വാർഡ് വിഭജനത്തിലെ അപാകതകൾ: ദേലമ്പാടിയിൽ ഹൈകോടതിയുടെ ഇടക്കാല വിധി

മുള്ളേരിയ: (KasargodVartha) ദേലമ്പാമ്പാടി ഗ്രാമപഞ്ചായത്തിലെ വാർഡ് വിഭജനത്തിൽ ക്രമക്കേടുകൾ ചൂണ്ടിക്കാട്ടി സമർപ്പിച്ച ഹരജിയിൽ ഹൈകോടതിയുടെ നിർണായക ഇടക്കാല ഉത്തരവ്. ഈ കേസിൻ്റെ അന്തിമ വിധിക്ക് ശേഷം മാത്രമേ വാർഡ് വിഭജനത്തിന് അന്തിമ രൂപം നൽകാവൂ എന്ന് ഹൈകോടതി നിർദ്ദേശിച്ചു. യു.ഡി.എഫ്. നേതാക്കളായ ടി.കെ. ദാമോദരൻ, കെ.പി. സിറാജുദ്ദീൻ എന്നിവർ നൽകിയ ഹരജിയിലാണ് കോടതിയുടെ ഈ ഉത്തരവ്.

മാനദണ്ഡങ്ങൾ പാലിക്കാതെയും പ്രകൃതിദത്തമായ അതിരുകൾ പരിഗണിക്കാതെയും ചിലരുടെ താൽപ്പര്യങ്ങൾ സംരക്ഷിക്കുന്നതിന് വേണ്ടിയാണ് വാർഡ് വിഭജനം നടത്തിയതെന്ന് ഹരജിക്കാർ ആരോപിച്ചു. പഴയ 9, 10 വാർഡുകളുടെ അതിരുകൾ നിശ്ചയിച്ചത് തികച്ചും അശാസ്ത്രീയമാണെന്നും, പഴയ 15-ാം വാർഡിനെ ഒരു മാനദണ്ഡവും പാലിക്കാതെ പഴയ 16-ാം വാർഡിന്റെ ഒരു ഭാഗം ചേർത്ത് വിഭജിച്ചതായും ഹരജിയിൽ പറയുന്നു. 

ഇത് ചൂണ്ടിക്കാട്ടി ഡിലിമിറ്റേഷൻ സമിതിക്ക് നിരവധി പരാതികൾ നൽകിയിരുന്നെങ്കിലും, കരട് വിജ്ഞാപനപ്രകാരമുള്ള വാർഡുകൾ അതുപോലെതന്നെ അന്തിമമായി പ്രസിദ്ധീകരിക്കുകയായിരുന്നു. ഇതിനെ തുടർന്നാണ് ഹരജിക്കാർ ഹൈകോടതിയെ സമീപിച്ചത്. 

ഹരജിയിൽ പ്രാഥമിക വാദം കേട്ട കോടതി, ഹരജി ഫയലിൽ സ്വീകരിച്ച് നോട്ടീസ് നൽകാൻ ഉത്തരവിടുകയും ചെയ്തു. ഹരജിക്കാർക്കുവേണ്ടി ഹൈകോടതി അഭിഭാഷകൻ അഡ്വ. മുഹമ്മദ് ഷാഫിയാണ് ഹാജരായത്.

ദേലമ്പാടി വാർഡ് വിഭജനത്തെക്കുറിച്ചുള്ള ഹൈകോടതിയുടെ ഉത്തരവിനെക്കുറിച്ച് നിങ്ങളുടെ അഭിപ്രായമെന്ത്? കമൻ്റ് ചെയ്യുക.

Article Summary: High Court halts Delampady ward delimitation pending final verdict on alleged irregularities.

#Delampady, #WardDelimitation, #HighCourt, #KeralaPolitics, #LegalRuling, #LocalSelfGovernment