ചെങ്കല്ലിൽ അഴകാർന്ന തൂണുകളും ആകർഷകമായ ക്ഷേത്ര തിരുമുറ്റങ്ങളും പഴമയുടെ തനിമ ഒട്ടും ചോരാതെ നിർമിച്ച് ശ്രദ്ധേയനായി കല്പണിക്കാരൻ

ചെറുവത്തൂർ: (KasargodVartha) ചെങ്കല്ലിൽ അഴകാർന്ന തൂണുകളും ആകർഷകമായ ക്ഷേത്ര തിരുമുറ്റങ്ങളും പഴമയുടെ തനിമ ഒട്ടും ചോരാതെ നിർമിച്ച് ശ്രദ്ധേയനാവുകയാണ് ചെറുവത്തൂർ തുരുത്തി സ്വദേശിയായ ടി വി പ്രകാശൻ. മൂന്ന് പതിറ്റാണ്ടിലേറെയായി ചെങ്കൽ നിർമാണരംഗത്ത് സജീവമായ അദ്ദേഹം, പരമ്പരാഗത ശൈലിയിലുള്ള നിർമാണങ്ങൾക്ക് പുതുജീവൻ നൽകുകയാണ്. 

ചീമേനിയിൽ സ്വകാര്യ വ്യക്തിക്കായി പഴയ നാലുകെട്ട് മാതൃകയിൽ നിർമിച്ചുകൊണ്ടിരിക്കുന്ന വീട് ഇപ്പോൾ ഏറെ ശ്രദ്ധ നേടിയിരിക്കുകയാണ്. 20 ചെങ്കൽ തൂണുകളിലാണ് ഇതിൻ്റെ നിർമാണം. ചെങ്കല്ലിൽ അതിമനോഹരമായി ഒരുക്കുന്ന തൂണുകളും നടുമുറ്റവും പരമ്പരാഗത കേരള വാസ്തുവിദ്യയുടെ ഭംഗി വിളിച്ചോതുന്നതാണ്.

ഒരു ചെങ്കൽ തൂൺ നിർമിക്കാൻ മൂന്നിലധികം തൊഴിലാളികൾ ചേർന്ന് നാല് ദിവസം വരെ ജോലി സമയം വേണ്ടിവരുമെന്ന് പ്രകാശൻ പറഞ്ഞു. ഓരോ നിർമാണവും അതീവ സൂക്ഷ്മതയോടെയും കൃത്യതയോടെയുമാണ് അദ്ദേഹം പൂർത്തിയാക്കുന്നത്. ഇവിടെ താമസിക്കുന്നവർക്ക് വേനൽച്ചൂടിൽ പോലും കുളിർമ പകരുമെന്നും പ്രകാശൻ പറഞ്ഞു.

ക്ഷേത്ര നിർമാണങ്ങളിലെ കരവിരുത്

കഴിഞ്ഞ 30 വർഷത്തിലേറെയായി ഈ രംഗത്ത് പ്രവർത്തിക്കുന്ന പ്രകാശൻ, ജില്ലയിലെ മഡിയൻ കൂലോം ക്ഷേത്രം ഉൾപ്പെടെ ഇരുപതിലധികം ക്ഷേത്രങ്ങളിൽ തന്റെ കരവിരുത് തെളിയിച്ചിട്ടുണ്ട്. ക്ഷേത്ര തിരുമുറ്റങ്ങൾ, നടുമുറ്റങ്ങൾ, ക്ഷേത്രക്കുളങ്ങൾ തുടങ്ങി നിരവധി നിർമാണങ്ങളാണ് അദ്ദേഹത്തിന്റെ നേതൃത്വത്തിൽ പൂർത്തിയായത്. വിമാനാപകടത്തിൽ മരിച്ച ജവാൻ അശ്വിന് വേണ്ടി നിർമിച്ച സ്മാരകം പ്രകാശന്റെ ശ്രദ്ധേയ സൃഷ്ടികളിലൊന്നാണ്. 

പഴയകാലത്ത് ഉളിയും കൈമഴുവും ഉപയോഗിച്ചാണ് ഇത്തരം നിർമാണങ്ങൾ നടത്തിയിരുന്നതെങ്കിലും ഇന്ന് ആധുനിക ടൂളുകളുടെ സഹായത്തോടെ കൂടുതൽ കൃത്യതയോടെയും സൂക്ഷ്മതയോടെയുമാണ് നിർമാണ പ്രവർത്തനങ്ങൾ നടത്തുന്നതെന്ന് പ്രകാശൻ പറഞ്ഞു. പാരമ്പര്യത്തിന്റെ സൗന്ദര്യം നിലനിർത്തിക്കൊണ്ട് ആധുനിക സാങ്കേതിക വിദ്യയുടെ സഹായം പ്രയോജനപ്പെടുത്തുന്നതാണ് തന്റെ പ്രവർത്തന രീതിയെന്നും അദ്ദേഹം വ്യക്തമാക്കി.

പുതിയ തലമുറയുടെ അഭാവം

ഈ മേഖലയിൽ പുതിയ തലമുറ കടന്നുവരാത്തത് വലിയ ആശങ്കയാണെന്നും പ്രകാശൻ പറയുന്നു. ഏറെ വൈദഗ്ധ്യവും ക്ഷമയും ആവശ്യമായ ഈ ജോലി മറുനാടൻ തൊഴിലാളികളെ മാത്രം ആശ്രയിച്ച് ചെയ്യാൻ കഴിയില്ലെന്നും അദ്ദേഹം ചൂണ്ടിക്കാട്ടി. നിലവിൽ നാട്ടുകാരായ നിർമാണ വൈദഗ്ധ്യമുള്ള നാല്  തൊഴിലാളികളാണ് അദ്ദേഹത്തെ സഹായിക്കുന്നത്. പഴമയുടെ പൈതൃകവും കലാഭംഗിയും സമന്വയിപ്പിച്ചുള്ള ടി വി പ്രകാശന്റെ നിർമാണങ്ങൾ കാസർകോടിന്റെ സാംസ്കാരിക പൈതൃക സംരക്ഷണത്തിനും പരമ്പരാഗത വാസ്തുവിദ്യയുടെ നിലനിൽപ്പിനും ശ്രദ്ധേയമായ സംഭാവനയായി മാറുകയാണ്.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകൾക്കായി ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.

Article Summary: T.V. Prakasan, a craftsman from Cheruvathur, is gaining attention for preserving traditional Kerala architecture by constructing intricate structures using laterite stone. With over 30 years of experience, he has worked on more than 20 temples and numerous traditional houses. 

#Cheruvathur #TVPrakasan #LateriteArchitecture #KeralaTradition #HeritageConservation #AparnaNews