Compensation | കുവൈതിലെ തീപ്പിടിത്തം: മരിച്ച മലയാളികളുടെ കുടുംബാംഗങ്ങള്ക്ക് സംസ്ഥാന സര്കാര് 5 ലക്ഷം രൂപ വീതം ധനസഹായം നല്കും; പരുക്കേറ്റവര്ക്ക് ഒരു ലക്ഷം രൂപ വീതം
ആരോഗ്യ വകുപ്പ് മന്ത്രി വീണാ ജോര്ജ് അടിയന്തരമായി കുവൈതിലേക്ക് യാത്ര തിരിക്കും
മരിച്ചവരുടെ കുടുംബങ്ങള്ക്ക് സഹായധനം പ്രഖ്യാപിച്ച് വ്യവസായികളായ യൂസുഫലിയും, രവിപിള്ളയും
തിരുവനന്തപുരം: (KasargodVartha) കുവൈതിലെ തീപ്പിടിത്തത്തില് മരിച്ച മലയാളികളുടെ കുടുംബാംഗങ്ങള്ക്ക് സംസ്ഥാന സര്കാര് അഞ്ച് ലക്ഷം രൂപ വീതം ധനസഹായം നല്കും. പരുക്കേറ്റ മലയാളികള്ക്ക് ഒരു ലക്ഷം രൂപ വീതം നല്കാനും തീരുമാനിച്ചു. വ്യാഴാഴ്ച ചേര്ന്ന പ്രത്യേക മന്ത്രിസഭായോഗത്തിലാണ് ഇതുസംബന്ധിച്ച തീരുമാനം ഉണ്ടായത്.
അപകടത്തിന്റെ പശ്ചാത്തലത്തില് ആരോഗ്യ വകുപ്പ് മന്ത്രി വീണാ ജോര്ജ് അടിയന്തരമായി കുവൈതിലേക്ക് യാത്ര തിരിക്കും. സ്റ്റേറ്റ് മിഷന് ഡയറക്ടര് (എന് എച് എം) ജീവന് ബാബു അനുഗമിക്കും. പരുക്കേറ്റ മലയാളികളുടെ ചികിത്സ, മരിച്ചവരുടെ മൃതദേഹങ്ങള് നാട്ടിലെത്തിക്കല് തുടങ്ങിയ പ്രവര്ത്തനങ്ങളുടെ ഏകോപനത്തിനായാണ് ഇവര് കുവൈതില് എത്തുന്നത്.
മരിച്ചവരുടെ കുടുംബങ്ങള്ക്ക് അഞ്ച് ലക്ഷം രൂപ വീതം സഹായം നല്കാം എന്ന് പ്രമുഖ വ്യവസായി യൂസുഫലിയും രണ്ട് ലക്ഷം രൂപ വീതം സഹായം നല്കാം എന്ന് പ്രമുഖ പ്രവാസി വ്യവസായി രവിപിള്ളയും മുഖ്യമന്ത്രിയെ ബന്ധപ്പെട്ട് അറിയിച്ചിട്ടുണ്ട്. നോര്ക മുഖേനയാണ് ഈ സഹായം ലഭ്യമാക്കുക. ഇതോടെ ഒരു കുടുംബത്തിന് 12 ലക്ഷം രൂപയാണ് സഹായം ലഭിക്കുക. കുവൈത് അഗ്നിബാധ മരണങ്ങളില് മന്ത്രിസഭ അനുശോചനം രേഖപ്പെടുത്തി.
ഇതുവരെ ലഭിച്ച വിവരങ്ങള് അനുസരിച്ച 24 മലയാളികള് മരിച്ചിട്ടുണ്ട്. ആകെ 49 പേരാണ് അപകടത്തില് മരിച്ചത്. സാധ്യമായ എല്ലാ സഹായങ്ങളും അപകടത്തില്പ്പെട്ടവര്ക്ക് ലഭ്യമാക്കാന് നോര്കയുടെ ആഭിമുഖ്യത്തിലും പ്രവാസികളുടെ മുന്കൈയിലും ശ്രമം നടക്കുന്നുണ്ട്. ഹെല്പ് ഡെസ്ക്കും ഗ്ലോബല് കോണ്ടാക്ട് സെന്ററും മുഴുവന് സമയവും പ്രവര്ത്തിക്കുന്നുണ്ട്. ഇന്ഡ്യാ ഗവണ്മെന്റ് കുവൈതില് നടത്തുന്ന ഇടപെടലുകളില് സംസ്ഥാന സര്കാര് പൂര്ണപിന്തുണ നല്കും. കേരളത്തിന്റെ ഡെല്ഹിയിലെ പ്രതിനിധി കെവി തോമസ് വിദേശ മന്ത്രാലയവുമായി നിരന്തരം ബന്ധം പുലര്ത്തുന്നുണ്ട്.
നേരത്തെ, മരിച്ച ഇന്ഡ്യന് പൗരന്മാരുടെ കുടുംബാംഗങ്ങള്ക്ക് പ്രധാനമന്ത്രിയുടെ ദുരിതാശ്വാസനിധിയില്നിന്ന് രണ്ടുലക്ഷം രൂപ സഹായധനം പ്രധാനമന്ത്രി പ്രഖ്യാപിച്ചിരുന്നു.
