Enjoying Music | സംഗീത സാഗര തീരത്ത് ആസ്വാദകരായി കലക്ടറും കുടുംബവും

കാസർകോട്: (www.kasargodvartha.com) കാഞ്ഞങ്ങാട് ആലാമിപ്പള്ളിയിൽ എന്റെ കേരളം പ്രദർശന വിപണന മേളക്ക് തുടക്കം കുറിച്ച് ബുധനാഴ്ച രാത്രി സംഘടിപ്പിച്ച 'മെഹ്ഫിൽ ഇ സമ'യിൽ സംഗീത മഴ പെയ്തിറങ്ങി. സൂഫി ഖവാലി ഗസൽ ആസ്വാദകരുടെ ഹൃദയം കവർന്ന സംഗീത സാഗര തീരത്ത് ജില്ല കലക്ടർ സ്വാഗത് ഭണ്ഡാരി രൺവീർ ചന്ദും കുടുംബവും സഹൃദയ സാന്നിധ്യമായി. തിരുവനന്തപുരം ശ്രീചിത്ര ഇന്സ്റ്റിറ്റ്യൂട് ഓഫ് മെഡികൽ സയൻസ് ആൻഡ് ടെക്നോളജിയിൽ ന്യൂറൽ എൻജിനിയറായ ഭർത്താവ് നികുഞ്ച് ഭഗത്, മക്കളായ വിഹാൻ, മിറാൾ എന്നിവർക്കൊപ്പമാണ് മഹാരാഷ്ട്ര സ്വദേശിയായ കലക്ടർ സംഗീത വിരുന്നുണ്ടത്.
                                    
ഇർഫാൻ മുഹമ്മദ് എരോതിന്റെ നേതൃത്വത്തിൽ സംഘടിപ്പിച്ച മെഹ്ഫിൽ ഇ സമ രണ്ട് മണിക്കൂറോളം നീണ്ടു. ഹിന്ദി, ഉറുദു, മലയാളം ഗാനങ്ങൾ മെഹ്ഫിൽ ഇ സമയിൽ കോർത്താണ് രോഹിത്, ജവാദ് അസ്ലം, ജാസൽ, ആനന്ത്, ഉനൈസ്, ആഷിക് എന്നിവർ ചേർന്ന് അവതരിപ്പിച്ചത്.

ഡെൽഹി സർവകലാശാലയിലെ പഠന കാലത്താണ് ഈ സംഘം സംഗീത ടീം ഉണ്ടാക്കിയത്. പിന്നീടിങ്ങോട്ട് വലുതും ചെറുതുമായ നിരവധി വേദികളിൽ പാടി. ദമാദം മസ്ത് കലന്ദറിൽ തുടങ്ങി മുഹമ്മദ് റാഫിയുടെയും ജാവേദ് അലിയുടെയും മോഹിത് ചൗഹാന്റെയും ഉൾപെടെ സംഗീതാസ്വാദകർ ഹൃദയത്തിൽ സൂക്ഷിക്കുന്ന ഒട്ടനവധി ഗാനങ്ങൾ സംഗീതരാവിൽ പെയ്തിറങ്ങി. < !- START disable copy paste -->