ഈ ദുരിതം ആര് കാണാൻ! എസ്ഐആർ നടപടികളും തിരഞ്ഞെടുപ്പ് ഡ്യൂട്ടിയും കാരണം വില്ലേജ് ഓഫീസുകളിലെത്തിയ പൊതുജനങ്ങൾ സേവനം ലഭിക്കാതെ മടങ്ങുന്നു; പ്രതിഷേധം ശക്തം

കാസർകോട്: (KasargodVartha) സമഗ്ര വോട്ടർ ലിസ്റ്റ് പരിഷ്കരണ നടപടികളും (എസ്.ഐ.ആർ.) തദ്ദേശ സ്വയംഭരണ തിരഞ്ഞെടുപ്പ് ഡ്യൂട്ടിയും കാരണം വില്ലേജ് ഓഫീസുകളും ജീവനക്കാരും കടുത്ത തിരക്കിലായതോടെ സാധാരണ ജനങ്ങളുടെ പരാതികൾ സ്വീകരിക്കാൻ സമയമില്ലാത്ത അവസ്ഥ. വിവിധ ആവശ്യങ്ങൾക്കായി വില്ലേജ് ഓഫീസുകളിലെത്തുന്ന പൊതുജനങ്ങൾ നിലവിൽ 'പടിക്കൽ പുറത്ത്' എന്ന അവസ്ഥയിലാണെന്ന് ആക്ഷേപം ഉയർന്നിട്ടുണ്ട്.
ബി.എൽ.ഒ.മാരുടെ ചുമതല, എസ്.ഐ.ആർ. ക്യാമ്പുകൾ, പരിശീലന പരിപാടികൾ, യോഗങ്ങൾ തുടങ്ങിയ തിരഞ്ഞെടുപ്പുമായി ബന്ധപ്പെട്ട കാര്യങ്ങളിൽ വില്ലേജ് ഓഫീസർമാരും മറ്റ് ജീവനക്കാരും പൂർണ്ണമായും ശ്രദ്ധ കേന്ദ്രീകരിക്കേണ്ട സാഹചര്യമാണിത്. ഈ തിരക്കിനിടയിൽ അത്യാവശ്യ കാര്യങ്ങൾക്കു പോലും വില്ലേജ് ഓഫീസിലെത്തുന്നവരെ ഉദ്യോഗസ്ഥർ സ്വീകരിക്കുന്നില്ലെന്നാണ് വ്യാപകമായ പരാതി.

റവന്യൂ കാര്യങ്ങൾ താളം തെറ്റി

നികുതി അടച്ച് രസീത് നൽകാൻ പോലും ബന്ധപ്പെട്ട ഉദ്യോഗസ്ഥർക്ക് സമയം കിട്ടുന്നില്ലെന്നാണ് ജനങ്ങൾ പറയുന്നത്. പകരം സംവിധാനം ഒരുക്കാതെയുള്ള റവന്യൂ അധികൃതരുടെ ഈ നടപടി വലിയ പ്രതിഷേധത്തിന് കാരണമായിട്ടുണ്ട്. തിരഞ്ഞെടുപ്പിനൊപ്പം അപ്രതീക്ഷിതമായെത്തിയ എസ്ഐആർ നടപടികൾ ശരിക്കും ഉദ്യോഗസ്ഥരുടെ നടുവൊടിച്ച മട്ടാണ്.
ഭൂമി സംബന്ധമായ കാര്യങ്ങൾക്ക് വില്ലേജ് ഓഫീസുകളിൽ എത്തുന്നവർക്കാണ് ദുരിതം ഏറെയുള്ളത്. കുടുംബസ്വത്ത് വീതം വെക്കൽ, ഭൂമി വിൽപന തുടങ്ങിയ നടപടിക്രമങ്ങൾ നടക്കണമെങ്കിൽ, വിവിധ സ്ഥലങ്ങളിലുള്ള കുടുംബാംഗങ്ങളെല്ലാം ഒത്തുചേരേണ്ടതുണ്ട്. അവധിയെടുത്തും ദൂര സ്ഥലങ്ങളിൽ നിന്നുമൊക്കെ യാത്ര ചെയ്തെത്തുന്നവർക്ക് റവന്യൂ അധികൃതരുടെ ഈ സമയമില്ലായ്മ കാരണം ഏറെ പ്രയാസങ്ങളാണുണ്ടാക്കുന്നത്. തിരഞ്ഞെടുപ്പ് കമ്മീഷൻ്റെ തിരക്കിട്ട എസ്ഐആർ നടപടികളിൽ വലഞ്ഞ ഉദ്യോഗസ്ഥരാകട്ടെ അത്യാവശ്യ സർട്ടിഫിക്കറ്റുകൾക്കും മറ്റും എത്തുന്ന പൊതുജനങ്ങളോട് കൈമലർത്തുകയല്ലാതെ നിവൃത്തിയില്ലെന്ന നിലപാടിലാണ്.
വളരെ അടിയന്തിരമായിട്ടുള്ള ആവശ്യത്തിന് പോലും തണ്ടപ്പേര് എടുക്കുന്നതിന് വേണ്ടി വില്ലേജ് ഓഫീസുകളിൽ ദിവസങ്ങളോളം കയറി ഇറങ്ങേണ്ടി വരുന്നുവെന്നും പരാതിക്കാർ പറയുന്നു.

പകരം സംവിധാനം വേണമെന്ന് ആവശ്യം

എസ്.ഐ.ആർ. നടപടികളിലും തദ്ദേശ തിരഞ്ഞെടുപ്പ് ഡ്യൂട്ടിയിലും നിയോഗിക്കപ്പെട്ടവർക്ക് പകരം സംവിധാനം ഏർപ്പെടുത്തി വില്ലേജ് ഓഫീസ് പ്രവർത്തനം കാര്യക്ഷമമാക്കണമെന്ന് ജനങ്ങൾ ആവശ്യപ്പെടുന്നു. തിരഞ്ഞെടുപ്പ് നടപടികൾ പ്രധാനമാണെങ്കിലും, സാധാരണ ജനങ്ങളുടെ അത്യാവശ്യമായ സേവനങ്ങൾ തടസ്സപ്പെടുത്തുന്നത് ഒഴിവാക്കാൻ റവന്യൂ വകുപ്പ് പ്രത്യേക ക്രമീകരണങ്ങൾ ഏർപ്പെടുത്തണമെന്നാണ് പൊതുജനാഭിപ്രായം.

തിരഞ്ഞെടുപ്പ് ഡ്യൂട്ടിക്ക് പകരം സംവിധാനം ഒരുക്കേണ്ടത് അത്യാവശ്യമല്ലേ? നിങ്ങളുടെ അഭിപ്രായം കമൻ്റ് ചെയ്യുക.

Article Summary: Public services disrupted as Village Offices prioritize SIR and election duty.

#KeralaRevenue #VillageOffice #ElectionDuty #SIR #PublicGrievance #Kasaragod