Toll Booth Clash | കാർ യാത്രക്കാർ പണം നൽകാതെ പോകാൻ ശ്രമിച്ചതായി ജീവനക്കാർ; ഫാസ്റ്റ് ടാഗ് ഉണ്ടെന്ന് മറുപടി; തലപ്പാടി ടോൾ ബൂതിൽ സംഘർഷം; പൊലീസ് കേസ്
● ടോൾ ബൂതിൽ പണം നൽകുന്നതിനെ ചൊല്ലിയുള്ള തർക്കമാണ് സംഘർഷത്തിൽ കലാശിച്ചത്.
● കാറിൽ ഫാസ്റ്റ് ടാഗ് ഉണ്ടെന്നും അതിനാൽ നേരിട്ട് പണം നൽകേണ്ടതില്ലെന്നുമായിരുന്നു യാത്രക്കാർ പറഞ്ഞത്.
● സംഭവത്തിൽ കൂടുതൽ അന്വേഷണം നടന്നുവരികയാണ്.
തലപ്പാടി: (KasargodVartha) യാത്രക്കാരും ജീവനക്കാരും തമ്മിൽ തലപ്പാടി ടോൾ ബൂതിലുണ്ടായ സംഘർഷത്തിൽ ഉള്ളാൾ പൊലീസ് കേസെടുത്തു. ഞായറാഴ്ച രാത്രി 10.30 മണിയോടെയായിരുന്നു സംഭവം. ടോൾ ബൂതിൽ പണം നൽകുന്നതിനെ ചൊല്ലിയുള്ള തർക്കമാണ് സംഘർഷത്തിൽ കലാശിച്ചത്.
ഉള്ളാൾ പൊലീസ് സ്റ്റേഷൻ പരിധിയിലുള്ളവരാണ് കാറിലുണ്ടായിരുന്നത്. പണം നൽകാതെ ഇവർ ടോൾ ബൂതിലെ ബാരികേഡ് ഇടിച്ചുതെറിപ്പിച്ച് കാറുമായി മുന്നോട്ട് പോകാൻ ശ്രമിച്ചുവെന്നാണ് ജീവനക്കാർ പറയുന്നത്. ജീവനക്കാർ ഇത് തടയുകയും ചെയ്തു.
കാറിൽ ഫാസ്റ്റ് ടാഗ് ഉണ്ടെന്നും അതിനാൽ നേരിട്ട് പണം നൽകേണ്ടതില്ലെന്നുമായിരുന്നു യാത്രക്കാർ പറഞ്ഞത്. എന്നാൽ ഇത് ജീവനക്കാർ അംഗീകരിച്ചില്ല. ഇത് പിന്നീട് വലിയ തർക്കമായി മാറുകയായിരുന്നു. ജീവനക്കാരുടെ പരാതിയുടെ അടിസ്ഥാനത്തിലാണ് ഉള്ളാൾ പൊലീസ് കാർ യാത്രക്കാർക്കെതിരെ കേസെടുത്തിരിക്കുന്നത്. സംഭവത്തിൽ കൂടുതൽ അന്വേഷണം നടന്നുവരികയാണ്.
കഴിഞ്ഞ സെപ്റ്റംബറിൽ, ഫാസ്ടാഗിൽ 145 രൂപ ബാലൻസ് ഉണ്ടായിട്ടും തലപ്പാടി ടോൾ ബൂതിൽ കേരള അതിർത്തിയിലേക്ക് പ്രവേശിക്കാൻ അനുവദിച്ചില്ലെന്ന് പ്രശോഭ് ലാൽ എന്ന ഉപയോക്താവ് എക്സ് പോസ്റ്റിൽ പരാതിപ്പെട്ടിരുന്നു. ജീവനക്കാർ 'സ്കാനർ ബ്ലാക് ലിസ്റ്റ്' എന്ന കാരണം കാണിച്ചാണ് വാഹനം തടഞ്ഞത്. ഇതിന് കാരണം ചോദിച്ചപ്പോൾ, ഫാസ്ടാഗിൽ കുറഞ്ഞത് 150 രൂപ ബാലൻസ് ഉണ്ടായിരിക്കണമെന്നാണ് ജീവനക്കാർ അറിയിച്ചതെന്നും ഇരട്ടി തുക ടോളായി നൽകേണ്ടി വന്നുവെന്നും പോസ്റ്റിൽ വെളിപ്പെടുത്തിയിരുന്നു.
Toll plaza scam @NHAI_Official
— Prashob Lal (@Prashob92) September 25, 2024
Fast tag had Rs.145 balance and the toll was 55 at talapady toll, mangalore to Kerala border. The scanner is saying blacklisted and when enquired the staffs are saying there is a minimum requirement of Rs.150. Had to pay in cash which is double. pic.twitter.com/unc83hnPyf
#TalapadyToll #TollBoothClash #FastTag #PoliceCase #TollDispute #Mangalore
