ബൈകും മിനിലോറിയും കൂട്ടിയിടിച്ച് മലപ്പുറം സ്വദേശികളായ രണ്ട് വിദ്യാർഥികൾ മരിച്ചു; അപകടം ഐ എസ് എല്‍ ഫുട്‍ബോൾ മത്സരം കാണാന്‍ പോവുന്നതിനിടെ

കാസർകോട്: (www.kasargodvartha.com 20.03.2022) ബൈകും മിനിലോറിയും കൂട്ടിയിടിച്ച് രണ്ട് വിദ്യാർഥികൾ മരിച്ചു . മലപ്പുറം ഒതുക്കുങ്ങൽ ചെറുകുന്ന് സ്വദേശികളായ മുഹമ്മദ് ജംശീർ (22), മുഹമ്മദ് ശിബിൽ (20) എന്നിവരാണ് മരിച്ചത്. ഇരുവരും അയൽവാസികളാണ്. ഞായറാഴ്ച പുലര്‍ചെ അഞ്ചരയോടെ ഉദുമ പള്ളത്താണ് അപകടം സംഭവിച്ചത്.

  


ഐ എസ് എല്‍ ഫുട്‍ബോൾ ഫൈനല്‍ മത്സരം കാണാന്‍ ഗോവയിലേക്ക് പോവുകയായിരുന്ന സംഘത്തിൽ പെട്ടവരാണ് അപകടത്തിൽ പെട്ടത്.  ഹൈദരാബാദിന് വേണ്ടി കളിക്കുന്ന അബ്ദുർ റബീഹിന്റെ പിതാവിന്റെ സഹോദരന്റെ മകനാണ് ശിബിൽ. റബീഹിന്റെ സുഹൃത്തുക്കളാണ് മറ്റുള്ളവർ. രണ്ട് സംഘമായി ബൈകിലും കാറിലുമായാണ് ഇവര്‍ സഞ്ചരിച്ചിരുന്നത്. കാറിൽ സഞ്ചരിച്ചിരുന്നവർ ഉപ്പളയിലെത്തിയപ്പോൾ ബൈകിൽ വരികയായിരുന്നവരെ കാണാത്തതിനെ തുടർന്ന് ഫോണിൽ വിളിച്ചപ്പോൾ പൊലീസ് എടുത്തതിനെ തുടര്‍ന്നാണ് ഇരുവര്‍ക്കും അപകടം സംഭവിച്ച വിവരം അറിഞ്ഞത്.