Free heart surgery | 'റോടറി ക്ലബ് കാനനൂർ - ഗിഫ്റ്റ് ഓഫ് ലൈഫ്' പദ്ധതിയിൽ ആസ്റ്റർ മിംസ് ആശുപത്രിയുമായി ചേർന്ന് 50 കുട്ടികൾക്ക് സൗജന്യ ഹൃദയ ശസ്ത്രക്രിയ നടത്തിക്കൊടുക്കുന്നു; അർഹരെ കണ്ടെത്തുന്നതിന് കാസർകോട്ട് മെയ് 28ന് ക്യാംപ്

കാസർകോട്: (www.kasargodvartha.com) 'റോടറി ക്ലബ് കാനനൂർ - ഗിഫ്റ്റ് ഓഫ് ലൈഫ്' പദ്ധതിയിൽ ആസ്റ്റർ മിംസ് ആശുപത്രിയുമായി ചേർന്ന് 18 വയസുവരെയുള്ള 50 കുട്ടികൾക്ക് സൗജന്യ ഹൃദയ ശസ്ത്രക്രിയ നടത്തിക്കൊടുക്കുന്നു. ജന്മനാലുള്ള ഹൃദ്രോഗത്താൽ ബുദ്ധിമുട്ടുന്ന സാമ്പത്തികമായി ദുർബലരായ കുട്ടികൾക്കാണ് അവസരം. റോടറി ഇന്റർനാഷണലിന് കീഴിലുള്ള മെച്ചപ്പെട്ട ആരോഗ്യത്തിനായുള്ള ആഗോള ഗ്രാന്റ് പദ്ധതി വഴി നടത്തുന്ന ശസ്ത്രകിയ തികച്ചും സൗജന്യമാണ്.
                                 
ആസ്റ്റർ മിംസ് ആശുപത്രിയുമായി സഹകരിച്ച് അത്യാധുനിക സാങ്കേതിക വിദ്യയിൽ പ്രഗത്ഭരായ ഡോക്ടർമാരാണ് ശസ്ത്രക്രിയയ്ക്ക് നേതൃത്വം നൽകുക. ഈ പദ്ധതിയിൽ ഇതുവരെ 13 കുട്ടികൾക്ക് ശസ്ത്രക്രിയ നടത്തിയിട്ടുണ്ട്. ഹൃദയ ശസ്ത്രക്രിയ ആവശ്യമായി വരുന്ന നിർധനരായ കുട്ടികളെ കണ്ടെത്തുന്നതിനായി മെയ് 28ന് കാസർകോട് മുൻസിപൽ വനിതാ ഹോളിൽ രാവിലെ എട്ട് മണി മുതൽ വൈകീട്ട് നാല് മണി വരെ ക്യാംപ് സംഘടിപ്പിക്കും.

സുവർണ ജൂബിലി ആഘോഷിക്കുന്ന കാസർകോട് ഇൻഡ്യൻ മെഡികൽ അസോസിയേഷനും കാസർകോട് നഗരസഭയും സംയുക്തമായാണ് ഈ ക്യാംപിന് നേതൃത്വം നൽകുന്നത്. ഇതിനുവേണ്ട സന്നദ്ധ സേവന സഹായം കാസർകോട് പ്യൂപിൾസ് ഫോറം ഒരുക്കും. കൂടുതൽ അർഹരായ കുട്ടികളെ കണ്ടെത്തുന്നതിന് കോഴിക്കോട് ആസ്റ്റർ മിംസിലെ വിദഗ്ദ സംഘമാണ് ക്യാംപിൽ പരിശോധകരായി എത്തുന്നത്. എൻ എ നെല്ലിക്കുന്ന് എംഎൽഎ പരിപാടി ഉദ്‌ഘാടനം ചെയ്യും. കൂടുതൽ വിവരങ്ങൾക്ക് ബന്ധപ്പെടുക: റോടറി കാനനൂർ - 9048293734, 9447102199. < !- START disable copy paste -->