Bee Attack | തേനീച്ചയുടെ ആക്രമണത്തിൽ നിന്നും രക്ഷപ്പെടാൻ കനാലിൽ ചാടി; കാസർകോട് സ്വദേശിക്ക് ദാരുണാന്ത്യം
● സത്യരാജിനെയും ഭാര്യ വിശാലാക്ഷിയെയും ഒരു കൂട്ടം തേനീച്ചകൾ അപ്രതീക്ഷിതമായി ആക്രമിക്കുകയായിരുന്നു.
● വിശാലാക്ഷിക്കും തേനീച്ചയുടെ കുത്തേറ്റെങ്കിലും അവർ ചെറുമക്കളുമായി മറ്റൊരു വഴിയിലൂടെ രക്ഷപ്പെട്ടു.
● കനാലിൽ ചാടിയതിനെ തുടർന്ന് അവശനായ സത്യരാജ് ഒഴുക്കിൽപ്പെടുകയായിരുന്നുവെന്നാണ് സൂചന.
പാലക്കാട്: (KasargodVartha) തേനീച്ചയുടെ ആക്രമണത്തിൽ നിന്ന് രക്ഷ നേടാനായി കനാലിൽ ചാടിയ കർഷകൻ ദാരുണമായി മരിച്ചു. കാസർകോട് സ്വദേശിയും ചിറ്റൂർ കണക്കമ്പാറയിൽ താമസക്കാരനുമായ സത്യരാജ് (65) ആണ് മരണപ്പെട്ടത്. ചൊവ്വാഴ്ച രാവിലെ എട്ടുമണിയോടെ ഭാര്യ വിശാലാക്ഷിയോടൊപ്പം കൃഷിയിടത്തിലേക്ക് നനയ്ക്കാനായി പോയപ്പോഴായിരുന്നു സംഭവം നടന്നത്.
സത്യരാജിനെയും ഭാര്യ വിശാലാക്ഷിയെയും ഒരു കൂട്ടം തേനീച്ചകൾ അപ്രതീക്ഷിതമായി ആക്രമിക്കുകയായിരുന്നു. തേനീച്ചയുടെ കുത്തേറ്റതിനെ തുടർന്ന് സത്യരാജ് രക്ഷ തേടി സമീപത്തുള്ള കുന്നംകാട്ടുപതി കനാലിലേക്ക് ചാടുകയായിരുന്നു. അതേസമയം, വിശാലാക്ഷിക്കും തേനീച്ചയുടെ കുത്തേറ്റെങ്കിലും അവർ ചെറുമക്കളുമായി മറ്റൊരു വഴിയിലൂടെ രക്ഷപ്പെട്ടു.
വിശാലാക്ഷി നൽകിയ വിവരത്തെ തുടർന്ന് നാട്ടുകാരും അഗ്നിശമന സേനയും സ്ഥലത്തെത്തി സത്യരാജിനായി തിരച്ചിൽ ആരംഭിച്ചു. ഏറെ നേരത്തെ തിരച്ചിലിന് ഒടുവിലാണ് സത്യരാജിന്റെ മൃതദേഹം കനാലിൽ നിന്ന് കണ്ടെത്തിയത്. കനാലിൽ ചാടിയതിനെ തുടർന്ന് അവശനായ സത്യരാജ് ഒഴുക്കിൽപ്പെടുകയായിരുന്നുവെന്നാണ് സൂചന. ഒരു കിലോമീറ്റർ അകലെ നിന്നാണ് അദ്ദേഹത്തിന്റെ മൃതദേഹം കണ്ടെത്തിയത്.
പരിക്കുകളോടെ വിശാലാക്ഷിയെ ചിറ്റൂർ താലൂക് ആശുപത്രിയിൽ പ്രവേശിപ്പിച്ചിരിക്കുകയാണ്. കാസർകോട് സ്വദേശിയായ സത്യൻ വർഷങ്ങൾക്ക് മുൻപാണ് ചിറ്റൂരിൽ സ്ഥിരതാമസമാക്കിയത്.
#BeeAttack #FarmerDeath #Kasaragod #Palakkad #CanalJump #RescueOperation
