സഹോദരിയുടെ വൃക്കയും അളിയന്റെ കരളും: സ്നേഹത്തിന്റെ ഇരട്ട ദാനം, ശ്രീനാഥിന് പുതുജീവിതം

കൊച്ചി: (KasargodVartha) ആലുവ സ്വദേശിയായ 43-കാരൻ ശ്രീനാഥ് ബി. നായർക്ക് ഇന്ന് രണ്ടാം ജന്മമാണ്. സ്വന്തം സഹോദരിയും സഹോദരിയുടെ ഭർത്താവും ചേർന്ന് സമ്മാനിച്ച ഈ പുതുജീവിതം സ്നേഹത്തിന്റെയും ത്യാഗത്തിന്റെയും ഉദാത്ത മാതൃകയാകുന്നു. 

കരളും വൃക്കകളും തകരാറിലായതിനെത്തുടർന്ന് ഗുരുതരാവസ്ഥയിലായിരുന്ന ശ്രീനാഥ്, കൊച്ചി ആസ്റ്റർ മെഡ്‌സിറ്റിയിൽ ചികിത്സയിലായിരുന്നു. ഒരേസമയം രണ്ട് അവയവങ്ങളും മാറ്റിവയ്ക്കേണ്ട നിർണായക ഘട്ടത്തിൽ ശ്രീനാഥിന് താങ്ങും തണലുമായി നിന്നത് അദ്ദേഹത്തിന്റെ കുടുംബാംഗങ്ങൾ തന്നെയായിരുന്നു.

ശ്രീനാഥിന്റെ ഇളയ സഹോദരി ശ്രീദേവി സ്വന്തം വൃക്ക നൽകാൻ തയ്യാറായപ്പോൾ, സഹോദരി ഭർത്താവായ വിപിൻ എം. കരൾ പകുത്തു നൽകി. ഈ ദമ്പതികളുടെ അവിശ്വസനീയമായ സ്നേഹവും ആത്മത്യാഗപരമായ പ്രവൃത്തിയും ആസ്റ്റർ മെഡ്‌സിറ്റിയിൽ സങ്കീർണ്ണമായ ഇരട്ട അവയവമാറ്റ ശസ്ത്രക്രിയയ്ക്ക് വഴിയൊരുക്കി. ഇത് ശ്രീനാഥിന് പുതുജീവൻ നൽകി.

ആലുവയിൽ ട്രാവൽ ഏജൻസി നടത്തുന്ന ശ്രീനാഥിന് കാലിൽ ചെറിയൊരു കുരു വന്നതായിരുന്നു തുടക്കം. ഇടുക്കിയിലേക്കുള്ള ഒരു യാത്രയ്ക്കുശേഷം ആ ഭാഗത്തെ ചൊറിച്ചിലും മുറിവുണങ്ങാത്ത അവസ്ഥയും തുടർന്നപ്പോൾ കാര്യമായെടുത്തില്ല. 

എന്നാൽ, ഇടയ്ക്കിടെ കടുത്ത പനി വന്നതിനെത്തുടർന്ന് അദ്ദേഹത്തെ അടുത്തുള്ള ആശുപത്രിയിൽ പ്രവേശിപ്പിച്ചു. ഏതാനും ദിവസത്തെ ചികിത്സയ്ക്കുശേഷം വീട്ടിലേക്ക് മടങ്ങിയെങ്കിലും ആരോഗ്യസ്ഥിതിയിൽ കാര്യമായ പുരോഗതി ഉണ്ടായില്ല. ശരീരം വളരെയധികം ക്ഷീണിക്കുകയും സംസാരിക്കാനും നടക്കാനും പോലും കഴിയാത്ത അവസ്ഥ വരികയും ചെയ്തതോടെ ശ്രീനാഥ് ആസ്റ്റർ മെഡ്‌സിറ്റിയിൽ ചികിത്സ തേടിയെത്തി.

പരിശോധനയിൽ ക്രയാറ്റിന്റെ അളവ് വളരെ കൂടുതലാണെന്ന് കണ്ടെത്തുകയും അടിയന്തരമായി ഡയാലിസിസ് ആരംഭിക്കുകയും ചെയ്തു. പ്ലേറ്റ്‌ലെറ്റ് കൗണ്ട് കുറവായിരുന്നതിനാൽ ബയോപ്സി നടത്താൻ കഴിഞ്ഞിരുന്നില്ല. ലിവർ സിറോസിസും ഗുരുതരമായ വൃക്കരോഗവും മൂലം ഒന്നിലധികം അവയവങ്ങളുടെ പ്രവർത്തനം തകരാറിലായി. കരളും വൃക്കയും മാറ്റിവയ്ക്കേണ്ട അവസ്ഥയിലെത്തിയപ്പോൾ, അനുയോജ്യരായ ദാതാക്കളെ കണ്ടെത്തുക എന്നത് ശ്രീനാഥിനും ഭാര്യ ലക്ഷ്മിപ്രിയയ്ക്കും വലിയ വെല്ലുവിളിയായി.

