Verdict | ഭക്ഷണശാലകളിൽ പതിവായി പരിശോധന നടത്തണമെന്ന് ഹൈകോടതി; കർശന നിർദേശം ചെറുവത്തൂരിൽ ഷവര്‍മ കഴിച്ചതിന് പിന്നാലെ മരിച്ച വിദ്യാര്‍ഥിനിയുടെ മാതാവിന്റെ ഹർജിയിൽ

കൊച്ചി: (KasargodVartha) ഭക്ഷണശാലകളിൽ കൃത്യമായ പരിശോധനയും മേൽനോട്ടവും നടത്തണമെന്ന് സംസ്ഥാന സർക്കാരിനോട് കേരള ഹൈകോടതി നിർദേശിച്ചു. ഹോട്ടലുകൾ, കടകൾ, ഷവർമ വിൽക്കുന്ന റെസ്റ്റോറൻറുകൾ തുടങ്ങിയ എല്ലാ ഭക്ഷണശാലകളിലും ഈ നിർദ്ദേശം ബാധകമാണ്. പരിശോധനയിൽ നിർദേശങ്ങൾ ലംഘിക്കുന്നത് കണ്ടെത്തിയാൽ, ലൈസൻസ് റദ്ദാക്കൽ, നിയമനടപടികൾ തുടങ്ങിയ കർശന നടപടികൾ സ്വീകരിക്കണമെന്നും കോടതി ഉത്തരവിട്ടു.

2022ൽ ചെറുവത്തൂരില്‍ ഷവര്‍മ കഴിച്ചതിന് പിന്നാലെ ഭക്ഷ്യവിഷബാധയേറ്റ് മരിച്ച വിദ്യാര്‍ഥിനിയായ കരിവെള്ളൂര്‍ പിലിക്കോട് മട്ടലായി സ്വദേശിനി ദേവനന്ദ (16) യുടെ മാതാവ് ഇ വി പ്രസന്ന നൽകിയ ഹർജി തീർപ്പാക്കിക്കൊണ്ടാണ് കോടതിയുടെ വിധി. ഹർജിക്കാരി, 2006ലെ ഭക്ഷ്യസുരക്ഷാ നിലവാര നിയമം കർശനമായി നടപ്പാക്കണമെന്നും മകൾ മരിച്ച സംഭവത്തിൽ ഒരു കോടി രൂപ നഷ്ടപരിഹാരം നൽകണമെന്നും ആവശ്യപ്പെട്ടിരുന്നു.

മരിച്ച പെൺകുട്ടിയുടെ അമ്മയ്ക്ക് 25,000 രൂപ നഷ്ടപരിഹാരം

മരിച്ച പെൺകുട്ടിയുടെ അമ്മയ്ക്ക് നിയമ നടപടികൾക്കുള്ള ചെലവായി 25,000 രൂപ നൽകാനും ഹൈകോടതി സംസ്ഥാന സർക്കാരിനോട് ഉത്തരവിട്ടു. കാസർകോട് അഡീഷണൽ സെഷൻസ് കോടതി, 2006ലെ ഫുഡ് സേഫ്റ്റി ആൻഡ് സ്റ്റാൻഡേർഡ് ആക്‌ട് സെക്ഷൻ 65 പ്രകാരം ഇരയുടെ രക്ഷിതാക്കൾക്ക് നഷ്ടപരിഹാരം നൽകുന്ന കാര്യം അടിയന്തരമായി പരിഗണിക്കണമെന്നും കോടതി നിർദേശിച്ചു. 

സർക്കാർ ഇതുവരെ നിയമപ്രകാരമുള്ള നഷ്ടപരിഹാരം നൽകിയിട്ടില്ലെന്ന് ഹർജിക്കാരി ചൂണ്ടിക്കാട്ടി. സെക്ഷൻ 65 പ്രകാരം ഇരകൾക്കോ ​​അവരുടെ നിയമാനുസൃത അവകാശികൾക്കോ ​​നഷ്ടപരിഹാരം നൽകേണ്ടത് ആറുമാസത്തിനുള്ളിൽ ആണെന്നും, ഈ സംഭവത്തിൽ ഈ സമയപരിധി ലംഘിക്കപ്പെട്ടുവെന്നും ഹൈകോടതി നിരീക്ഷിച്ചു.

പൊതുജനാരോഗ്യം ഉറപ്പാക്കുന്നതിനുള്ള നടപടി

കൗണ്ടർ സർവീസ്, ടേക്ക്അവേകൾ എന്നിവ ഉൾപ്പെടെ എല്ലാ ഭക്ഷണശാലകളും ഭക്ഷണം തയ്യാറാക്കുന്ന തീയതിയും സമയവും പാക്കേജിംഗിൽ പ്രദർശിപ്പിക്കണമെന്ന 2023 നവംബർ 14-ലെ ഉത്തരവ് കർശനമായി നടപ്പാക്കാനും കോടതി സർക്കാരിനോട് നിർദേശിച്ചു. ഈ നിർദേശത്തിൻ്റെ പതിവ് മേൽനോട്ടം ഭക്ഷ്യസുരക്ഷാ കമ്മീഷണറും ബന്ധപ്പെട്ട അധികാരികളും നടത്തേണ്ടതാണ്.

#KeralaHighCourt, #foodsafety, #restaurantinspection, #shawarma, #foodpoisoning, #kerala