രാഷ്ട്രീയവിധേയത്വത്തിനും, മാഫിയ കൂട്ടുകെട്ടിനും പോലീസ് കനത്തവിലനല്‍കേണ്ടിവരും-യൂത്ത് ലീഗ്

കാസര്‍കോട്:(www.kasargodvartha.com 10/03/2018) ജനങ്ങളുടെ ജീവനും സ്വത്തിനും, സംരക്ഷണംനല്‍കി നീതിനടപ്പിലാക്കി നാട്ടില്‍ ക്രമസാമാധാനം നിലനിര്‍ത്താന്‍ ഉത്തരവാദിത്തമുള്ള ജില്ലാ പോലീസിലെ ഒരു വിഭാഗം ഉദ്യോഗസ്ഥര്‍ പാര്‍ട്ടി മെമ്പര്‍ഷിപ്പ് നോക്കി പ്രതികളെ തീരുമാനിക്കുന്നത് അവസാനിപ്പിക്കാന്‍ തയ്യാറാവണമെന്ന് മുസ്ലിം യൂത്ത് ലീഗ് ജില്ലാ പ്രവര്‍ത്തക സമിതി യോഗം അവശ്യപ്പെട്ടു.

കഴിഞ്ഞ ആഴ്ച കുമ്പള ബംബ്രാണയില്‍ സി.പി.എം- ബി.ജെ.പി സംഘര്‍ഷമുണ്ടായപ്പോള്‍ പോലീസ് സംഘര്‍ഷം നടക്കുന്ന സ്ഥലത്ത് പോകാതെ ബംബ്രാണ ജംഗഷനില്‍ വന്ന് ഭീകരാന്തരീക്ഷം സൃഷ്ടിക്കുകയും, പ്രായം ചെന്നവരെയും,രോഗികളെയുംമടക്കം തല്ലിയോടിക്കുകയും ചെയ്യുന്ന അവസ്ഥ ഉണ്ടാക്കുകയും, പോലീസുമായി സംഘര്‍ഷമെന്ന കാരണമുണ്ടാക്കി നിരവധി യൂത്ത് ലീഗ് പ്രവര്‍ത്തകരെ ജയിലില്‍ അടക്കുകയും ചെയ്തു. നാട്ടില്‍ കുഴപ്പം ഉണ്ടാക്കിയ സി.പി.എം, ബി.ജെ.പി പ്രവര്‍ത്തകരെ സംരക്ഷിക്കുന്നനിലപാടാണ് പോലീസിന്റെ ഭാഗത്ത് നിന്ന് ഉണ്ടായത്.



ബംബ്രാണയിലെ സി.പി.എം ഓഫീസ് തീവെച്ച് നശിപ്പിച്ചതിന് രണ്ട് സി.പി.എം പ്രവര്‍ത്തകര്‍ അടക്കം നാല് പേരെ പിടികൂടുകയും ഇവര്‍ തന്നെയാണ് തീവെച്ചതെന്ന് അന്വേഷണത്തില്‍ കണ്ടെത്തുകയും അത് ജനപ്രതിനിധികളോടും, നേതാക്കളോടും പറയുകയും ചെയ്തതിന് ശേഷം മുന്ന് ദിവസം പോലീസ് കസ്റ്റഡിയില്‍ വെക്കുകയും സി.പി.എം പ്രവര്‍ത്തകരായ പ്രതികളെ നേതാക്കള്‍ക്കൊപ്പം വിട്ടയക്കുകയും ചെയ്യുകയായിരുന്നു.

ചട്ടഞ്ചാല്‍ ഹയര്‍ സെക്കണ്ടറി സ്‌കൂളിലെ പത്താംതരംവിദ്യാര്‍ത്ഥിയും മാങ്ങാട് സ്വദേശിയുമായ ജസീമിന്റെ ദുരൂഹ മരണത്തിന് കാരണക്കാരനെന്ന് പോലീസ് തന്നെ പറഞ്ഞ ഒരു സി.പി.എം നേതാവിന്റെ ബന്ധുവിനെതിരെ കേസെടുക്കാതെ ലോക്കല്‍സെക്രട്ടറിയോടൊപ്പം പറഞ്ഞയച്ചതും ജില്ലയിലെ പോലീസ് തന്നെയാണ്. കാസര്‍കോടിന്റെ വിവിധ മേഘലകളില്‍ നടക്കുന്ന സമ്മേളനത്തിന്റെ ഭാഗമായി മുസ്ലിം ലീഗ് പ്രവര്‍ത്തകര്‍ കൊടിതോരണങ്ങള്‍ കെട്ടുമ്പോള്‍ എടുത്തു മാറ്റുന്ന പോലീസ് അതേ സ്ഥലങ്ങളില്‍ സി.പി.എം, ബിജെപി പതാകകള്‍ക്ക് കാവല്‍ നില്‍ക്കുന്ന നെറികെട്ട പ്രവര്‍ത്തനമാണ് നടത്തുന്നത്.