വിശുദ്ധ ഖുർആൻ വെളിച്ചത്തിലേക്ക് നയിക്കുന്നു: പാണക്കാട് സാദിഖലി ശിഹാബ് തങ്ങൾ

തളങ്കര: (KasargodVartha) തളങ്കരക്ക് ആത്മീയ വിശുദ്ധിയുടെ മൂന്ന് ദിനരാത്രങ്ങളും വിശുദ്ധ ഖുർആൻ വചനങ്ങളുടെ ആനന്ദവും സമ്മാനിച്ച് നജാത്ത് ഖുർആൻ കോളേജിന്റെ 13-ാം വാർഷികത്തിനും ഒന്നാം സനദ് ദാന സമ്മേളനത്തിനും പ്രൗഢ സമാപനം. കോളേജിനായി ബാങ്കോട് സി എച്ച് മുഹമ്മദ് കോയ നഗറിൽ നിർമ്മിക്കുന്ന ബഹുനില കെട്ടിടത്തിന്റെ ശിലാസ്ഥാപനം പാണക്കാട് സയ്യിദ് സാദിഖലി ശിഹാബ് തങ്ങൾ നിർവ്വഹിച്ചു.

ഖുർആനിനെ സ്നേഹിക്കുക വഴി അല്ലാഹുവിനെയും തിരുദൂതരെയും അതിരറ്റ് സ്നേഹിക്കുകയാണ് ചെയ്യുന്നതെന്നും ഇതുവഴി നജാത്ത് ഖുർആൻ കോളേജ് നാടാകെ പ്രകാശം പരത്തുകയാണെന്നും സാദിഖലി തങ്ങൾ പറഞ്ഞു. ഇരുട്ടിനെ അകറ്റി വിശുദ്ധ ഖുർആനിന്റെ പ്രകാശം എങ്ങും പരത്താനുള്ള ശ്രമങ്ങൾ നാടാകെ വളർന്നുവരികയാണെന്നും അദ്ദേഹം കൂട്ടിച്ചേർത്തു.

സ്ഥാപനത്തിൽ നിന്ന് പഠനം പൂർത്തിയാക്കിയ 13 വിദ്യാർത്ഥികൾക്ക് 'നാജിയാനി' ബിരുദം നൽകി. കുമ്പോൽ കെ എസ് സയ്യിദ് അലി തങ്ങൾ സനദ് ദാന കർമ്മം നിർവ്വഹിച്ചു. യഹ്‌യ തളങ്കര ചടങ്ങിൽ അധ്യക്ഷത വഹിച്ചു. 

ട്രഷറർ സമീർ ബെസ്റ്റ് ഗോൾഡ് സ്വാഗതം പറഞ്ഞു. കോഴിക്കോട് വലിയ ഖാസി പാണക്കാട് സയ്യിദ് നാസർ അബ്ദുൽ ഹയ്യ് ശിഹാബ് തങ്ങൾ സനദ് ദാന പ്രഭാഷണം നടത്തി. ഡോ. റാഷിദ് ഗസ്സാലി മുഖ്യപ്രഭാഷണം നിർവ്വഹിച്ചു.

വിശുദ്ധ ഖുർആൻ പഠനമേഖലയിൽ മികച്ച സംഭാവനകൾ നൽകിയ അബ്ദുൽ കരീം കോളിയാട്, ഉസ്താദ് അബ്ദുൽ സലാം മൗലവി കൊടുവള്ളി എന്നിവർക്ക് നജാത്ത് ഹോളി ഖുർആൻ അവാർഡ് ഹാഫിള് അബ്ദുൽ സലാം മൗലവി സമ്മാനിച്ചു. 

കെ ബി എം ഷരീഫിന് കുമ്പോൽ സയ്യിദ് അലി തങ്ങൾ അവാർഡ് നൽകി. ജാമിഅ നൂരിയ്യ അറബിക് കോളേജ് പ്രൊഫസർ ളിയാഉദ്ധീൻ ഫൈസി മേൽമുറി അനുഗ്രഹഭാഷണവും നജാത്ത് ഖുർആൻ അക്കാദമി ഡയറക്ടർ ഡോ. ബാസിം ഗസ്സാലി ആമുഖഭാഷണവും നടത്തി.

ഹാഫിള് മുഹമ്മദ് ബി കെ ഖിറാഅത്ത് നടത്തി. അബ്ബാസ് ഫൈസി പുത്തിഗെ, പ്രിൻസിപ്പൽ ഹാഫിള് ഷാക്കിറുദ്ദീൻ, സാബിത്ത് ഇൻസ്പെയർ എന്നിവർ സംസാരിച്ചു. നജാത്ത് കോളേജ് സ്ഥാപകരായ സഈദ് ഹാമിദി, അബൂബക്കർ സിയാദ് എന്നിവർ സ്ഥാനവസ്ത്രങ്ങൾ കൈമാറി.

അഖിലേന്ത്യാ ഹോളി ഖുർആൻ അവാർഡ്: മുഹമ്മദ് പി. ഒന്നാം സ്ഥാനത്ത്

വാർഷികാഘോഷത്തിന്റെ ഭാഗമായി സംഘടിപ്പിച്ച അഖിലേന്ത്യാ ഹോളി ഖുർആൻ പാരായണ മത്സരത്തിൽ കോഴിക്കോട് മർകസ് അക്കാദമി ഓഫ് ഖുർആൻ സ്റ്റഡീസിലെ മുഹമ്മദ് പി. ഒന്നാം സ്ഥാനം നേടി. 

മലപ്പുറം പാണക്കാട് സ്ട്രൈറ്റ്പാത്ത് സ്കൂൾ ഓഫ് ഖുർആനിലെ അഹമ്മദ് നിഹാൻ അലി കളാങ്കോടൻ രണ്ടാം സ്ഥാനവും തൃശൂർ ദാറുസ്സലാം ഇസ്ലാമിക് ആൻഡ് ആർട്സ് കോളേജിലെ മുഹമ്മദ് അബ്ദുല്ല കെ എസ് മൂന്നാം സ്ഥാനവും കരസ്ഥമാക്കി.

നാന്നൂറോളം വിദ്യാർത്ഥികൾ പങ്കെടുത്ത മത്സരത്തിൽ സെമി ഫൈനലിലെത്തിയ 20 പേരിൽ നിന്ന് ആറ് പേരാണ് ഫൈനലിലേക്ക് യോഗ്യത നേടിയത്. മത്സരം കാണാൻ നൂറുകണക്കിനാളുകൾ തടിച്ചുകൂടിയിരുന്നു. സ്വാഗതസംഘം ചെയർമാൻ യഹ്‌യ തളങ്കര വിജയികൾക്ക് സമ്മാനദാനം നിർവ്വഹിച്ചു.

തളങ്കരയിലെ ഈ ആത്മീയ സംഗമത്തിന്റെ വിശേഷങ്ങൾ സുഹൃത്തുക്കളിലേക്ക് ഷെയർ ചെയ്യൂ. 

Article Summary: Grand conclusion of 13th anniversary and 1st convocation of Najath Quran College in Thalangara.

#Thalangara #QuranCollege #SadiqaliThangal #NajathCollege #KasargodNews #SpiritualMeet