ഡ്രൈവിങ് ലൈസൻസ് നേടാൻ ഇനി പുതിയ പരീക്ഷയും; ഡിസംബർ ഒന്ന് മുതൽ ഹസാർഡ് പെർസെപ്ഷൻ ടെസ്റ്റ് നിർബന്ധം, പാസാകാൻ 60 ശതമാനം മാർക്ക്

തിരുവനന്തപുരം: (KasargodVartha) സംസ്ഥാനത്ത് ഡ്രൈവിങ് ലൈസൻസ് നേടാൻ ഇനി പുതിയ പരീക്ഷ കൂടി പാസാകണം. ലേണേഴ്‌സ് പരീക്ഷയ്ക്കും ഗ്രൗണ്ട് ടെസ്റ്റിനും ഇടയിൽ 'ഹസാർഡ് പെർസെപ്ഷൻ ടെസ്റ്റ്' എന്ന പുതിയ പരീക്ഷയാണ് ഉൾപ്പെടുത്തുന്നത്. അപകടസാധ്യത മുൻകൂട്ടി അറിയാനുള്ള കഴിവ് പരിശോധിക്കുന്ന വീഡിയോ ഗെയിം മാതൃകയിലെ പരീക്ഷയാണിത്. ഇത് പാസായാൽ മാത്രമേ അപേക്ഷകരെ ഗ്രൗണ്ട്, റോഡ് ടെസ്റ്റുകളിൽ പങ്കെടുപ്പിക്കുകയുള്ളൂ. വരാനിരിക്കുന്ന ഡിസംബർ ഒന്ന് മുതൽ പുതിയ സംവിധാനം നിലവിൽ വരും.

പരീക്ഷാ രീതി ഇങ്ങനെ

ലേണേഴ്സ് പരീക്ഷ കഴിഞ്ഞ് 30 ദിവസത്തിനുശേഷമാണ് ഈ ടെസ്‌റ്റ് നടത്തുക. പരീക്ഷയിൽ 10 വീഡിയോകൾ ഉണ്ടാകും. ഡ്രൈവിങ്ങിനിടയിൽ അപകടസാധ്യത വന്നാൽ അത് എങ്ങനെ ഒഴിവാക്കുമെന്നാണ് ഇതിലൂടെ പരിശോധിക്കുക. പരീക്ഷയിൽ ജയിക്കാൻ 60 ശതമാനം മാർക്ക് വേണം.

ലക്ഷ്യം അപകടങ്ങൾ കുറയ്ക്കുക

ശ്രദ്ധക്കുറവും അപകടസാധ്യത തിരിച്ചറിയാനുള്ള കഴിവില്ലായ്‌മയും സംസ്ഥാനത്ത് റോഡപകടങ്ങൾ കൂടാൻ കാരണമായെന്ന വിലയിരുത്തലിലാണ് പുതിയ പരീക്ഷ ഏർപ്പെടുത്തുന്നതെന്ന് ട്രാൻസ്പോർട്ട് കമ്മീഷണർ സിഎച്ച് നാഗരാജു ഇറക്കിയ സർക്കുലറിൽ വ്യക്തമാക്കുന്നുണ്ട്. ഡ്രൈവിങ് കൂടുതൽ സുരക്ഷിതമാക്കുക എന്നതാണ് ഈ പരിഷ്കാരത്തിലൂടെ ലക്ഷ്യമിടുന്നത്.

ചെലവേറും, പ്രതിസന്ധിയും

പുതിയ പരീക്ഷ നടപ്പാകുന്നതോടെ അപേക്ഷകർക്ക് ഡ്രൈവിങ് ടെസ്റ്റിനുള്ള ചെലവും ഏറും. നിലവിൽ ലേണേഴ്സ് ടെസ്റ്റിനുള്ള കമ്പ്യൂട്ടറുകൾ പോലും പല ആർടി ഓഫീസുകളിലുമില്ല. ഇതിനിടയിൽ ഈ പുതിയ പരിഷ്‌കാരം എങ്ങനെ ഫലപ്രദമായി നടപ്പാക്കുമെന്ന കാര്യത്തിൽ ഉദ്യോഗസ്ഥർക്കും സംശയമുണ്ട്. ഹസാർഡ് ടെസ്റ്റിന് അപേക്ഷകരെ സജ്ജരാക്കാൻ കമ്പ്യൂട്ടറുകൾ സ്ഥാപിച്ച് പരിശീലനം നൽകേണ്ട ഉത്തരവാദിത്തം കൂടി ഇതോടെ ഡ്രൈവിങ് സ്‌കൂളുകൾക്കാകും.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.

Article Summary: Kerala introduces a mandatory Hazard Perception Test for driving licenses from December 1, 2026.

#KasargodVartha #DrivingLicense #KeralaMotorVehiclesDepartment #HazardPerceptionTest #CHNagaraju #ThiruvananthapuramNews #KeralaNews #MalayalamNews #AparnaNews