Criticism | കാൻസർ രോഗികൾക്കുള്ള പെൻഷന് നിബന്ധനകൾ; രോഗികൾ ദുരിതത്തിൽ

ഉദിനൂർ: (KasargodVartha) റവന്യൂ വകുപ്പ് മുഖേന നൽകിവരുന്ന നൽകുന്ന കാൻസർ രോഗികൾക്കുള്ള പ്രതിമാസ പെൻഷന്റെ നിബന്ധനകൾ, രോഗികൾക്ക് കടുത്ത പ്രതിസന്ധി സൃഷ്ടിക്കുന്നുവെന്ന് പരാതി ഉയർന്നു. മാരക രോഗം മൂലം ശാരീരികമായും മാനസികമായും തളർന്ന രോഗികൾ, ചികിത്സാ ചെലവുകൾ കാരണം സാമ്പത്തികമായും ദുരിതം അനുഭവിക്കുമ്പോഴാണ് ഈ നിബന്ധനകൾ അവർക്ക് ഏറെ ബുദ്ധിമുട്ടുകൾ ഉണ്ടാക്കുന്നത്.

ഓരോ വർഷവും രോഗികൾ അപേക്ഷ പുതുക്കാൻ നിർബന്ധമാക്കുന്ന നിലയിലാണ് നിലവിലെ നടപടിക്രമങ്ങൾ. കാൻസർ വിദഗ്ധന്റെ സാക്ഷ്യപ്പെടുത്തിയ മെഡിക്കൽ സർട്ടിഫിക്കറ്റ്, വരുമാന സർട്ടിഫിക്കറ്റ് തുടങ്ങിയ രേഖകൾ വീണ്ടും സമർപ്പിക്കേണ്ടി വരുന്നത് രോഗികൾക്ക് വലിയ ബുദ്ധിമുട്ടാണ്. ഇത് മൂലം പലർക്കും മാസങ്ങളോളം പെൻഷൻ ലഭിക്കാതെ വരുന്ന സാഹചര്യമാണ് ഉണ്ടാകുന്നത്.

ഈ വിഷയത്തിൽ ദേശീയ കർഷക തൊഴിലാളി ഫെഡറേഷൻ സംസ്ഥാന ജെനറൽ സെക്രടറി കെ വി  ജതിന്ദ്രൻ, റവന്യൂ മന്ത്രി കെ രാജന് നിവേദനം നൽകി. രോഗികളുടെ പ്രയാസം കണക്കിലെടുത്ത് ആജീവനാന്ത പെൻഷൻ പദ്ധതി നടപ്പിലാക്കണമെന്നാണ് അദ്ദേഹത്തിന്റെ ആവശ്യം. ഓരോ വർഷവും രേഖകൾ സമർപ്പിക്കേണ്ട ആവശ്യമില്ലാതെ, ബന്ധപ്പെട്ട വിലേജ് ഓഫീസർക്ക് രോഗിയുടെ വിവരങ്ങൾ പരിശോധിച്ച് നൽകാമെന്നും നിവേദനത്തിൽ പറയുന്നു.

ഈ വിഷയം കഴിഞ്ഞ ദിവസം ഉദിനൂർ വിലേജ് ഓഫിസിൽ നടന്ന അദാലതിലും ഉന്നയിച്ചു. കാസർകോട് ജില്ലാ കലക്ടർ കെ. ഇമ്പശേഖരൻ ഈ പരാതി പരിശോധിച്ച് സർക്കാരിലേക്ക് ശുപാർശ ചെയ്യുമെന്ന് ഉറപ്പ് നൽകിയിട്ടുണ്ട്. കാൻസർ രോഗികൾക്കുള്ള പെൻഷൻ പദ്ധതിയിലെ നിലവിലുള്ള നിബന്ധനകൾ രോഗികളുടെ ദുരിതം വർധിപ്പിക്കുന്നതായി നിരവധി പേർ ചൂണ്ടിക്കാട്ടുന്നു. 

ഒരു മാരക രോഗവുമായി പോരാടുന്നവർക്ക് ഓരോ വർഷവും രേഖകൾ പുതുക്കി നൽകേണ്ടി വരുന്നത് അധിക ബാധ്യതയാണ്. അതിനാൽ, ഈ വിഷയത്തിൽ സർകാർ അടിയന്തരമായി ഇടപെടണമെന്നാണ് ആവശ്യം. സർകാർ അനുകൂല നടപടി സ്വീകരിക്കുമെന്ന പ്രതീക്ഷയിലാണ് രോഗികളും അവരുടെ കുടുംബങ്ങളും.

#cancercare #pension #Kerala #healthcare #socialjustice #udinoor