വളവുകളിൽ വേഗം കുറയ്‌ക്കേണ്ട: റെയിൽവേ ട്രാക്കുകളിൽ 'ടിൽറ്റിങ് ട്രെയിൻ' സംവിധാനം വരുന്നു

ചെന്നൈ: (KasargodVartha) അലൈൻമെന്റ് മാറ്റാതെയും ഭൂമി ഏറ്റെടുക്കാതെയും തന്നെ ട്രാക്കിലെ വളവുകളിൽ ട്രെയിനുകളുടെ വേഗക്കുറവ് മറികടക്കാൻ പുതിയ സാങ്കേതികവിദ്യ പരീക്ഷിക്കാൻ കേന്ദ്ര റെയിൽവേ മന്ത്രാലയം ഒരുങ്ങുന്നു. 'ടിൽറ്റിങ്' ട്രെയിനുകളുമായാണ് റെയിൽവേയുടെ പുതിയ പരീക്ഷണം.

പുതുതായി നിർമ്മിക്കുന്ന വന്ദേ ഭാരത് ട്രെയിനുകളിൽ വിദേശ സഹകരണത്തോടെ ഈ സാങ്കേതികവിദ്യ ഇതിനകം തന്നെ നടപ്പിലാക്കിയിട്ടുണ്ട്. ഘട്ടംഘട്ടങ്ങളായി മറ്റ് ട്രെയിനുകളിലും ഇത് കൊണ്ടുവരാനാണ് റെയിൽവേ ആലോചിക്കുന്നത്. കോച്ചുകളുടെ അടിഭാഗത്തുള്ള പ്രത്യേക ഹൈഡ്രോളിക് സംവിധാനത്തിലാണ് വളവുകളിൽ വേഗം കുറയ്ക്കാതെ ട്രെയിൻ ഓടുന്നത്. 

ഇതിനായി ഹൈഡ്രോളിക് ടിൽറ്റിങ് ബോഗികൾ ഉപയോഗിക്കേണ്ടിവരും. ചെന്നൈയിലെ ഇന്റഗ്രൽ കോച്ച് ഫാക്ടറിയിൽ നിർമ്മിക്കുന്ന പുതിയ ട്രെയിനുകളിൽ സാങ്കേതികവിദ്യ പരീക്ഷിക്കാനാണ് റെയിൽവേയുടെ നീക്കം.

അർധ-അതിവേഗ റെയിൽവേ പാതയ്ക്കായി പഠനം നടത്തിയ റെയിൽവേ ചീഫ് എൻജിനീയർ അലോക്ക് വർമ്മയുടെ നേതൃത്വത്തിലുള്ള സംഘത്തിന്റെ റിപ്പോർട്ടിൽ, കേരളത്തിൽ 'ടിൽറ്റിങ് ട്രെയിൻ' ആണ് അനുയോജ്യമായ മാതൃകയെന്ന് വ്യക്തമാക്കിയിരുന്നു. 

ഇത് വഴി ആറു മണിക്കൂർ കൊണ്ട് തിരുവനന്തപുരത്തുനിന്ന് കാസർകോട്ടെത്താനാകും. അങ്ങനെ വരുമ്പോൾ നിലവിലെ അലൈൻമെന്റ് മാറ്റേണ്ടതില്ല, ഭൂമി ഏറ്റെടുക്കേണ്ടി വരില്ല.

തിരുവനന്തപുരം-കാസർകോട് പാതയിൽ 36 ശതമാനവും വളവുകളാണുള്ളത്. ഈ ഭാഗത്ത് 626 വളവുകളും 230 ലെവൽ ക്രോസുകളും 138 ഇടത്ത് വേഗനിയന്ത്രണവുമുള്ളതിനാൽ നിലവിൽ വേഗം കൂട്ടുന്നത് ഇവിടെ അസാധ്യമാണ്. 'ടിൽറ്റിങ് ബോഗികൾ' ഇതിന് പരിഹാരമാണെന്നും റിപ്പോർട്ടിൽ പറയുന്നുണ്ട്.

ഈ റെയിൽവേ വാർത്ത നിങ്ങളുടെ സുഹൃത്തുക്കളുമായി പങ്കുവയ്ക്കുക. അഭിപ്രായം കമന്റ് ചെയ്യുക. 

Article Summary: Indian Railways plans to use 'Tilting Train' technology to increase train speeds on curves, especially in Kerala, reducing travel time without land acquisition.

#TiltingTrain #IndianRailways #KeralaRailways #VandeBharat #RailTechnology #Speed