സഹകരണ സംഘങ്ങളെ ഒഴിവാക്കി ബാങ്ക് അക്കൗണ്ട് വഴി പെൻഷൻ വിതരണം; ആശയക്കുഴപ്പത്തിൽ ഗുണഭോക്താക്കൾ

കാസർകോട്: (KasargodVartha) സാമൂഹ്യ സുരക്ഷാ-ക്ഷേമനിധി പെൻഷൻ വിതരണത്തിൽ നിന്ന് സഹകരണ സംഘങ്ങളെ ഒഴിവാക്കി, ആധാർ ബന്ധിപ്പിച്ച ദേശസാൽകൃത ബാങ്ക് അക്കൗണ്ടുകൾ വഴി ഡയറക്ട് ബെനിഫിറ്റ് ട്രാൻസ്ഫർ നടപ്പാക്കാനുള്ള സർക്കാർ ഉത്തരവിനു പിന്നാലെ ആശയക്കുഴപ്പത്തിലായി ഗുണഭോക്താക്കൾ. ധനകാര്യ വകുപ്പ് പുറത്തിറക്കിയ ഈ ഉത്തരവ് മുതിർന്ന പൗരന്മാർക്കും സഹകരണ പ്രസ്ഥാനങ്ങൾക്കും ഒരുപോലെ തിരിച്ചടിയാകുമെന്നാണ് നിലവിലെ ആക്ഷേപം.

ഗ്രാമീണ മേഖലയിലെ പെൻഷൻ ഗുണഭോക്താക്കൾക്ക് തുക പിൻവലിക്കാൻ ഇനി ദേശസാൽകൃത ബാങ്കുകളിലോ എടിഎമ്മുകളിലോ നേരിട്ടെത്തേണ്ടി വരും. ഇത് ബാങ്കുകളിൽ വയോധികരുടെ വലിയ തിരക്ക് അനുഭവപ്പെടാനും കാരണമാകും. 

അക്കൗണ്ടുകൾ ആധാറുമായി ബന്ധിപ്പിക്കാത്ത ഗുണഭോക്താക്കൾ ഉടൻ തന്നെ ബാങ്കുകളിൽ സീഡിംഗ് നടപടികൾ പൂർത്തിയാക്കണം. ആധാർ ബന്ധിപ്പിക്കാത്ത പക്ഷം പെൻഷൻ തുക അക്കൗണ്ടിലേക്ക് എത്താതിരിക്കാൻ സാധ്യതയുണ്ട്. അതുകൊണ്ട് തന്നെ  ഗുണഭോക്താക്കൾ എത്രയും വേഗം ബാങ്കുമായി ബന്ധപ്പെട്ട് നടപടികൾ പൂർത്തിയാക്കേണ്ടതാണ്.

സർക്കാരിൻ്റെ വിശദീകരണം

നിലവിൽ പ്രാഥമിക കാർഷിക വായ്പാ സഹകരണ സംഘങ്ങളും മറ്റ് സഹകരണ സംഘങ്ങളും മുഖേന ഗുണഭോക്താക്കളുടെ വീടുകളിലെത്തി പെൻഷൻ വിതരണം ചെയ്യുന്ന രീതിയാണ് സംസ്ഥാനത്ത് നടപ്പിലുള്ളത്. 

എന്നാൽ വിതരണം ചെയ്യാതെ ശേഷിക്കുന്ന തുക സമയബന്ധിതമായി തിരികെ അടയ്ക്കാത്തതും സേവന പോർട്ടലിൽ ആവശ്യമായ വിവരങ്ങൾ യഥാസമയം രേഖപ്പെടുത്താത്തതും സാമ്പത്തിക കണക്കുകൾ പൊരുത്തപ്പെടുത്തുന്നതിൽ ഗുരുതരമായ ബുദ്ധിമുട്ടുകൾ ഉണ്ടാക്കുന്നതായി സർക്കാർ വിലയിരുത്തിയിരുന്നു.

