ആചാര സ്ഥാനികരെ ദേവസ്വം ബോർഡ് ജീവനക്കാരായി അംഗീകരിക്കണം; സാമ്പത്തിക സഹായം 4000 രൂപയായി വർദ്ധിപ്പിക്കണമെന്നും ആവശ്യം
● തീയ്യ സമുദായ ആചാര സംഗമം തിങ്കളാഴ്ച പെരിയയിൽ.
● 1500 ഓളം ആചാര സ്ഥാനികർ പങ്കെടുക്കും.
● മന്ത്രി വി എൻ വാസവൻ സംഗമം ഉദ്ഘാടനം ചെയ്യും.
● കെ രാധാകൃഷ്ണൻ നൽകിയ ഉറപ്പ് പാലിച്ചില്ലെന്ന് പരാതി.
● വേതനത്തിനായി പ്രത്യേക ഫണ്ട് വേണമെന്ന് ആവശ്യം.
● രാജ്മോഹൻ ഉണ്ണിത്താൻ എംപി മുഖ്യാതിഥിയായിരിക്കും.
കാസർകോട്: (KasargodVartha) ഉത്തരമലബാർ തീയ്യ സമുദായ ക്ഷേത്ര സംരക്ഷണ സമിതിയുടെ നേതൃത്വത്തിൽ ആചാര സംഗമം ഈ മാസം തിങ്കളാഴ്ച, ഓഗസ്റ്റ് 11-ന് പെരിയയിൽ നടക്കും. ആചാര സ്ഥാനികരെ ദേവസ്വം ബോർഡ് ജീവനക്കാരായി അംഗീകരിക്കണമെന്നും പ്രതിമാസ സാമ്പത്തിക സഹായം വർദ്ധിപ്പിക്കണമെന്നും ആവശ്യപ്പെട്ട് സർക്കാർ ഇടപെടൽ തേടുന്ന ഈ സംഗമത്തിൽ കണ്ണൂർ, കാസർകോട് ജില്ലകളിലെ നിരവധി സ്ഥാനികർ പങ്കെടുക്കും. പരിപാടിയുടെ വിശദാംശങ്ങൾ ഭാരവാഹികൾ വാർത്താസമ്മേളനത്തിൽ അറിയിച്ചു.
ആചാര സംഗമം തിങ്കളാഴ്ച
പെരിയ എസ്.എൻ കോളേജ് ഓഡിറ്റോറിയത്തിൽ തിങ്കളാഴ്ച രാവിലെ 10 മണിക്കാണ് ആചാര സംഗമം ആരംഭിക്കുക. സഹകരണ-ദേവസ്വം വകുപ്പ് മന്ത്രി വി. എൻ വാസവൻ സംഗമം ഉദ്ഘാടനം ചെയ്യും. ഉത്തരമലബാർ തീയ്യ സമുദായ ക്ഷേത്ര സംരക്ഷണ സമിതി ചെയർമാനും പെരിയ എസ്.എൻ കോളേജ് ട്രസ്റ്റ് പ്രസിഡന്റുമായ സി. രാജൻ പെരിയയുടെ അധ്യക്ഷതയിൽ നടക്കുന്ന ചടങ്ങിൽ രാജ്മോഹൻ ഉണ്ണിത്താൻ എം പി മുഖ്യാതിഥിയായി പങ്കെടുക്കും. എം എൽ എ മാരായ എം. രാജഗോപാലൻ, സി എച്ച് കുഞ്ഞമ്പു, ഇ. ചന്ദ്രശേഖരൻ, എ. കെ. എം അഷ്റഫ്, ടി. ഐ മധുസൂദനൻ, മലബാർ ദേവസ്വം ബോർഡ് പ്രസിഡന്റ് ഒ. കെ. വാസു, പുല്ലൂർ പെരിയ പഞ്ചായത്ത് പ്രസിഡന്റ് സി.കെ അരവിന്ദൻ തുടങ്ങിയ ജനപ്രതിനിധികളും ചടങ്ങിൽ പങ്കെടുക്കും. കണ്ണൂർ, കാസർകോട് ജില്ലകളിലെ വിവിധ സമുദായ ക്ഷേത്രങ്ങളിൽ നിന്നായി 1500 ഓളം ആചാര സ്ഥാനികർ സംഗമത്തിൽ സംബന്ധിക്കുമെന്നാണ് സംഘാടകർ അറിയിച്ചിരിക്കുന്നത്.
