14 കാരിയെ വീട്ടിലും ശുചിമുറിയിലും നിരവധി തവണ പീഡിപ്പിച്ചെന്ന കേസിൽ 40കാരന് 20 വർഷം കഠിന തടവും 2 ലക്ഷം പിഴയും ശിക്ഷ

രാജപുരം: (www.kasargodvartha.com 15.03.2022) 14 കാരിയെ വീട്ടിലും ശുചിമുറിയിലും നിരവധി തവണ പീഡിപ്പിച്ചെന്ന കേസിൽ 40കാരന് 20 വർഷം കഠിന തടവും രണ്ട് ലക്ഷം രൂപ പിഴയടക്കാനും കോടതി ശിക്ഷിച്ചു. രാജപുരം പൊലീസ് സ്റ്റേഷൻ പരിധിയിലെ കെ ഭാസ്കരനെ (40) യാണ് ഹൊസ്ദുർഗ് ഫാസ്റ്റ് ട്രാക് സ്പെഷ്യൽ പോക്സോ കോടതി ജഡ്ജി കെ സുരേഷ് കുമാർ ശിക്ഷിച്ചത്.
                           
2018 ലാണ് കേസിനാസ്പദമായ സംഭവം നടന്നത്. സ്കൂളിലെത്തിയ പെൺകുട്ടി അസ്വസ്ഥത പ്രകടിപ്പിച്ചതിനെ തുടർന്ന് നടത്തിയ കൗൻസിലിങ്ങിലാണ് പീഡിപ്പിച്ചെന്ന കാര്യം വെളിപ്പെടുത്തിയത്. അന്നത്തെ രാജപുരം എസ് ഐ ആയിരുന്ന എം വി ശ്രീജു അന്വേഷണം നടത്തി ഭാസ്കരനെ അറസ്റ്റുചെയ്യുകയും പിന്നീട് എസ് ഐ, എ പി ജയശങ്കർ കുറ്റപത്രം സമർപിക്കുകയുമായിരുന്നു.

നേരത്തേ ജാമ്യത്തിലിറങ്ങിയ ഇയാളെ കണ്ണൂർ ജയിലിലേക്ക് അയച്ചിരുന്നു. ഐ പി സി 376 വകുപ്പ് അനുസരിച്ചും പോക്സോ വകുപ്പിലുമായി 10 വർഷം വീതമാണ് കഠിനതടവ് ശിക്ഷ വിധിച്ചത്. രണ്ടു വകുപ്പുകളിലുമായി ഒരു ലക്ഷം രൂപ വീതം പിഴ അടക്കണം. പിഴ അടക്കുന്നില്ലെങ്കിൽ ആറു മാസം കൂടി അധിക തടവ് അനുഭവിക്കണം. രണ്ട് വകുപ്പിലുമായി ശിക്ഷ ഒന്നിച്ചനുഭവിച്ചാൽ മതി. കേസ് രണ്ടുമാസം മുമ്പാണ് വിചാരണ തുടങ്ങിയത്. 13 സാക്ഷികളെയാണ് വിസ്തരിച്ചത്. പ്രോസിക്യൂഷന് വേണ്ടി പബ്ലിക് പ്രോസിക്യൂടർ അഡ്വ. പി ബിന്ദു ഹാജരായി. < !- START disable copy paste -->