ഉമ്മാസിലെ മൂന്ന് കലാകാരന്മാരെ പുറത്താക്കി
Sep 29, 2012, 16:00 IST
ഹമീദ് കോളിയടുക്കം, യൂസഫ് മേല്‍പറമ്പ്, ഇ.എം. ഇബ്രാഹിം മൊഗ്രാല്‍ എന്നിവരെയാണ് സംഘടനയില്‍ നിന്ന് പുറത്താക്കിയത്. സെപ്റ്റംബര്‍ 21ന് സംഘടനയുടെ ജനറല്‍ ബോഡിയോഗം വിളിച്ചുകൂട്ടിയിരുന്നു. ഈ യോഗത്തില്‍ വെച്ച് പുതിയ ഭാരവാഹികളെ തിരഞ്ഞെടുക്കാനുള്ള നടപടിയുണ്ടായി. പ്രസിഡണ്ട് സ്ഥാനത്തേക്ക് മത്സരിക്കാന്‍ എട്ട് പേരാണ് രംഗത്ത് വന്നത്. ഏറ്റവും ഒടുവില്‍ ആറ് പേര്‍ മത്സരരംഗത്തുനിന്ന് പിന്‍മാറിയതോടെ മുഹമ്മദ് കോളിയടുക്കം, യൂസഫ് മേല്‍പറമ്പ് എന്നിവര്‍ തമ്മിലായി പ്രസിഡണ്ട് സ്ഥാനത്തേക്കുള്ള മത്സരം.
മുഹമ്മദ് 36 വോട്ടും, യൂസഫ് മേല്‍പറമ്പ് 27 വോട്ടും നേടി. പ്രസിഡണ്ട് തിരഞ്ഞെടുപ്പ് പൂര്‍ത്തിയായതോടെ ഹമീദ് കോളിയടുക്കവും യൂസഫ് മേല്‍പറമ്പും, ഇ.എം. ഇബ്രാഹിം മൊഗ്രാലും യോഗത്തില്‍ നിന്ന് ഇറങ്ങിപ്പോയി. അധികാരമോഹമാണ് ഇതിന് പ്രേരിപ്പിച്ചതെന്ന് സംഘടനയുടെ ഇപ്പോഴത്തെ ഭാരവാഹികള്‍ കുറ്റപ്പെടുത്തുന്നത്.
ഈ മൂന്ന് പേരും ചേര്‍ന്ന് പിന്നീട് മലബാര്‍ കലാവേദിയെന്ന പുതിയ സംഘടനയ്ക്ക് രൂപം നല്‍കി. ഇതോടെയാണ് ഇവര്‍ക്കെതിരെ നടപടിയെടുക്കാനും ഇവരെ സംഘടനയില്‍ നിന്നും പുറത്താക്കാനും തീരുമാനിച്ചത്.
നാലുമാസം മുമ്പ് പുലിക്കുന്ന് അസീസ് പ്രസിഡണ്ടും അന്തരിച്ച പ്രശസ്ത മാപ്പിളപ്പാട്ട് ഗായകന്‍ ഇബ്രാഹിം ബീരിച്ചേരി സെക്രട്ടറിയുമായ കമ്മിറ്റിയെ ഈ മൂന്നംഗ സംഘം ചരടുവലി നടത്തി താഴെയിറക്കിയതായി ആക്ഷേപം നിലനില്‍ക്കുന്നുണ്ട്. പുറത്താക്കിയ മൂന്ന് പേര്‍ക്കും സംഘടനയുമായി യാതൊരു ബന്ധവുമില്ലെന്നും ഉമ്മാസിന്റെ പേരില്‍ ഇവര്‍ നടത്തുന്ന യാതൊരു കാര്യത്തിനും സംഘടന ഉത്തരവാദിയായിരിക്കില്ലെന്നും ഉമ്മാസ് നേതൃത്വം അറിയിച്ചു.
Keywords: Kasaragod, Singer, Kerala, Ummas, Mappilapatt Association
Tags
Share this story
