ഉദുമയില്‍ കാന്‍സര്‍ രോഗികള്‍ വര്‍ധിക്കുന്നത് ആശങ്കാജനകം: വെല്‍ഫയര്‍ പാര്‍ട്ടി

ഉദുമ: (www.kasargodvartha.com 02/03/2015) ഉദുമയില്‍ കാന്‍സര്‍ രോഗികള്‍ വര്‍ധിച്ചു വരുന്നെന്ന വിലയിരുത്തലുകള്‍ ആശങ്കാജനകമാണെന്ന് വെല്‍ഫയര്‍ പാര്‍ട്ടി ഉദുമ പഞ്ചായത്ത് കണ്‍വെന്‍ഷന്‍ അഭിപ്രായപ്പെട്ടു. ജനങ്ങള്‍ക്ക് പൂര്‍ണമായ ആരോഗ്യ സുരക്ഷിതത്വം ലഭിക്കാന്‍ ജില്ലാ ഭരണകൂടവും പഞ്ചായത്ത് അധികൃതരും ജാഗ്രത കാട്ടേണ്ടതുണ്ടെന്ന് യോഗം അഭിപ്രായപ്പെട്ടു.

മദ്യമുള്‍പെടെയുള്ള ലഹരി പദാര്‍ത്ഥങ്ങള്‍ സമ്പൂര്‍ണമായി നിരോധിക്കേണ്ടതുണ്ട്. കോടതി ഉത്തരവുണ്ടായിട്ടും പഞ്ചായത്ത് ഓഫീസിന് മൂക്കിന് താഴെയുള്ള ബീവറേജസ് ഔട്ട്‌ലെറ്റ് തഴച്ചു വളരുന്നത് പഞ്ചായത്ത് ഭരണ സമിതിയുടെ ദൗര്‍ബല്യമാണെന്ന് കുറ്റപ്പെടുത്തി.

ജില്ലാ ജനറല്‍ സെക്രട്ടറി അംബുഞ്ഞി കണ്‍വെന്‍ഷന്‍ ഉദ്ഘാടനം ചെയ്തു. ജില്ലാ സെക്രട്ടറി പി.കെ അബ്ദുല്ല, ജില്ലാ കമ്മിറ്റി അംഗം എം. അബ്ദുല്‍ ലത്വീഫ്, മണ്ഡലം പ്രസിഡണ്ട് മഹ്മൂദ് പള്ളിപ്പുഴ, പഞ്ചായത്ത് പ്രസിഡണ്ട് ബഷീര്‍ പാലക്കുന്ന് എന്നിവര്‍ സംസാരിച്ചു. പഞ്ചായത്ത് വൈസ് പ്രസിഡണ്ട് ശാഫി കാപ്പില്‍ സ്വാഗതവും സെക്രട്ടറി ശെരീഫ് പടിഞ്ഞാര്‍ നന്ദിയും പറഞ്ഞു.