പ്രധാന ആവശ്യങ്ങൾ
സംഘടനയുടെ പ്രധാന ആവശ്യങ്ങൾ വാർത്താ സമ്മേളനത്തിൽ ഭാരവാഹികൾ വിശദീകരിച്ചു. കണ്ണൂർ, കാസർകോട് ജില്ലകളിലെ ക്ഷേത്രം ആചാര സ്ഥാനികരെ ദേവസ്വം ബോർഡ് ജീവനക്കാരായി അംഗീകരിക്കാൻ സർക്കാർ തയ്യാറാകണമെന്ന് ഭാരവാഹികൾ ആവശ്യപ്പെട്ടു. നിലവിൽ കോലധാരികളും വിവിധ സമുദായ ക്ഷേത്രങ്ങളിലെ ആചാരക്കാരും ഉൾപ്പെടെ 2200 ഓളം പേർക്ക് മാസം തോറും 1600 രൂപ സാമ്പത്തിക സഹായം അനുവദിക്കുന്നുണ്ട്. കെ.സി. വേണുഗോപാലൻ ദേവസ്വം മന്ത്രിയായിരുന്നപ്പോൾ തുടങ്ങിയ ഈ പദ്ധതി കഴിഞ്ഞ രണ്ട് എൽ ഡി എഫ് സർക്കാരുകൾ അധികാരത്തിൽ വന്നപ്പോഴാണ് തുക വർദ്ധിപ്പിച്ചത്. കഴിഞ്ഞ വർഷം ദേവസ്വം വകുപ്പ് മന്ത്രി കെ. രാധാകൃഷ്ണൻ വന്നപ്പോൾ 2000 രൂപയായി വർദ്ധിപ്പിക്കാമെന്ന് ഉറപ്പ് നൽകിയിരുന്നെങ്കിലും അത് ഇതുവരെ നടപ്പിലായിട്ടില്ല. മറ്റ് ജോലികൾക്കൊന്നും പോകാൻ കഴിയാതെയും കുപ്പായം ധരിക്കാതെയും ദൈവത്തിൻ്റെ പ്രതിപുരുഷന്മാരായി ക്ഷേത്രത്തിൽ കഴിയേണ്ടി വരുന്ന ആചാര സ്ഥാനികർക്ക് നൽകുന്ന പ്രതിമാസ സാമ്പത്തിക സഹായം 4000 രൂപയായി വർദ്ധിപ്പിക്കാൻ സർക്കാർ നടപടി സ്വീകരിക്കണം. അതോടൊപ്പം ഇവരെ സ്ഥിരം ജീവനക്കാരായി അംഗീകരിക്കാൻ തയ്യാറാകണമെന്നും ഭാരവാഹികൾ ആവശ്യപ്പെട്ടു. മറ്റ് ഫണ്ടുകളിൽ നിന്ന് തുക മാറ്റിവെച്ച് വേതനം നൽകുന്നതിന് പകരം പ്രതിമാസ ശമ്പളം നൽകുന്നതിനായി പ്രത്യേക ഫണ്ട് മാറ്റിവെക്കാൻ നടപടി ഉണ്ടാകണമെന്നും ഭാരവാഹികൾ സർക്കാരിനോട് അഭ്യർത്ഥിച്ചു.
പത്രസമ്മേളനത്തിൽ ചെയർമാൻ സി. രാജൻ പെരിയ, ജനറൽ സെക്രട്ടറി നാരായണൻ ചൂരിത്തോട്, കാസർകോട് മേഖല പ്രസിഡന്റ് കുഞ്ഞിക്കണ്ണൻ ബേഡകം, സെക്രട്ടറി വിജയകുമാർ, സത്യൻ മഠത്തിൽ എന്നിവർ പങ്കെടുത്തു.
തീയ്യ സമുദായത്തിൻ്റെ ഈ ആവശ്യങ്ങൾ സർക്കാർ പരിഗണിക്കുമോ? നിങ്ങളുടെ അഭിപ്രായങ്ങൾ കമൻ്റ് ചെയ്യുക.
Article Summary: Thiyya community demands Devaswom employee status for ritual functionaries.
#ThiyyaSamudayam #KeralaPolitics #DevaswomBoard #Kasaragod #VNVasavan #MABaby