ആധാർ അധിഷ്ഠിത പെൻഷൻ വിതരണം പൂർണമായി നടപ്പാക്കാത്തതിനാൽ അർഹതയില്ലാത്തവർക്ക് പെൻഷൻ ലഭിക്കുന്നതും ഒരാൾക്ക് ഒന്നിലധികം തവണ പെൻഷൻ ലഭിക്കുന്നതും പോലുള്ള അപാകതകൾ നിലനിൽക്കുന്നുണ്ടെന്നും ഉത്തരവിൽ പറയുന്നു. 

വീടുകളിലെത്തി പെൻഷൻ വിതരണം ചെയ്യുന്നതിനായി സഹകരണ സംഘങ്ങൾക്ക് ഇൻസെന്റീവ് ഇനത്തിൽ സർക്കാർ വൻതുക ചെലവഴിക്കേണ്ടി വരുന്നതും നിലവിലെ സംവിധാനത്തിൻ്റെ മറ്റൊരു പ്രധാന പോരായ്മയായി ചൂണ്ടിക്കാട്ടുന്നു. ഈ പ്രതിസന്ധികൾ മറികടക്കാനാണ് പുതിയ സംവിധാനം ഏർപ്പെടുത്തുന്നതെന്നാണ് അധികൃതരുടെ വിശദീകരണം.

പുതിയ മാറ്റങ്ങൾ

കേന്ദ്ര സർക്കാർ നിർദേശിച്ചിരിക്കുന്ന ഡിബിടി മാനദണ്ഡങ്ങൾ പൂർണമായി പാലിക്കാത്തത് സംസ്ഥാനത്തിന് ലഭിക്കേണ്ട കേന്ദ്ര സാമ്പത്തിക സഹായത്തെ ബാധിക്കാനുള്ള സാധ്യതയും സർക്കാർ പരിഗണിച്ചിട്ടുണ്ട്. ഈ സാഹചര്യങ്ങൾ വിലയിരുത്തിയ ശേഷമാണ് പെൻഷൻ വിതരണം ബാങ്ക് അക്കൗണ്ടുകളിലൂടെ നേരിട്ട് നടത്താൻ തീരുമാനിച്ചത്.

പുതിയ തീരുമാനപ്രകാരം പൂർണമായും കിടപ്പുരോഗികളായവരും വീടുവിട്ട് പുറത്തിറങ്ങാൻ കഴിയാത്ത ഗുണഭോക്താക്കളും ഒഴികെയുള്ള എല്ലാ സാമൂഹ്യ സുരക്ഷാ-ക്ഷേമനിധി ബോർഡ് പെൻഷൻ ഗുണഭോക്താക്കൾക്കും ആധാർ ബന്ധിപ്പിച്ച ബാങ്ക് അക്കൗണ്ടുകളിലേക്ക് ഡിബിടി സംവിധാനത്തിലൂടെയാകും പെൻഷൻ ലഭിക്കുക. 

കേന്ദ്ര സാമ്പത്തിക സഹായം ഉറപ്പാക്കുന്നതിനും ഇരട്ടപ്പെൻഷൻ തടയുന്നതിനുമാണ് പുതിയ മാറ്റമെന്ന് ധനവകുപ്പ് വ്യക്തമാക്കുന്നുണ്ടെങ്കിലും, പ്രായമായവർക്ക് ബാങ്കിംഗ് സേവനം അപ്രാപ്യമാകുമെന്ന ആശങ്ക വരും ദിവസങ്ങളിൽ കൂടുതൽ ചർച്ചകൾക്ക് വഴിവെക്കും.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പ്രാദേശിക വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമന്റായി രേഖപ്പെടുത്താം.

Article Summary: The state government's decision to distribute social security pensions directly through Aadhaar-linked bank accounts via DBT, excluding cooperative societies, has caused confusion among beneficiaries in Kasaragod.

#KeralaPension #KasaragodNews #DBT #CooperativeBank #KeralaGovernment #PensionUpdate #SocialSecurity #AparnaNews