കാറ്ററിങ് തട്ടിപ്പ്; മുൻകൂർ പണം വാങ്ങി 3 കല്യാണങ്ങൾക്ക് സദ്യ മുടക്കിയെന്ന പരാതിയില്‍ ഉടമ പൊലീസ് കസ്റ്റഡിയിൽ

കോട്ടയം: (KasargodVartha) കാറ്ററിങ് തട്ടിപ്പുമായി ബന്ധപ്പെട്ട പരാതിയിൽ കാറ്ററിങ് ഉടമയെ പൊലീസ് കസ്റ്റഡിയിലെടുത്തു. കാഞ്ഞിരപ്പള്ളി ഉദയം കാറ്ററിങ് ഈവൻ്റ്സ് ഉടമ വിഷ്ണു മോഹൻ ആണ് പൊലീസിൻ്റെ പിടിയിലായത്.

കല്യാണത്തിന് മുൻകൂർ പണം വാങ്ങിയ ശേഷം ഭക്ഷണം നൽകാതിരുന്നതാണ് ഇയാൾക്കെതിരെയുള്ള കേസ്. മൂന്ന് കല്യാണങ്ങൾക്കാണ് ഇയാൾ സദ്യ മുടക്കിയത്.

മുടങ്ങിയത് മൂന്ന് കല്യാണങ്ങളുടെ സദ്യ

മുണ്ടക്കയം ചോറ്റിയിലും കോട്ടയം കഞ്ഞിക്കുഴിയിലും എറണാകുളത്ത് പെരുമ്പാവൂരും നടന്ന കല്യാണങ്ങൾക്കാണ് ഇയാൾ ഒരേസമയം ഭക്ഷണം മുടക്കിയത്. ഈ സ്ഥലങ്ങളിലെല്ലാം ഭക്ഷണം എത്തിക്കാമെന്ന് ഏറ്റത് കാഞ്ഞിരപ്പള്ളി ഉദയം കാറ്ററിങ് സർവീസ് ആയിരുന്നു. സംഭവത്തിൽ പരാതി ലഭിച്ചയുടനെ പൊലീസ് അന്വേഷണം തുടങ്ങിയിരുന്നു.

മുൻകൂർ പണം വാങ്ങി തട്ടിപ്പ്

ഓൺലൈൻ വഴിയാണ് രണ്ട് വീട്ടുകാർ ഉദയം കാറ്ററിങ് സർവീസിനെ പറ്റി അറിഞ്ഞത്. ഇവർ മുൻകൂറായി ഒരു ലക്ഷം രൂപ വിഷ്ണുവിന് നൽകിയെന്നും ഇതിനുപുറമെ പെരുമ്പാവൂർ സ്വദേശികളിൽ നിന്നും മൂന്ന് ലക്ഷത്തിലധികം രൂപയാണ് കാറ്ററിങ് ഉടമ തട്ടിയതെന്നും പരാതിയില്‍ പറയുന്നു.

കല്യാണ ചടങ്ങുകൾ കഴിഞ്ഞിട്ടും ഭക്ഷണം എത്താതിരുന്നതോടെയാണ് കബളിപ്പിക്കപ്പെട്ട വിവരം വീട്ടുകാർ അറിഞ്ഞത്. തുടർന്ന് മറ്റ് ഹോട്ടലുകളിൽ നിന്ന് അടിയന്തരമായി ഭക്ഷണം എത്തിച്ചാണ് അതിഥികൾക്ക് നൽകിയത്.

സമൂഹമാധ്യമങ്ങളിൽ വ്യാപക പരാതി

രണ്ട് വീട്ടുകാരും പൊലീസിൽ പരാതി നൽകിയിരുന്നു. തുടർന്നാണ് പെരുമ്പാവൂർ സ്വദേശികളും സമാനമായ സംഭവത്തിൽ പരാതിയുമായി രംഗത്തെത്തിയത്. കഞ്ഞിക്കുഴിയിലെ പരാതിയിൽ കോട്ടയം ഈസ്റ്റ് പൊലീസും ചോറ്റിയിലെ പരാതിയിൽ മുണ്ടക്കയം പൊലീസുമാണ് കേസ് അന്വേഷിക്കുന്നത്.

വീട്ടുകാരെ കബളിപ്പിച്ച വിവരം സമൂഹമാധ്യമങ്ങളിൽ പ്രചരിച്ചപ്പോൾ, സമാന സംഭവങ്ങൾ ഉദയം കാറ്ററിങ് സർവീസിൻ്റെ ഭാഗത്ത് മുമ്പ് ഉണ്ടായിട്ടുണ്ടെന്ന പ്രതികരണങ്ങളും വന്നിരുന്നു.

ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതല്‍ വാർത്തകള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. 

Article Summary: Kanjirappally Udayam Catering owner detained for scamming three weddings.

#KottayamNews #CateringScam #KeralaPolice #MalayalamNews #RenuNews