മന്ത്രി ഇബ്രാഹിം കുഞ്ഞിനെ കരിങ്കൊടി കാണിച്ച യൂത്ത് ലീഗ് നേതാവിനെ പുറത്താക്കാന്‍ ലീഗ് നിര്‍ദേശം

കാസര്‍കോട്: (www.kasargodvartha.com 19.08.2014) സ്വകാര്യ ചടങ്ങിനായി എത്തിയ പൊതുമരാമത്ത് വകുപ്പ് മന്ത്രി വി.കെ. ഇബ്രാഹിം കുഞ്ഞിയെ കരിങ്കൊടി കാണിച്ച നടപടി അങ്ങേയറ്റം പ്രതിഷേധാര്‍ഹവും അപലപനീയവുമാണെന്ന് മുസ്ലിം ലീഗ് ജില്ലാ നേതാക്കള്‍ അഭിപ്രായപ്പെട്ടു. പ്രസിഡന്റ് ചെര്‍ക്കളം അബ്ദുല്ല അധ്യക്ഷത വഹിച്ചു.
കരിങ്കൊടി പ്രയോഗത്തിന് നേതൃത്വം നല്‍കിയ ചെങ്കള പഞ്ചായത്ത് യൂത്ത് ലീഗ് വൈസ് പ്രസിഡണ്ട് ജാസിര്‍ കുന്താപുരത്തെ തല്‍സ്ഥാനത്തുനിന്ന് നീക്കം ചെയ്യാന്‍ യൂത്ത് ലീഗ് ജില്ലാ കമ്മിറ്റിക്ക് നിര്‍ദേശം നല്‍കി. നിര്യാതനായ കാഞ്ഞങ്ങാട് മണ്ഡലം ജോയിന്റ് സെക്രട്ടറിയും അജാനൂര്‍ ഗ്രാമപഞ്ചായത്ത് സ്റ്റാണ്ടിംഗ് കമ്മിറ്റി ചെയര്‍മാനുമായ യു.വി. ഹസൈനാറിന്റെ നിര്യാണത്തില്‍ യോഗം അനുശേചനം രേഖപ്പെടുത്തി.

സംസ്ഥാന വൈസ് പ്രസിഡണ്ട് സി.ടി. അഹമ്മദലി, എ. അബ്ദുര്‍ റഹ്മാന്‍, എന്‍.എ. നെല്ലിക്കുന്ന് എം.എല്‍.എ, പി.ബി അബ്ദുര്‍ റസാഖ് എം.എല്‍.എ, എ. ഹമീദ് ഹാജി, കല്ലട്ര മാഹിന്‍ ഹാജി, എ.ജി.സി. ബഷീര്‍, കെ.ഇ.എ. ബക്കര്‍, എം. അബ്ദുല്ല മുഗു എന്നിവര്‍ ചര്‍ച്ചയില്‍ സംബന്ധിച്ചു.