വിസ തട്ടിപ്പിനിരയായവര്‍ ഉദിനൂരിലെ വീടിന് മുന്നില്‍ കുത്തിയിരിപ്പ് സമരം തുടങ്ങി

തൃക്കരിപ്പൂര്‍: പിതാവും മകനും ചേര്‍ന്ന് മലേഷ്യയില്‍ വിസ വാഗ്ധാനം ചെയ്ത് ലക്ഷങ്ങള്‍ തട്ടിപ്പ് നടത്തിയ സംഭവത്തില്‍ ഉദിനൂരിലെ വീടിന് മുന്നില്‍ തട്ടിപ്പിനിരയായവര്‍ കുത്തിയിരിപ്പ് സമരം തുടങ്ങി. ഉദിനൂര്‍ തടിയന്‍കൊവ്വല്‍ എ.എല്‍.പി. സ്‌കൂളിന് സമീപത്തെ നാരായണന്‍, മകന്‍ റിജു എന്നിവരെ അന്വേഷിച്ചെത്തിയവരാണ് വീടിന് മുന്നില്‍ കുത്തിയിരിപ്പ് സമരം തുടങ്ങിയത്.


കൊല്ലത്തെ രാധാകൃഷ്ണന്‍, രാജേഷ്, തുടങ്ങി ഒമ്പത് പേരാണ് കുത്തിയിരിപ്പ് സമരം നടത്തുന്നത്. റിജു ഇവരോട് മലേഷ്യന്‍ വിസയ്ക്ക് വേണ്ടി പണം ആവശ്യപ്പെടുകയായിരുന്നു. പണം നല്‍കാന്‍ തയ്യാറായവരോട് പിതാവ് നാരായണന്റെ ബാങ്ക് അക്കൗണ്ടില്‍ നിക്ഷേപിക്കാന്‍ ആവശ്യപ്പെട്ടതിന്റെ അടിസ്ഥാനത്തില്‍ യുവാക്കള്‍ അക്കൗണ്ടില്‍ അടക്കുകയായിരുന്നു. 85,000 രുപവരെയാണ് ഒരാളില്‍ നിന്നും വാങ്ങിയത്. നാരായണനെ വിസ തട്ടിപ്പ് കേസില്‍ ആറ് മാസം മുമ്പ് ചന്തേര പോലീസ് അറസ്റ്റ് ചെയ്തിരുന്നു.