Protest Rally | വൈദ്യുതിനിരക്ക് വർധനവിനെതിരെ വ്യാപാരികളുടെ പന്തംകൊളുത്തി പ്രകടനം

കാസർകോട്: (KasargodVartha) നഗരത്തിൽ വൈദ്യുതി നിരക്ക് വർദ്ധനവിനെതിരെ വ്യാപാരികൾ കടുത്ത പ്രതിഷേധ സംഗമം നടത്തി. വ്യാപാരി വ്യവസായി ഏകോപന സമിതിയുടെ സംസ്ഥാന വ്യാപക പ്രതിഷേധത്തിന്റെ ഭാഗമായി കാസർകോട് മർച്ചൻറ്സ് അസോസിയേഷൻ്റെ നേതൃത്വത്തിൽ നടന്ന പ്രതിഷേധത്തിൽ പന്തം കൊളുത്തി നഗരത്തിൽ പ്രകടനം നടത്തി. വൈദ്യുതി ബോർഡിന്റെ തെറ്റായ തീരുമാനത്തിനെതിരെ ശക്തമായ പ്രതിഷേധം ഉയർത്തി.

മർച്ചൻറ് അസോസിയേഷൻ പ്രസിഡന്റ് ടി.എ. ഇല്ലാസ്, ജനറൽ സെക്രട്ടറി കെ. ദിനേശ്, ട്രഷറർ നഈം അങ്കോള, ജില്ലാ - യൂണിറ്റ് ഭാരവാഹികൾ എന്നിവർ നേതൃത്വം നൽകി. വൈദ്യുതി താരിഫ് വർദ്ധനവ് വ്യവസായ രംഗത്തെ പ്രതികൂലമായി ബാധിക്കുമെന്നും, ഇത് ഉൽപ്പന്നങ്ങളുടെ വില വർധനവിന് ഇടയാക്കുമെന്നും വ്യാപാരികൾ ആശങ്കപ്പെട്ടു. ഇത് പൊതുജനങ്ങളുടെ ജീവിതച്ചെലവ് വർദ്ധിപ്പിക്കുമെന്നും അവർ ചൂണ്ടിക്കാട്ടി.

കേരള വ്യാപാരി വ്യവസായി ഏകോപന സമിതി  കോട്ടിക്കുളം - പാലക്കുന്ന് യൂണിറ്റ് കമ്മിറ്റിയുടെ ആഭിമുഖ്യത്തിൽ  രാത്രി ടൗണിൽ പന്തം കൊളുത്തി പ്രതിഷേധ ജാഥ നടത്തി. തുടർന്ന് നടന്ന പ്രതിഷേധ സമരം  പ്രസിഡന്റ്‌ എം. എസ്. ജംഷീദ് ഉദ്ഘാടനം ചെയ്തു.  യൂണിറ്റ് സെക്രട്ടറി ചന്ദ്രൻ കരിപ്പോടി അധ്യക്ഷനായി. ട്രഷറർ അരവിന്ദൻ മുതലാസ്, മുരളി പള്ളം, റീത്ത പദ്മരാജ്, ഷാഹുൽ ഹമീദ് എന്നിവർ  സംസാരിച്ചു

കേരള സംസ്ഥാന വൈദ്യുതി ബോർഡ് (കെഎസ്ഇബി- KSEB) ഡിസംബർ ഏഴ് മുതൽ പ്രാബല്യത്തിൽ വരുന്ന രീതിയിൽ യൂണിറ്റിന് 16 പൈസ വീതമാണ് വർദ്ധിപ്പിച്ചത്. 

വ്യാപാരികളുടെ ആശങ്കകൾ പോലെ, വൈദ്യുതി നിരക്ക് വർദ്ധന വ്യവസായ മേഖലയെയും സാധാരണക്കാരെയും ഒരുപോലെ ബാധിക്കും.

താരിഫ് വർദ്ധനവ് പിൻവലിക്കണമെന്നും, സർക്കാർ അടിയന്തരമായി ഇടപെട്ട് വ്യാപാരികളുടെ ആവശ്യങ്ങൾ പരിഗണിക്കണമെന്നും അവർ ആവശ്യപ്പെട്ടു.

#ElectricityTariffHike, #KSEB, #Kasaragod, #TradersProtest, #PriceHike, #KeralaProtest