തെയ്യം സീസണ്‍ അടുക്കുന്നു; തെയ്യാട്ടം കാണാനും തെയ്യക്കഥകള്‍ കേള്‍ക്കാനും വിനോദ സഞ്ചാരികളെത്തും, തെയ്യം കലണ്ടര്‍ മൊബൈല്‍ ആപ്പ് തയ്യാറായി

• തെയ്യക്കഥകള്‍ പറയാന്‍ തയ്യാറെടുപ്പുകളുമായി 'സ്‌മൈല്‍' സംരംഭകര്‍
• തെയ്യം കലണ്ടര്‍ മൊബൈല്‍ ആപ്പ് തയ്യാറായി
• സംരംഭകര്‍ക്കുള്ള പരിശീലന പരമ്പര പയ്യന്നൂരില്‍ തുടങ്ങി
• തെയ്യാട്ടം കാണാനും തെയ്യക്കഥകള്‍ കേള്‍ക്കാനും വിനോദ സഞ്ചാരികളെത്തും

കാസര്‍കോട്: (www.kasargodvartha.com 13.10.2019) ഉത്തര മലബാറിന്റെ വിശിഷ്ടമായ സവിശേഷതയും ആരാധനയുടെ ആചാരപരമായ കലാരൂപവുമായ തെയ്യങ്ങളെക്കുറിച്ചു വിനോദ സഞ്ചാരികള്‍ക്കിടയില്‍ അറിവു പകരാനും അവരെ ആകര്‍ഷിക്കാനും വിവിധ പദ്ധതികളുമായി ബിആര്‍ഡിസി. തെയ്യം കലണ്ടര്‍ മൊബൈല്‍ ആപ്ലിക്കേഷന്‍, തെയ്യങ്ങളുടെ കഥകള്‍ പറയാനും പ്രചരിപ്പിക്കാനും സംരംഭകര്‍ക്കുള്ള പരിശീലന പരിപാടികള്‍ മുതലായവ ഉള്‍പ്പെടുന്നതാണ് ആദ്യഘട്ട പദ്ധതി.


ഉത്തര മലബാറില്‍ വിന്യസിച്ചിട്ടുള്ള 'സ്‌മൈല്‍' സംരംഭകരുടെ ശൃംഖല വഴിയാണ് ആയിരത്തിലധികം വര്‍ഷം പഴക്കമുള്ള കലാരൂപം ആഗോള തലത്തിലുള്ള വിനോദ സഞ്ചാരികളിലേക്ക് എത്തിക്കുന്നത്. ചെറുകിട-ഇടത്തരം ടൂറിസം സംരംഭങ്ങള്‍ പ്രോത്സാഹിപ്പിക്കുന്നതിന് ബിആര്‍ഡിസി ആവിഷ്‌കരിച്ചു നടപ്പിലാക്കിയ പദ്ധതിയാണ് 'സ്‌മൈല്‍' (സ്മാള്‍ ആന്‍ഡ് മീഡിയം ഇന്‍ഡസ്ട്രീസ് ലെവറേജിംഗ് എക്‌സ്പീരിയന്‍ഷ്യല്‍ ടൂറിസം പദ്ധതി (SMiLE: Small & Medium Industries Leveraging Experiential Tourism). 93 സ്‌മൈല്‍ സംരംഭകര്‍ ഇപ്പോള്‍ ഉത്തര മലബാറില്‍ പ്രവര്‍ത്തിക്കുന്നുണ്ട്.

തെയ്യാട്ടങ്ങളും കളിയാട്ടങ്ങളും നടക്കുന്ന തറവാടുകളിലും കാവുകളിലുമൊക്കെ വിനോദ സഞ്ചാരികളെ എത്തിച്ച് അവര്‍ക്ക് തെയ്യാട്ടം കാണാനും പശ്ചാത്തല കഥകളും മറ്റും അറിയാനും നടത്തിപ്പുമായി ബന്ധപ്പെട്ടവരുമായി ആശയവിനിമയം നടത്താനുമൊക്കെ അവസരമുണ്ടാക്കുന്ന സമീപനമാണ് സ്‌മൈല്‍ സംരംഭകര്‍ സ്വീകരിക്കുക. ആചാര കേന്ദ്രങ്ങളില്‍ നിന്നും മാറിയുള്ള സ്ഥലങ്ങളില്‍ 'റെഡിമെയ്ഡ്' രൂപത്തിലും കാപ്‌സ്യൂള്‍ പരുവത്തിലുമൊക്കെ തെയ്യങ്ങളെ അവതരിപ്പിക്കുന്നതിനെ നിരുത്സാഹപ്പെടുത്തും.

സ്‌മൈല്‍ സംരംഭകര്‍ക്കുള്ള പരിശീലന പരമ്പര ഒക്ടോബര്‍ അഞ്ചിന് പയ്യന്നൂരില്‍ തുടങ്ങി. തെയ്യം കലണ്ടര്‍ ആപ്ലിക്കേഷന്റെ ഡാറ്റാ കളക്ഷനും മാനേജ്‌മെന്റും സംബന്ധിച്ച് സാങ്കേതിക വിദഗ്ധനായ കെ മഹേഷ് പരിശീലനം നല്‍കി. ഇത് നവംബര്‍ മാസത്തോടെ ഓണ്‍ലൈനില്‍ സഞ്ചാരികള്‍ക്ക് ലഭ്യമാകും.

ഉത്തര മലബാറിലെ തെയ്യങ്ങളെ കുറിച്ച് ഡോ. ആര്‍ സി കരിപ്പത്ത് ക്ലാസെടുത്തു. ഈ രംഗത്തെ വിദഗ്ധരെ പങ്കെടുപ്പിച്ചു കൊണ്ടുള്ള തുടര്‍ പരിശീലന പരിപാടികള്‍ നവംബറില്‍ പൂര്‍ത്തിയാകും.

മലബാര്‍ തെയ്യം കലണ്ടര്‍