ഉദ്യോഗസ്ഥരുടെ പരിശോധന മൂന്നു ബാങ്കുകളില്‍ പൂര്‍ത്തിയാകുമ്പോള്‍ പുറത്തായത് 7 കോടിയോളം രൂപയുടെ തട്ടിപ്പ്

കാസര്‍കോട്: (www.kasargodvartha.com 19/06/2016) മുട്ടത്തൊടി സഹകരണ ബാങ്കിലെ തട്ടിപ്പ് പുറത്തുവന്നതിനു പിന്നാലെ സഹകരണ വകുപ്പ് ഉദ്യോഗസ്ഥര്‍ മറ്റു ബാങ്കുകളിലും അന്വേഷണം നടത്തുന്നു. ഇതു വരെ നടത്തിയ മൂന്നു ബാങ്കുകളിലെ പരിശോധന പൂര്‍ത്തിയാകുമ്പോള്‍ ഏഴു കോടിയോളം രൂപയുടെ തട്ടിപ്പ് ഉദ്യോഗസ്ഥര്‍ കണ്ടെത്തി.

മുട്ടത്തൊടി ബാങ്കില്‍ നിന്നും അഞ്ചുകോടിയോളം രൂപയുടെ തട്ടിപ്പും പിലിക്കോട് സഹകരണ ബാങ്കിന്റെ കാലിക്കടവ് ശാഖയില്‍ നിന്നും 80 ലക്ഷത്തോളം രൂപയുടെ തട്ടിപ്പും ഉദുമ പനയാല്‍ അര്‍ബണ്‍ ബാങ്കിന്റെ തച്ചങ്ങാട്ടെ ഹെഡ് ഓഫീസിലും ആറാട്ടുകടവ് ശാഖയിലും നടത്തിയ പരിശോധനയില്‍ 42 ലക്ഷത്തോളം രൂപയുടെ തട്ടിപ്പുമാണ് ഉദ്യോഗസ്ഥര്‍ പുറത്തുകൊണ്ടുവന്നത്.

സഹകരണ ജോയിന്റ് രജിസ്ട്രാര്‍ സന്ദീപ് കര്‍ത്തായുടെ നേതൃത്വത്തിലാണ് പിലിക്കോട് സഹകരണ ബാങ്കിന്റെ കാലിക്കടവ് ശാഖയില്‍ പരിശോധന നടത്തിയത്. സംഭവത്തില്‍ ശാഖാമാനേജരും പ്രാദേശിക കോണ്‍ഗ്രസ് നേതാവുമായ കെ.വി.ശരത് ചന്ദ്രനെയും അപ്രൈസര്‍ പിലിക്കോട് തുമ്പകുതിരിലെ കുഞ്ഞിരാമനെയും നീലേശ്വരം സി.ഐ ധനജ്ഞയ ബാബു അറസ്റ്റു ചെയ്തിട്ടുണ്ട്.

കാസര്‍കോട് ടൗണ്‍ കോ ഓപ്പറേറ്റീവ് ബാങ്കിലെ പരിശോധന അന്തിമ ഘട്ടത്തിലാണെന്ന് ഉദ്യോഗസ്ഥര്‍ അറിയിച്ചു. ഇവിടെ നിന്നും ഒരു തരത്തിലുള്ള കൃത്രിമമോ തട്ടിപ്പോ കണ്ടെത്തിയിട്ടില്ലെന്നും ഉദ്യോഗസ്ഥര്‍ പറഞ്ഞു.