ഉള്ളാള്‍ ദര്‍ഗയില്‍ നിന്നും മടങ്ങുകയായിരുന്ന സംഘം അപകടത്തില്‍ പെട്ടു; 5 പേര്‍ക്ക് ഗുരുതരം

നീലേശ്വരം: (www.kasargodvartha.com 12.07.2014) ഉള്ളാള്‍ ദര്‍ഗയിലേക്ക് പോയി മടങ്ങുകയായിരുന്ന സംഘം സഞ്ചരിച്ച കാര്‍ അപകടത്തില്‍ പെട്ടു. പിഞ്ചു കുഞ്ഞ് ഉള്‍പെടെ അഞ്ച് പേര്‍ക്ക് പരിക്കേറ്റു. ദേശീയപാതയില്‍ ചെറുവത്തൂര്‍ മയ്യിച്ചയില്‍ ശനിയാഴ്ച ഉച്ചയ്ക്ക് 12 മണിയോടെയായിരുന്നു അപകടം.

പയ്യന്നൂര്‍ പഴയങ്ങാടി സ്വദേശികളായ അബ്ദുല്‍ ഖാദര്‍, ഇബ്രാഹിം, സല്‍മ, സര്‍ഫാന, അബ്ദുല്‍ കരീം എന്നിവരെ ആശുപത്രിയിലേക്ക് മാറ്റി. നിയന്ത്രണം വിട്ട് മറിഞ്ഞ കാര്‍ വെള്ളക്കെട്ടിലേക്ക് മറിഞ്ഞാണ് അപകടം. പഴങ്ങാടിയിലേക്കു പോവുകയായിരുന്ന കെ.എല്‍.60-എഫ് 6049  കാര്‍ നിയന്ത്രണം വിട്ട് മരത്തിലിടിച്ച് വെള്ളക്കെട്ടിലേക്ക് മറിയുകയായിരുന്നു. റോഡരികില്‍ മേയുകയായിരുന്ന പശുക്കുട്ടിയുടെ മേല്‍ മറിഞ്ഞ കാര്‍ മലക്കം മറിഞ്ഞ് വെള്ളക്കെട്ടിലേക്കു തല കീഴായി മറിയുകയായിരുന്നു.

മയിച്ചയിലെ കുഞ്ഞമ്പുവിന്റെ പശുക്കിടവാണ് അപകടത്തില്‍ ചത്തത്. മയ്യിച്ച പാലത്തിന് കിഴക്ക് ഭാഗത്തുള്ള വെള്ളക്കെട്ടിലാണ് കാര്‍ മറിഞ്ഞത്. ഓടിക്കൂടിയ നാട്ടുകാരാണ് രക്ഷാപ്രവര്‍ത്തനം നടത്തിയത്. തൊട്ടടുത്ത വീട്ടുകാരും നാട്ടുകാരും കാറില്‍ കുടുങ്ങിയവരെ പുറത്തെത്തച്ച് ആശുപത്രിയിലേക്കു മാറ്റുകയായിരുന്നു. അപകട വിവരമറിഞ്ഞ് നീലേശ്വരം പോലീസ് സ്ഥലത്തെത്തി

അപകടത്തില്‍പ്പെട്ടത് ഉള്ളാള്‍ ദര്‍ഗയിലേക്കു പോയി മടങ്ങിയവരാണ്. പരിക്കേറ്റവരില്‍ ചിലരുടെ നില അതീവ ഗുരുതരമാണ്.