തളങ്കരയില്‍ വീണ്ടും ഗുണ്ടാ ആക്രമണം; യുവാവിനെ വീട്ടില്‍ കയറി വെട്ടിക്കൊല്ലാന്‍ ശ്രമം

Raees

തളങ്കര: തളങ്കര കെ.എസ്. അബ്ദുല്ല റോഡിലെ വീട്ടില്‍ കയറി വയറിംഗ് തൊഴിലാളിയായ യുവാവിനെ വാളുകൊണ്ട് വെട്ടിക്കൊല്ലാന്‍ ശ്രമം. ശനിയാഴ്ച രാത്രി 11.30 ന് പരേതനായ സിദ്ദിഖിന്റെ മകന്‍ അഹമ്മദ് റഈസിനെയാണ്(22) ആറംഗ ഗുണ്ടാസംഘം വാളുകൊണ്ട് വെട്ടിയത്. കഴുത്തിന് നേരെ വീശിയ വാള്‍ തടയുന്നതിനിടയില്‍ ഇടതു കൈക്കാണ് വെട്ടേറ്റത്. യുവാവിനെ ജനറല്‍ ആശുപത്രിയില്‍ പ്രവേശിപ്പിച്ചു.

വ്യാഴാഴ്ച രാത്രി റഈസിനെ ഇതേ സംഘം ബാങ്കോട് വെച്ച് കാറില്‍ നിന്ന് വലിച്ചിറക്കി മര്‍ദ്ദിച്ചിരുന്നു. പൂര്‍വ്വ വൈരാഗ്യമാണ് അക്രമത്തിന് കാരണം. തളങ്കരയില്‍ ഇടയ്ക്കിടെ ഗുണ്ടാസംഘങ്ങള്‍ ചേരിതിരിഞ്ഞ് സംഘര്‍ഷത്തിലേര്‍പ്പെടുന്നതും ചില വീടുകളില്‍ കയറി അതിക്രമങ്ങള്‍ സൃഷ്ടിക്കുന്നതും പ്രദേശത്തെ സൈ്വര്യജീവിതത്തിന് വന്‍ ഭീഷണിയായിട്ടുണ്ട്.