കൊടിതോരണങ്ങള്‍ നശിപ്പിക്കുന്നത് ചോദ്യം ചെയ്തതിന് യുവാവിനെ പോലീസ് മര്‍ദിച്ചതായി പരാതി

കാസര്‍കോട്: (www.kasargodvartha.com 21.11.2018) കൊടിതോരണങ്ങള്‍ നശിപ്പിക്കുന്നത് ചോദ്യം ചെയ്തതിന് യുവാവിനെ പോലീസ് മര്‍ദിച്ചതായി പരാതി. ചൂരിയിലെ ബിലാല്‍ (38) ആണ് മര്‍ദനമേറ്റ പരിക്കുകളോടെ കാസര്‍കോട്ടെ സ്വകാര്യാശുപത്രിയില്‍ ചികിത്സ തേടിയത്. കറന്തക്കാട് ദേശീയപാത സര്‍ക്കിളില്‍ ചിലര്‍ ബൈക്ക് റെയ്‌സ് നടത്തിയതിനു പിന്നാലെ ചൂരിയിലെത്തിയ പോലീസ് നബിദിന ആഘോഷത്തിന്റെ ഭാഗമായി സ്ഥാപിച്ച കൊടിതോരണങ്ങള്‍ നശിപ്പിക്കുകയായിരുന്നു.

ഇതിനെ ചോദ്യം ചെയ്തതിന്റെ പേരിലാണ് പോലീസ് തന്നെ മര്‍ദിച്ചതെന്ന് ആശുപത്രിയില്‍ കഴിയുന്ന യുവാവ് പറയുന്നു. തങ്ങള്‍ തന്നെ രാത്രിയോടെ കൊടിതോരണങ്ങള്‍ അഴിച്ചുമാറ്റുമെന്നും നശിപ്പിക്കരുതെന്നും പറഞ്ഞപ്പോള്‍ ലാത്തിവീശുകയായിരുന്നു പോലീസ് ചെയ്തതെന്നും നിരവധി പേര്‍ക്ക് ലാത്തിയടിയേറ്റതായും യുവാവ് പറഞ്ഞു.