിൽ ഉന്നതതല യോഗം ചേർന്ന് സുപ്രധാന തീരുമാനങ്ങൾ കൈക്കൊണ്ടിരുന്നു. എന്നാൽ സുശക്തമായ ആശുപത്രി സംരക്ഷണ നിയമം രൂപീകരിച്ചതും കസ്റ്റഡിയിൽ ഉള്ള പ്രതികളുടെ മെഡിക്കൽ പരിശോധന സംബന്ധിച്ച മാനദണ്ഡങ്ങൾ പരിഷ്കരിച്ചതും മാത്രമാണ് നടപ്പിലായവ.

നടപ്പാക്കാത്ത വാഗ്ദാനങ്ങൾ

പ്രധാന ആശുപത്രികളുടെ സുരക്ഷാ ചുമതല സ്റ്റേറ്റ് ഇൻഡസ്ട്രിയൽ സെക്യൂരിറ്റി ഫോഴ്സിനെ (SISF) ഏൽപ്പിക്കും എന്ന നിർണായക തീരുമാനവും എല്ലാ പ്രധാന ആശുപത്രികളിലും പോലീസ് എയ്ഡ് പോസ്റ്റുകൾ സ്ഥാപിക്കുമെന്ന വാഗ്ദാനവും ആറ് മാസം കൂടുമ്പോൾ പ്രധാന ആശുപത്രികളിൽ സുരക്ഷാ ഓഡിറ്റ് നടത്തുമെന്ന പ്രഖ്യാപനവും നാളിതുവരെ നടപ്പിലാക്കപ്പെട്ടിട്ടില്ല. ആശുപത്രികളിലെ സുരക്ഷ ഉറപ്പാക്കുന്നതിനായി കോഡ് ഗ്രേ പ്രോട്ടോകോൾ (Code Grey Protocol) അഥവാ അടിയന്തര സാഹചര്യങ്ങളിൽ സ്വീകരിക്കേണ്ട നടപടിക്രമങ്ങൾ നടപ്പിലാക്കിയിട്ടുണ്ടെങ്കിലും ഇതിൻ്റെ ഭാഗമായുള്ള നിർദ്ദേശങ്ങൾ പലയിടത്തും യാഥാർത്ഥ്യമായിട്ടില്ല.

ഇതിൻ്റെ ഭാഗമായി വിമുക്തഭടന്മാരെ സുരക്ഷാ ജീവനക്കാരായി നിയമിക്കുന്നതിനും ആശുപത്രികളിൽ സിസിടിവികൾ സ്ഥാപിക്കുന്നതിനുള്ള ഫണ്ടുകൾ വകയിരുത്തുന്നതിൽ തദ്ദേശ സ്വയംഭരണ സ്ഥാപനങ്ങളും പലയിടത്തും പരാജയപ്പെടുന്നു. അതോടൊപ്പം സർക്കാർ ആശുപത്രികളിൽ, പ്രത്യേകിച്ച് അത്യാഹിത വിഭാഗങ്ങളിൽ, ഉണ്ടാവുന്ന അനിയന്ത്രിതമായ തിരക്ക് പലപ്പോഴും ആശുപത്രി അക്രമങ്ങളിലേക്ക് വഴിതെളിക്കുന്ന സാഹചര്യമുണ്ട്.

പ്രധാന ആവശ്യങ്ങൾ

ഈ പശ്ചാത്തലത്തിൽ പരിമിതമായ സാഹചര്യങ്ങളിൽ ആത്മാർത്ഥമായി ജോലി ചെയ്യുന്ന സംസ്ഥാനത്തെ ആരോഗ്യപ്രവർത്തകരുടെ ജീവന് സുരക്ഷ ഉറപ്പാക്കാൻ വേണ്ട നടപടികൾ യുദ്ധകാലാടിസ്ഥാനത്തിൽ സ്വീകരിക്കണമെന്ന് സംഘടന സർക്കാരിനോട് ആവശ്യപ്പെടുന്നു. ഇതിൻ്റെ ഭാഗമായി താഴെപ്പറയുന്ന നിർദേശങ്ങൾ ഉടനടി നടപ്പിലാക്കണം:

• എല്ലാ കാഷ്വാലിറ്റികളിലും ട്രയാജ് സംവിധാനം (Triage System) അഥവാ രോഗികളെ അടിയന്തര ചികിത്സയുടെ അടിസ്ഥാനത്തിൽ വേർതിരിക്കുന്ന രീതി അടിയന്തരമായി നടപ്പാക്കണം.
• കാഷ്വാലിറ്റികളിൽ ഒരു ഷിഫ്റ്റിൽ രണ്ട് സിഎംഒ (CMO) അഥവാ കാഷ്വാലിറ്റി മെഡിക്കൽ ഓഫീസർമാരുടെ സേവനം ഉറപ്പാക്കണം.
• പ്രധാന ആശുപത്രികളുടെ സുരക്ഷാ ചുമതല എസ്ഐഎസ്എഫിനെ ഏൽപ്പിക്കുകയും, കാഷ്വാലിറ്റിയുള്ള മറ്റെല്ലാ ആശുപത്രികളിലും പോലീസ് എയ്ഡ് പോസ്റ്റുകൾ സ്ഥാപിക്കുകയും ചെയ്യണം.
• സിസിടിവി സംവിധാനം സ്ഥാപിക്കൽ, എക്സ് സർവീസ് സുരക്ഷാ ജീവനക്കാരുടെ നിയമനം എന്നിവയ്ക്കായുള്ള ഫണ്ടുകൾ സമയബന്ധിതമായി ലഭ്യമാക്കണം.
• ഓരോ കേഡറിലും രോഗി - ഡോക്ടർ അനുപാതം കൃത്യമായി നിർവചിക്കണം.

ഇതോടൊപ്പം താമരശ്ശേരി താലൂക്ക് ആശുപത്രിയിൽ ഡ്യൂട്ടി സമയത്ത് ആക്രമണത്തിനിരയായ ഡോ വിപിൻ്റെ ചികിത്സാച്ചിലവ് പൂർണമായി ഏറ്റെടുക്കണമെന്ന് കെജിഎംഒഎ സർക്കാരിനോട് ആവശ്യപ്പെടുന്നു. മേൽ സൂചിപ്പിച്ച ആവശ്യങ്ങളിൽ സമയബന്ധിതമായി അനുകൂലതീരുമാനം ഉണ്ടാകുന്നില്ലെങ്കിൽ രോഗീപരിചരണം ഉൾപ്പെടെയുള്ള സേവനങ്ങളിൽ നിന്നും വിട്ടുനിന്നുകൊണ്ട് ശക്തമായ പ്രക്ഷോഭത്തിലേക്ക് സംഘടന നീങ്ങുന്നതാണെന്ന് പ്രസിഡൻ്റ് ഡോ സുനിൽ പി കെ, ജനറൽ സെക്രട്ടറി ഡോ ജോബിൻ ജി ജോസഫ് എന്നിവർ അറിയിച്ചു.

ഡോക്ടർമാർക്ക് സുരക്ഷ ഉറപ്പാക്കാൻ സർക്കാർ എന്ത് ചെയ്യണം? നിങ്ങളുടെ അഭിപ്രായം രേഖപ്പെടുത്തുക..

Article Summary: KGMOA strikes from November 1 demanding hospital security after an attack on a doctor.

#KGMOA #HospitalSecurity #DoctorsStrike #KeralaHealth #Thamarassery #VandanaDas