ആശാവർക്കർ കൂടിയായ ശ്രീനാഥിന്റെ ഇളയ സഹോദരി ശ്രീദേവി തന്റെ വൃക്കകളിലൊന്ന് നൽകാൻ സന്നദ്ധത അറിയിച്ചതോടെ ഒരു പ്രശ്നത്തിന് പരിഹാരമായി. എന്നാൽ കരൾ ദാതാവിനെ കണ്ടെത്തേണ്ടതുണ്ടായിരുന്നു. ശ്രീനാഥിന്റെ ഭാര്യയുടെ സഹോദരനുമായി നടത്തിയ ആദ്യ ശ്രമം മെഡിക്കൽ പരിശോധനകൾ വിജയിക്കാത്തതിനെത്തുടർന്ന് പരാജയപ്പെട്ടു.

ഈ നിർണ്ണായക നിമിഷത്തിലാണ് ശ്രീദേവിയുടെ ഭർത്താവായ വിപിൻ തന്റെ കരൾ അളിയന് പകുത്തുനൽകാൻ തയ്യാറാണെന്ന് അറിയിച്ചത്. ജോയ് ആലുക്കാസിന്റെ എം.ജി. റോഡ് ബ്രാഞ്ചിലെ അസിസ്റ്റന്റ് മാനേജറാണ് വിപിൻ. ഒരു ജീവൻ രക്ഷിക്കാൻ വേണ്ടിയാണെങ്കിൽ പോലും, ഒരേസമയം ഭാര്യയും ഭർത്താവും മേജർ ശസ്ത്രക്രിയയ്ക്ക് വിധേയരാകുന്നത് പോലെയുള്ള സവിശേഷ സാഹചര്യത്തിൽ ഡോക്ടർമാർക്ക് ആദ്യം ചെറിയ ആശങ്കയുണ്ടായിരുന്നു.

രണ്ട് കുട്ടികളുള്ള വിപിന്റെയും ശ്രീദേവിയുടെയും കുടുംബം നേരിടാനിരിക്കുന്ന വെല്ലുവിളികളെക്കുറിച്ച് എല്ലാവർക്കും ആശങ്കയുണ്ടായിരുന്നെങ്കിലും, ഇരുവരും തങ്ങളുടെ തീരുമാനത്തിൽ ഉറച്ചുനിന്നു. ഏറെ വെല്ലുവിളികൾ നിറഞ്ഞതായിരുന്നു ശസ്ത്രക്രിയ. ശ്രീനാഥിന്റെ രക്തത്തിലെ അണുബാധയും ഫാറ്റി ലിവറും കാരണം ശസ്ത്രക്രിയ രണ്ടുതവണ മാറ്റിവയ്ക്കേണ്ടി വന്നു.

ഹെപ്പറ്റോ പാൻക്രിയാറ്റോ ബിലിയറി & അബ്ഡോമിനൽ മൾട്ടി-ഓർഗൻ ട്രാൻസ്പ്ലാന്റ് സീനിയർ കൺസൾട്ടന്റ് ഡോ. മാത്യു ജേക്കബിന്റെയും നെഫ്രോളജി സീനിയർ കൺസൾട്ടന്റ് ഡോ. വി. നാരായണൻ ഉണ്ണിയുടെയും നേതൃത്വത്തിലുള്ള ആസ്റ്റർ മെഡ്‌സിറ്റിയിലെ മെഡിക്കൽ സംഘമാണ് ശസ്ത്രക്രിയ വിജയകരമായി പൂർത്തിയാക്കിയത്.

‘ഇതൊരു സങ്കീർണ്ണമായ കേസ് ആയിരുന്നു,’ ഡോ. മാത്യു ജേക്കബ് പറഞ്ഞു. ‘എല്ലാ അപകടസാധ്യതകളും കുറയ്ക്കുന്നുണ്ടെന്ന് ഞങ്ങൾ ഉറപ്പാക്കേണ്ടിയിരുന്നു. കുടുംബത്തിന്റെ നിശ്ചയദാർഢ്യത്തിനും ശസ്ത്രക്രിയാ, ശസ്ത്രക്രിയാനന്തര പരിചരണ വിഭാഗങ്ങളുടെ ഏകോപിത ശ്രമങ്ങൾക്കുമുള്ള അംഗീകാരമാണ് ഈ വിജയമെന്നും" അദ്ദേഹം കൂട്ടിച്ചേർത്തു.

ശസ്ത്രക്രിയയ്ക്കും മൂന്ന് മാസത്തെ വിശ്രമത്തിനും ശേഷം ശ്രീനാഥും ശ്രീദേവിയും വിപിനും ഇപ്പോൾ പൂർണ്ണ ആരോഗ്യവാന്മാരായി ഇരിക്കുന്നു. എല്ലാവരുടെയും മുഖത്ത് സന്തോഷം മാത്രം.

സ്നേഹത്തിന്റെയും ത്യാഗത്തിന്റെയും ഈ മഹത്തായ മാതൃകയെക്കുറിച്ച് നിങ്ങളുടെ അഭിപ്രായം പങ്കുവെയ്ക്കൂ.

Article Summary: A man from Aluva received a kidney from his sister and a liver from his brother-in-law in a successful double organ transplant.

#OrganDonation #Kerala #InspiringStory #Health #LoveAndSacrifice #AsterMedcity