പഞ്ചായത്ത് കിണറില്‍ മരിച്ച നിലയില്‍ കണ്ടെത്തിയയാളെ തിരിച്ചറിഞ്ഞു

കാസര്‍കോട്: (www.kasargodvartha.com 04.06.2018) മൊഗ്രാല്‍ പുത്തൂരിലെ പഞ്ചായത്ത് കിണറില്‍ മരിച്ച നിലയില്‍ കണ്ടെത്തിയയാളെ തിരിച്ചറിഞ്ഞു. കര്‍ണാടക വിട്‌ള ശിമോഗ ടിത്തൂര്‍ ചുംകൂര്‍ സ്വദേശിയായ കാര്‍ത്തിക് (30) ആണ് മരിച്ചത്. ഞായറാഴ്ച ഉച്ചയോടെയാണ് മൊഗ്രാല്‍ പുത്തൂരിലെ പഞ്ചായത്ത് കിണറില്‍ യുവാവിന്റെ മൃതദേഹം കണ്ടെത്തിയത്. സമീപത്തായി ഒരു ബൈക്കും കണ്ടെത്തിയിരുന്നു.

തുടര്‍ന്ന് പോലീസ് നടത്തിയ അന്വേഷണത്തിലാണ് മരിച്ചത് കാര്‍ത്തിക്കാണെന്ന് വ്യക്തമായത്. കര്‍ണാടക ഇലക്ട്രിസിറ്റി ബോര്‍ഡിലെ വിട്‌ള സെക്ഷനിലെ അസി. എഞ്ചിനീയറാണ് കാര്‍ത്തിക്. വിവരമറിഞ്ഞ് ബന്ധുക്കള്‍ കാസര്‍കോട്ടെത്തി മൃതദേഹം തിരിച്ചറിഞ്ഞു. മൃതദേഹം വിദഗ്ദ്ധ പോസ്റ്റുമോര്‍ട്ടത്തിനായി പരിയാരം മെഡിക്കല്‍ കോളജ് ആശുപത്രിയിലേക്ക് കൊണ്ടുപോയി.

രാമചന്ദ്രന്‍ എന്ന രഘു- ഉമ ദമ്പതികളുടെ മകനാണ്. അരവിന്ദ് ബാബു, സത്യ, ശ്രീദേവി എന്നിവര്‍ സഹോദരങ്ങളാണ്. അവിവാഹിതനാണ് മരിച്ച കാര്‍ത്തിക്.