'ബ്രാഞ്ച് സെക്രട്ടറിക്കെതിരെ ഭീഷണി; കോണ്‍ഗ്രസ് പ്രവര്‍ത്തകര്‍ക്കെതിരെ നടപടിയെടുക്കണം'
May 14, 2012, 16:53 IST
സിപിഎം പതാക നശിപ്പിച്ചതിനെതിരെ പൊലീസില്‍ പരാതി നല്‍കിയതിനാണ് ബന്തടുക്ക മലാങ്കുണ്ട് ബ്രാഞ്ച് സെക്രട്ടറിയും ഡിവൈഎഫ്‌ഐ ബന്തടുക്ക മേഖലാ വൈസ് പ്രസിഡന്റുമായ സി ആര്‍ ഉഷയെ കൊടുവാളുമായി വീട്ടില്‍ കയറിയും വഴിയില്‍ വെച്ചും കോണ്‍ഗ്രസ് പ്രവര്‍ത്തകര്‍ ഭീഷണിപ്പെടുത്തിയത്. ഇതുസംബന്ധിച്ച് മൂന്ന് പരാതികള്‍ ബേഡകം പൊലീസില്‍ നല്‍കിയെങ്കിലും ഇതുവരെയായി ഒരു നടപടിയും പൊലീസ് സ്വീകരിച്ചിട്ടില്ല.
പതാക നശിപ്പിച്ചതിനെക്കുറിച്ച് പൊലീസില്‍ പരാതി പിന്‍വലിക്കണമെന്ന് പറഞ്ഞാണ് ആദ്യം ഭീഷണിപ്പെടുത്തിയത്. ഭീഷണിപ്പെടുത്തിയതിനെക്കുറിച്ച് വീണ്ടും പരാതി നല്‍കിയപ്പോള്‍ ശനിയാഴ്ച രാത്രി പത്ത് മണിയോടെയാണ് കൊടുവാളുമായി വീട്ടില്‍ കയറി വധഭീഷണി മുഴക്കുകയായിരുന്നു. കേട്ടാലറയ്ക്കുന്ന ഭാഷയില്‍ അസഭ്യം പറയുകയും ചെയ്തു. അതേസമയത്ത് ബേഡകം പൊലീസില്‍ സ്റ്റേഷനില്‍ വിളിച്ചതിനാല്‍ അസഭ്യം പറയുന്നതും ഭീഷണിപ്പെടുത്തുന്നതും ഉള്‍പ്പെടെ പൊലീസ് സ്റ്റേഷനില്‍ നേരിട്ട് കേട്ടിരുന്നു. രാത്രി 11.30ഓടെ എഎസ്‌ഐയുടെ നേതൃത്വത്തില്‍ പൊലീസ് വീട്ടിലെത്തിയിരുന്നു. സംഭവത്തെക്കുറിച്ച് അനേ്വഷിക്കുന്നതിന് പകരം പ്രതികളുടെ തോളില്‍തട്ടി അഭിനന്ദിക്കുന്ന നിലയിലാണ് പൊലീസ് പെരുമാറിയത്.
വീട്ടില്‍ അതിക്രമിച്ച് കയറി വനിതയെന്ന പരിഗണന പോലുമില്ലാതെ വധഭീഷണി മുഴക്കുകയും പെണ്‍മക്കളുടെ മുന്നില്‍ വെച്ച് കേട്ടാലറയ്ക്കുന്ന ഭാഷയില്‍ അസഭ്യം പറയുകയും ചെയ്ത പ്രതികള്‍ക്കെതിരെ കര്‍ശനമായ നടപടി സ്വീകരിക്കണമെന്ന് ഏരിയാ കമ്മിറ്റി ആവശ്യപ്പെട്ടു.
ഡിവൈഎഫ്‌ഐ ബേഡകം ബ്ലോക്ക് കമ്മിറ്റി
കുറ്റിക്കോല്‍: ബ്രാഞ്ച് സെക്രട്ടറിയായ വനിതയെ വീട്ടില്‍ അതിക്രമിച്ചുകയറി ഭീഷണിപ്പെടുത്തിയ കോണ്‍ഗ്രസ് പ്രവര്‍ത്തകര്‍ക്കെതിരെ കര്‍ശന നടപടിയെടുക്കണമെന്ന് ഡിവൈഎഫ്‌ഐ ബേഡകം ബ്ലോക്ക് കമ്മിറ്റി ആവശ്യപ്പെട്ടു. ജാതിപ്പേര് വിളിച്ച് ആക്ഷേപിക്കുകയും കുടുംബത്തെ ജീവിക്കാനനുവദിക്കില്ലെന്നും മറ്റും ഭീഷണിപ്പെടുത്തുകയും കേട്ടാലറയ്ക്കുന്ന ഭാഷയില്‍ അസഭ്യം പറയുകയും ചെയ്തത് സംബന്ധിച്ച് ബേഡകം പൊലീസില്‍ മൂന്ന് പരാതികള്‍ നല്‍കിയെങ്കിലും കുറ്റിവാളികളെ രക്ഷിക്കാനാവശ്യമായ നടപടികളാണ് പൊലീസ് സ്വീകരിക്കുന്നത്.
മലാങ്കുണ്ട് ബ്രാഞ്ച് സെക്രട്ടറിയും ഡിവൈഎഫ്‌ഐ ബന്തടുക്ക മേഖലാ വൈസ് പ്രസിഡന്റുമായ സി ആര്‍ ഉഷയെ കൊടുവാളുമായി വീട്ടില്‍ കയറിയും വഴിയില്‍ വെച്ചും നിരവധി തവണ ഭീഷണിപ്പെടുത്തി. സംഭവത്തില്‍ ഉള്‍പ്പെട്ട പ്രതികള്‍ കണ്‍മുന്നിലുണ്ടായിട്ടും അവരെ വിളിച്ച് കാര്യമനേ്വഷിക്കാന്‍ പോലും പൊലീസ് തയ്യാറായിട്ടില്ല. കുറ്റവാളികളെ അഭിനന്ദിക്കുന്ന നിലയിലാണ് പൊലീസ് പെരുമാറുന്നത്.
പെന്‍ഷന്‍ പ്രായം വര്‍ധനവിനെതിരെ മാര്‍ച്ച് 21ന് ഡിവൈഎഫ്‌ഐ നടത്തിയ കലക്ടറേറ്റ് മാര്‍ച്ചിന് നേരെ പൊലീസ് നടത്തിയ അതിക്രമത്തില്‍ ഗുരുതരമായി പരിക്കേറ്റതിനെ തുടര്‍ന്ന് പത്ത് ദിവസത്തോളം മംഗലാപുരത്തെയും കാസകോട്ടെയും സ്വകാര്യാശുപത്രിയില്‍ ചികിത്സയിലായിരുന്നു ഉഷ. പൊലീസ് ബുട്ടിട്ട കാലുകൊണ്ട് വയറ്റത്ത് ചവിട്ടുകയായിരുന്നു. അതിന്റെ ചികിത്സ ഇപ്പോഴും തുടരുകയാണ്. അതിനിടയിലാണ് കോണ്‍ഗ്രസ് പ്രവര്‍ത്തകരുടെ അതിക്രമം. പ്രതികള്‍ക്കെതിരെ കര്‍ശന നടപടിയെടുക്കണമെന്ന് ബ്ലോക്ക് കമ്മിറ്റി ആവശ്യപ്പെട്ടു.
Keywords: Kasaragod, Kuttikol, CPI, CPM, Congress, Police, DYFI.
Tags
Share this story
